Aua le Faamasino i Le ua Saunia
Saunia e Randall L. Ridd
Fesoasoani Lua i le Au Peresitene Aoao o Alii Talavou
E te le iloa po o ai ua saunia e maua le talalelei.
Ata na tusia e Katie Payne
O le a ou manatuaina pea le ’aiga i le afiafi a le mafutaga lona 40 a la’u aoga maualuga. Sa ou naunau lava e vaai i uo tuai ou te le’i toe vaai i ai i le tele o tausaga ma iloa ai po o a ni mea na tutupu i o latou olaga talu mai le aoga maualuga.
A o matou talanoa i se laulau ma le toa 8 pe toa 10 o isi tagata o le vasega i le taimi o le taumafataga, na fai mai se tasi o a’u uo ua leva o Greg Link, ua uma ona papatiso o ia i le Ekalesia i le pe a o le 20 ma ona tupu o ona tausaga.
Ona ia fesili mai lea i se fesili matuitui: “Aisea na leai ai se tasi o outou na ofoina mai ia te au se Tusi a Mamona i le aoga maualuga? Tou te le’i manatu o a’u o se tagata na ono tatau mo le Ekalesia?
Na fai mai se tasi uo ua leva—o le sa le o se tagata o le Ekalesia, “Na semanu e avatu ma oe se tasi o a’u [Tusi a Mamona]; na pe a ma le 50 na tuuina mai ia te a’u!”
Sa ou le magagana. I aso la i le aoga maualuga, ana e fai mai ia te a’u e faapea o le a papatisoina Greg ma avea ma se failauga faamalosiau faamanuiaina, semanu ou te le talitonu i ai. Sa ou fiafia tele ia Greg. O ia o se ituaiga uo faamaoni e mafai ona e tapa i ai pe a e manaomia o ia. Ae sa ou iloaina sa fiafia e pati, ma sa talenia foi i le faasala soo. Sa leai ma so’u manatu o le a i ai sona manao e faalogo e uiga i le Ekalesia. O le mea malie la, sa ou talitonu lava o le isi uo, lea sa ou faasoaina i ai le talalelei ma tuuina atu i ai se kopi o le Tusi a Mamona, o le a i ai se aso e auai ai. Ae o le mea moni, e te le iloa po o ai ua saunia e talia le talalelei ae o ai e le’i saunia.
Sa ou lagonaina si matamuli laitiiti ina ua uma lena talanoaga ma Greg aua o a’u, e pei o le toatele o isi, ou te le’i faasoaina atu le talalelei ia te ia. Sa ou fesili atu ia te ia pe na faapefea ona auai i le Ekalesia. O lana tala lenei:
Sa me’i atu lo’u aiga i le Aai o Sate Leki, Iuta, ina ua tusa ma le 11 o’u tausaga, ae ou te le’i auai i le Ekalesia seia oo i le 24 o o’u tausaga. O le toe tepa i tua, sa mafai ona ou iloa ai le pogai na leai ai se tasi na faasoaina mai le talalelei ia te a’u. Sa le o a’u o se faaaumea auro i le itu i fafo. O le mea moni, o a’u o se tamaitiiti sa fai si malovale. Sa ou aafia i fusuaga ma sa masani ona faasala soo a’u i le aoga.
Sa i ai ni a’u uo o le AAG, ae sa na o le toatasi lava na talanoa e uiga i le Ekalesia. Ia ona sa ou taufaalili ia te ia e uiga i le faitauina o le Tusi a Mamona pe a tausitama.
Ae sa ou fiailoaina ia mea. Sa ave a’u e lo’u tina i se lotu Kerisiano i le lotoifale. Ae sa i ai se taimi na ou fesili ai ia i latou pe aisea na le afio mai ai Iesu i le Atu Amerika. Sa pei na talie mai ia te a’u mo le fai atu o se fesili faapena, o lea sa ou le toe fesili lava i ai i se mea.
O ni tausaga mulimuli ane, sa tonu ia te a’u o le a ou asiasi atu i le nofoaga autu o tagata asiasi i le Lotoa o le Malumalu i le Aai o Sate Leki. Sa i ai iina se faataitaiga o se vaaiga o Keriso i Amerika. Na faafuasei ona ou manatuaina a’u fesili e uiga i lena autu mai tausaga o lo’u talavou. O le taimi lena na taia ai a’u i le Agaga, ma na ou iloa ai ua ou saunia e faalogo.
Sa tumau lava ia te a’u faataitaiga a a’u uo mai le aoga maualuga. O le mea moni, o tagata sa sili ona ou faaaloalo i ai o AAG. O Randy Ridd ma lona faletua sa aooga uma i la’u aoga. O i la’ua o ni faataitaiga maoae, o ni tagata lelei tele. Sa i ai se aafiaga tele o lena mea ia te a’u i se taimi mulimuli ane. Sa ou mafaufau faapea, “Afai na talitonu Randy e moni lenei mea, atonu la e taua.”
Ou te le iloa po o le a se mea na ono tupu pe ana faapea sa laua faasoa mai ni mea se tele atu e uiga i le talalelei i lena vaitaimi. Atonu na semanu ou te le’i sauni. Ae o le toe tepa i tua, maimau pe ana laua [faasoa mai nisi mea se tele]. Ou te iloa e ono i ai se aafiaga ia te a’u.
Ou te lagona le faafetai tele ona sa i ai se aafiaga lelei o a’u faataitaiga ia Greg. Ae semanu e sili atu le lelei o o’u lagona, pe ana ou faia i ai se mea i lena vaitaimi. Ana ou faasoaina atu le talalelei po o le Tusi a Mamona pe tau lava foi o le valaaulia o Greg i se gaoioiga, semanu na suia ai lona olaga. Atonu e ono auai vave ai i le Ekalesia. Atonu foi na ono ave sana misiona.
Ua ou aoaoina o le avea ma se faataitaiga lelei e taua moni lava, ae faapena i le tiutetauave o le faasoa atu o le talalelei. Ua poloai mai le Alii ia i tatou ina ia faia faapea, “O atu ia outou i le lalolagi uma, ina talai atu ai le talalelei i tagata uma lava” (Mareko 16:15).
Ia aua laia le fefe e faasoa atu. Ae o le mea sili, aua ne’i vavevave ona faamasino po o ai ua saunia ae o ai e le’i saunia. Atonu e faateia oe i le tagata ua faamaluluina lona loto, e tusa lava pe o lena fiailoa o loo natia loloto i le mea e le mafai ona e iloa atu ai.