Yancy
Saunia e Elder Brent H. Nielson
O Le Fitugafulu
“Ma o lenei ou te manao ina ia outou lotomaualalalo, ma augofie ma agamalu” (Alema 7:23).
Sa matou mananao ma nai ou tei i se solofanua. Pe tusa ma le 9 po o le 10 o o’u tausaga, na faatau ai e lo’u tama se solofanua fafine lanu uliuli aulelei. Sa matou faaigoaina ia Yancy. Sa matou fiafia lava e maua lenei solofanua, ae sa le’i aoaoina o ia ia mafai ona tietie ai se tagata. Sa matou laiti tele e faia uma le galuega faigata o le aoaoina o se solofanua, o lea na talosaga atu ai lou tama i se uo na silafia le tele o mea e uiga i solofanua e fesoasoani e aoao Yancy.
E masani ona matou o atu i le laufanua e vaai Yancy. Sa lēmaonosaia lo matou faatalitali mo le aso e mafai ai ona matou tietie ia te ia. Ae e tusa lava po o a taumafaiga malosi a se tasi, e leai se tasi na mafai ona aoaoina Yancy. Sa loto maaa tele o ia. Sa le’i mafai lava ona matou tietie ia te ia.
I se tasi aso sa taumafai se tasi o uo a lo’u tama e tietie ai i se savali solo. A o agai atu Yancy ma lana tagata tietie i le auala, na puna i luga Yancy ma kiki ese le tagata tietie ma amata ona tamoe i le aai. Sa lēmataofiofia le tamoe ma’ema’eā a Yancy lea na lavea ai lona vae i se paipa vai tineimu. Sa ou tuliloaina Yancy ma maua atu o loo taatiatia ma le tiga i luga o le auala.
Sa ou faanoanoa. Sa matou alolofa ia Yancy. Pe ana fai e usiusitai i le faiaoga, semanu e avea ma se solofanua fiafia i se olaga matagofie. Ae sa le fia faalogo Yancy pe mulimuli i lona matai. Nai lo lena, ua manu’a nei o ia ma taatiatia i le ogatotonu o le auala.
O le tala ia Yancy na aoao ai au i faamanuiaga e oo mai pe a tatou mulimuli i le Matai, lo tatou Faaola o Iesu Keriso. Pe a tatou agalelei ma agamalu ma lotomaualalo, e mafai ona tatou fiafia a o tatou tuu atu i le Faaola e taitai i tatou.
Ata na tusia e Dan Burr