Savali a le Au Peresitene Sili
Siomiaina i Ona Aao Malu
Saunia e Peresitene Dieter F. Uchtdorf
Fesoasoani Lua i le Au Peresitene Sili
O Le Tiga i le Faatoaga, saunia e Frans Schwarz
E pei o le toatele o isi, e masani ona faagaeetiaina a’u i galuega matagofie o faatufugaga ma musika. O se tasi o na aafiaga o le aso lea na ou tutu ai i luma o se atavali mataina na fatuina e le tufuga Tanisi o Frans Schwarz na faaigoaina O Tiga i le Faatoaga.1
O lenei atavali tiga matagofie o loo faaalia ai le Faaola o tootuli i le Faatoaga o Ketesemane. A o tatalo o Ia, o loo tutu se agelu i Ona tafatafa, o loo siomia o Ia i aao malu, tuuina atu le faamafanafanaga, fesoasoani faalelagi, ma le lagolagosua.
O le umi lava na ou manatunatu ai i lenei atavali, o le atili tumu foi lea o lo’u loto ma lo’u mafaufau i lagona le mafaamatalaina o le lotoalofa ma le agaga faafetai. E mafai ona ou lagona, i se vaega itiiti, pe na faapei le i ai a’o amata e le Faaola Lana galuega tupito i le olaga nei e ala i le tauaveina i Ona luga o agasala a le lalolagi. Ou te maofa i le alofa e le faatuaoia ma le agalelei o le Tama mo Lana fanau. Ua lofituina a’u i le agaga faafetai o’oo’o mo le mea na faia e le Alo e leai se agasala mo le fanauga uma a tagata ma mo a’u.
O le Taulaga a le Alo o le Atua
O tausaga taitasi i lenei vaitaimi tatou te faamanatu ma mafaufau loloto ai i le taulaga na faia e Iesu Keriso mo le fanauga uma a tagata.
O le mea na faia e le Faaola mai Ketesemane agai i Korokota e fai ma sui mo i tatou, e matuai le mafai ona ou malamalama i ai. Na Ia tauaveina i Ona luga le avega o a tatou agasala ma totogi se tau e faavavau ma e le matatalaina, e le gata mo le uluai solitulafono a Atamu, ae faapea foi mo agasala ma solitulafono o le piliona ma le piliona o tagata na soifua. O lenei taulaga e faavavau ma paia na mafua ai e, “le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga” (MF&F 19:18).
Na tigaina o Ia mo au.
Na puapuagatia o Ia mo oe.
Ua taumasuasua lo’u agaga i le loto faafetai pe a ou mafaufau i le uiga taua o lenei osigataulaga. E faalotomaualaloina a’u i le iloa, o i latou uma o e talia lenei meaalofa ma lilifa atu o latou loto ia te Ia e mafai ona faamagaloina ma faamamaina i a latou agasala, e tusa lava pe o le a le uliuli o o latou pisia pe o le a foi le mamafatu o a latou avega.
E mafai ona tatou toe mama ma atoatoa. E mafai ona togiolaina i tatou e le taulaga e faavavau a lo tatou Faaola peleina.
O Ai o le A Faamafanafanaina i Tatou?
E ui e leai se tasi o i tatou o le a oo i le loloto o mea na tigaina ai lo tatou Alii, o le a taitoatasi i tatou ma maua o tatou lava taimi pogisa ma oona--o taimi ia o le a foliga ai o tatou faanoanoaga ma faavauvauga e sili atu le tetele nai lo mea e mafai ona tatou onosaia. O le a i ai taimi e taomia faalealofa ai i tatou i le mamafa ma le faalumaina o a tatou agasala.
E ui a o lea, afai o le a tatou sii ae o tatou loto i le Alii i na taimi, e mautinoa lava o le a Ia silafia ma malamalama i ai. O Ia o le na puapuagatia ma le le manatu faapito mo i tatou i le faatoaga ma luga o le satauro, o le a le tuua i tatou e aunoa ma le faamafanafanaga i le taimi nei. O le a Ia faamalosia, faamalosiau, ma faamanuia i tatou. O le a ia siomiaina i tatou i Ona aao malu.
O le a sili atu nai lo o se agelu o Ia ia i tatou.
O le a Ia aumaia ia i tatou le mafanafana faamanuiaina, faamalologa, faamoemoe, ma le faamagaloga.
Aua o Ia o lo tatou Togiola.
O lo tatou Laveai.
O lo tatou Faaola alofa mutimutivale ma lo tatou Atua faamanuiaina.