Seia Tatou Toe Feiloai
Atinae i Luga o le Papa
Mai se saunoaga na tuuina mai i le konafesi aoao i le aso 7 o Oke. 1916, e pei ona toelolomiina i le “Atinae i luga o le Papa,” Liahona, Iuni 2010, 12–13.
E le lava le tele po o le lelei o se tusi e taitaia lenei Ekalesia.
I le tele o tausaga ua mavae na sau ai i Iuta se taitai atamai o se [isi] lotu. … Sa auai atu o ia i se sauniga faamanatuga “faaMamona” ma sa tele ni ana faitioga i le auala o loo tatou taulimaina ai le Tausamaaga a le Alii, ae maise lava i lo tatou faaaogaina o le vai nai lo le uaina i na sauniga. Fai mai a ia na ia gatete ina ua ia vaai atu i tagata o mitiina le vai; ma na ia faasino maia le mea moni, aua o le mea moni lava, e tusa ai ma le Tusi Paia, o le Faaola, ina ua Ia faatulagaina le faamanatuga i tagata Iutaia, na faaaogaina le uaina, ma folafola atu o Lona toto lena pe e faatusa i Lona toto. E mafai ona ou faaopoopo atu o le Tusi a Mamona o loo tau mai ai foi na faaaogaina e le Faaola le uaina ina ua Ia faailoa atu le faamanatuga i sa Nifae.
O la’u … uo, pe na ia iloaina pe leai, sa mauaina tonu lava le mea taua e iloa gofie ai ma ese mai ai le Ekalesia a le Atua mai isi lotu uma lava i lalo o le la—o lenei, ao faavaeina isi ekalesia i luga o tusi ma tu masani ma aoaoga a tagata, o lenei Ekalesia e atinae i luga o le papa o Keriso, i luga o le mataupu faavae o faaaliga e vave oo mai ma auauai mai pea. E le faia e le Au Paia o Aso e Gata Ai ni mea ona o loo lolomiina i se tusi [o tusitusiga paia]. Latou te le faia ni mea ona sa ta’u atu e le Atua i tagata Iutaia e fai; latou te le faia foi pe tuua se mea e le faia ona o faatonuga na tuuina atu e Keriso i tagata o sa Nifae.
Ua Faaali Mai le Alii i le Malumalu o Katelani, saunia e Del Parson
So o se mea lava e fai [aloaia] e lenei Ekalesia e fai ona o le Atua, o loo fetalai mai le lagi i o tatou aso, ma ua poloaiina lenei Ekalesia e faia. … O le faavae lena o le Ekalesia a Keriso. Afai tatou te faaaogaina le vai nai lo le uaina i le faamanatuga o le Tausamaaga a le Alii, ua faia ona ua poloaiina ai e Keriso.[tagai i le MF&F 27:1–4].
O faaaliga faalelagi e fua lava i tulaga ma manaoga o tagata, ma mai lea suiga i lea suiga ao agai i luma le galuega a le Atua i lona taunuuga. E le lava le tele po o le lelei o se tusi e taitaia lenei Ekalesia.
I le faia o lenei tala, ou te tautala ma le ava e tatau ai i afioga tusitusia a le Atua, lea o loo lolomiina i tusi, o se vaega o na tusi atonu ua tuai, ua maea ona faataunuuina lona faamoemoega ma ua taatia i le fata, [e pei o taulaga i manuvaefa; tagai i le 3 Nifae 9:19–20], ao le isi vaega o loo malosi, tumu i le ola, ma fetaui tonu i lo tatou tulaga o i ai nei—o lo tatou tulaga o i ai nei o le atiina ae. Ae oo foi i lenei vaega e tatau ona faamatalaina sao. E le tatau i se tagata ona finau mo mea o loo i totonu o tusi, e ala mai i le fofoga taumomoli o le Atua, o le e saunoa mo Ia ma faamatalaina Lana upu [tagai i le MF&F 1:37–38]. O le faia faapea o le faananau atu lea i tusi mate nai lo le perofeta soifua, e masani lava o se tulaga sese lea.
O le mea na fetalai atu ai le Alii i le au Iutaia ma sa Nifae i le 2,000 tausaga talu ai po o mea na Ia fetalai mai ai i le Au Paia o Aso e Gata Ai i le 50 po o le 60 tausaga talu ai, e leai lava sona malosi i le taimi nei vagana ua fetaui tonu lava ma faaaliga o aso-nei, faatasi ai ma faatonuga lata mai a le Alii i Ona tagata e ala mai i Ana auauna filifilia pe tofiaina; ma o i latou e le amanaiaina lenei mea moni o le a ono oo i puapuaga.