I se tasi aso na finagalo ai Iesu e aoao atu i tagata auala e tutumau malolosi ai e tusa lava pe tutupu ni mea faigata. Sa Ia faamatala atu ia i latou se tala e uiga i se afa malosi, i se tagata poto, ma se tagata valea. Ina ua oo mai le afa, sa le’i pau i lalo le fale o le tagata poto aua sa fausia i luga o se papa. Ae na pau le fale o le tagata valea ona sa fausia i luga o le oneone.
Sa aoao atu e Iesu le taua o le i ai o le faatuatua ia te Ia ma mulimuli i Ana aoaoga. Pe a tatou atinaeina se molimau malosi, o le a lava lo tatou malosi e tutu atu ai, e tusa lava po o a ni mea faigata e ono tutupu mai.
O le faataoto o se ituaiga tala faapitoa. E faamatala mai ai mea faigofie, e pei o se timuafa po o se penina, o mea e masani ai. Sa faamatala atu e Iesu faataoto, e fesoasoani ai i tagata ia malamalama i upumoni faaleagaga. O se tasi faataoto o loo i le Mataio 13:44–46 . O le a le mea o aoao mai ai e uiga i le taua o le talalelei? E mafai ona e mauaina isi faataoto?
Tusi gaoioiga e pei o gaoioiga o loo i lalo i luga o ni fasipepa. Ia auauai e filifili ma faitau leotele mai. Ia talanoaina pe aisea o le a pei ai le faia o ia mea taitasi o le fauina o se fale i luga o le papa po o le oneone. E mafai faapefea e le faalogo i perofeta ona fesoasoani ia i tatou e mulimuli ai i aoaoga a Iesu ma faia ai filifiliga poto?
Faitauina faatasi o tusitusiga paia
Taliaina o se lu’i
Alu i le Lotu
Tuuaia o se mea sese i se isi tagata
Faia o lau meaaoga
Faaalia o le faaaloalo mo isi
Tautala i le sa’o
O le nofonofo e le tautala a’o sauaina se isi tagata
Faalogologo i le konafesi aoao
Kopi i meaaoga
Faaaofiaina o se tagata fou
Faaaogaina o upu leaga
Taaalo i se taaloga ma se tuafafine po o le uso
Faasoa atu i isi
Faaaluina o itula e tele i taaloga komepiuta
Aveina o se mea e le o sau mea.
Tatalo i taeao uma ma po uma
Faaaofiaina o se tagata e le’i faitauliaina
Filifili se maa lamolemole Ia faaaoga se maka po o se peni, e tusi ai i luga le upu “Iesu Keriso.” Talanoa pe aisea e taua tele ai le atinaeina o o tatou olaga i luga o Ana aoaoga. Tuu le maa i se nofoaga e mafai ona e iloa atu ai i taimi uma.
O le Tusi a Mamona e mafai ona fesoasoani ia i tatou ia malamalama i le Feagaiga Fou. Faitau le Helamana 5:12 . O le a se mea na e aoaoina e uiga i le uiga o le upu papa mai le faitauina o lena fuaiupu? Su’e le upu “Papa” i le Taiala i Tusitusiga Paia e iloa ai pe mafai ona e maua ni isi fuaiupu e fesoasoani ina ia e malamalama atili ai.
Faitau faatasi le Mataio 7:24–29 . E mafai foi ona e tusia se ata o le tala. Ona e talanoa lea e uiga i fesili nei: O a ni mea i o tatou olaga ua faapei o le timu ma le matagi? E faapefea ona faapei le faia o faaiuga e tusa ai ma mea ua lauiloa o le fausia o lo tatou fale i luga o le oneone? E faapefea ona puipuia i tatou ma faamalolosia i tatou e pei o se fale e fausia i luga o se papa i le mulimuli i aoaoga a Iesu? Talanoa i ni auala e mafai ona fausia ai o outou faatuatua ia Iesu Keriso.
Pese: “O Le Tagata Poto ma le Tagata Valea” (Tusipese a Tamaiti, 132)
Mau: Mataio 7:24–29