Laulaututu e Fai ma Molimau a le Atua
Saunia e Elder Dallin H. Oaks
O Le Korama a Aposetolo e Toasefululua
Mai se saunoaga i le faigalotu, “Molimau a le Atua,” na tuuina atu i le Iunivesite o Polika Iaga–Idaho i le aso 25 o Fepuari, 2014. Mo le tusiga atoa i le gagana Peretania, alu i le www2.byui.edu/DevotionalsandSpeeches.
I le avea ai ma “masima o le lalolagi,” o i tatou o le Au Paia o Aso e Gata Ai e tatau ona faatumauina lo latou tofo e ala i le ola i la tatou tapuaiga ma ia tautino atu i tatou lava o ni molimau a le Atua.
Ata na tusia e Scott Greer
Ua tatou ola i se lalolagi e toatele ua teena le i ai o le Atua po o le taua o Ana poloaiga. Ou te faamoemoe o sa’u faamatalaga o le a fesoasoani ia outou mataalia atili ai i lo outou tiute e molimau i le Atua ma ia galulue mo le upumoni ma le amiotonu.
I.
Ou te amata i Mataupu Faavae o le Faatuatua e tolu muamua.
“Matou te talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia.
Matou te talitonu o le a faasalaina tagata ona o a latou lava agasala, ae lē ona o le solitulafono a Atamu.
“Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei” (Mataupu Faavae o le Faatuatua 1:1–3).
Na aoao mai e se perofeta maoae o le Tusi a Mamona ia nei lava upumoni e tasi:
“Ia talitonu i le Atua; ia talitonu o loo soifua o ia, ma o ia na foafoaina mea uma, i le lagi ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; ia talitonu e lē mafai e le tagata ona malamalama i mea uma e mafai ona malamalama i ai le Alii.
Ma ou te toe fai atu, ia talitonu e ao ina outou salamo ia outou agasala ma lafoai i ai, ma outou faamaualalo outou lava i luma o le Atua; ma ole atu ma le faamaoni o le loto ia faamagaloina e ia outou” (Mosaea 4:9–10).
O le eseesega, o aso nei e toatele ua teena pe masalosalo i le i ai o le Atua ma finau mai o tulafono uma mo amioga ua faia e tagata ma e mafai ona taliaina pe teenaina pe a loto i ai.
Aisea ua ou talanoa atu ai e uiga i na upumoni autu i le i ai o le Atua ma le moni o tulafono o le sa’o ma le sese e taitai ai a tatou amioga. O nisi taimi o mea e sili ona manaomia e mafai ona tatou aoaoina atu o mea ia e matele ina tatou le talisapaiaina. E mafai ona tatou tuulafoaia upumoni autu faigofie ona tatou te faapea ua malamalama i ai tagata uma, ae leai. E ao ona tatou faamamafa atu upumoni taua ua faavae ai o tatou talitonuga. I le faaiuga, o nei mea e aofia ai le i ai o le Atua ma le moni e faavavau o upumoni ma le faauigaina o le sa’o ma le sese i Ana aooaga ma Ana poloaiga.
II.
O le faafitia o le Atua po o le ta’ufaatauvaaina o Lona matafaioi i fuafuaga a le tagata lea na amataina i le Renaissance ua faapea ona aafia ai le lalolagi aoao i aso nei. O le viia o manatu o le tagata na i ai ona aafiaga lelei ma aafiaga leaga. O galuega o faasaienisi ua faia ai le tele o atinae i o tatou olaga, ae o le teena o le mana faalelagi mai le avea ma faavae tupito o le sa’o ma le sese e i latou o e ua suitulagaina le faasaienisi mo le Atua ua toatele ai tagata lotu ua fesiligia le fesili lenei: “Aisea [ua] sili atu ai le taua o manatu o soo se faitofa atamai i faiga saoloto [po o le finagalo foi o soo se lala o le Faamasinoga Maualuga a le Iunaite Setete] … i le faia o faaiuga lelei nai lo o le finagalo o le Atua”?1
O i latou ua faaaogaina manatu o tagata e suitulaga i aafiaga faalelagi i o latou olaga ua faaitiitia i latou lava ma taufaatauvaaina tagata i lenei faatinoga.
Ou te faafetai ua ou iloa o loo i ai auala e lua e maua ai le poto—o le auala faasaienisi ma le auala faaleagaga, lea e amata i le faatuatua i le Atua ma le faalagolago i tusitusiga paia, aoaoga musuia, ma faaaliga faaletagata lava ia. E le o i ai se eseesega tele i le va o le poto e maua mai i nei auala eseese ona o le Atua, lo tatou Tama Faavavau pule aoao, e silafia mea moni uma ma valaaulia i tatou ia aoao e ala i ia auala uma e lua.
O valoaga o aso e gata ai na muai valoia mai ai le tetee tele i upumoni ma faatinoga musuia. O nisi o nei valoaga e faatatau i aneti-Keriso, ae o isi e faatatau i le lotu tele ma le inosia.
Aneti-Keriso
O loo faaaoga e le Aposetolo o Ioane le upu aneti-Keriso e faamatala ai le tagata ua “faafiti i le Tama atoa ma le Alo” (1 Ioane 2:22). O aso nei o i latou o e teena le i ai o le Atua e ta’u o tagata faapaupau. O nisi o i latou nei e tauemu i le faatuatua o i latou o e talitonu i mea e le mafai ona faamaonia, a’o latou matua teenaina le i ai o le faaleatua lea e le mafai ona latou faamaonia e sese.
Ua saunia i tatou mo na ituaiga faafitiga o le Atua e ala i le tala o le Tusi a Mamona e uiga i se tagata e igoa ia Korioa. I faaupuga e tai pei lava o tusitusiga e sili ona faapaupau o o tatou vaitaimi, na aoao atu ai Korioa o le na faalua ona ta’ua o se “Aneti-Keriso” (Alema 30:6, 12):
Faauta, e le mafai ona outou iloa e uiga i ni mea tou te le vaai atu i ai; o lea e le mafai ona outou iloa o le a i ai se Keriso.
Ua outou tulimatai i luma ma fai mai ua outou vaai i se faamagaloga o a outou agasala. Ae faauta o se fua lea o se mafaufau valea; ma o lenei faavaleaina o o outou mafaufau ua oo mai ona o uputuu a o outou tamā, ia ua taitai ese atu ai outou i se talitonuga i mea ua le moni” (Alema 30:15–16).
Na folafola atu foi e Korioa “e le mafai ona faia o se togiola mo agasala a tagata.” O lana faamatalaga o le taunuuga o lona faafitia o le manatu o le agasala ma se Faaola e tai tutusa lelei lava ma le talitonuga o le toatele i o tatou vaitaimi: “Ae e lelei a tagata taitoatasi ia i le olaga lenei e tusa ma le pulea e le tagata o ia lava; o lea e faamanuiaina tagata taitoatasi e tusa ma lona lava atamai, ma e manumalo tagata taitoatasi e tusa ma lona lava malosi; ma o soo se mea sa fai e le tagata e le o se solitulafono” (Alema 30:17; ua faaopoopo le faamamafa).
Manatu e Le A’ia’i le Sa’o ma le Sese
O aso nei ua tatou faaupuina ai le filosofia a Korioa e le a’ia’i le sa’o ma le sese. Ua faamatalaina faapenei e ni tagata fai manatu se toalua lena filosofia e faapea: “A oo mai i faafitauli e faatatau i amioga sa’o ma sese, e leai ni tali sa’o lele pe sese, leai ni faamasinoga le talafeagai pe talafeagai, ma leai ni auala tatau pe lelei e mafai ona faia ai ni faatusatusaga lelei e faaaoga i taimi uma, i nofoaga uma, ma i tagata uma.”2
O le talitonuga lenei o loo faaaoga e le toatele i auala masani o faasalalauga ma i tali i faatosinaga a tupulaga. “O ese mai tulafono ua leva. Fai le mea e te lagona e lelei. E leai se faamasinoga i tua atu o le tulafono a le tagata po o le faamalosi o le le fiafia o tagata lautele ia i latou ua maua.” I tua atu o na ituaiga manatu o loo i ai taumatega e faapea e le o i ai se Atua po o le, afai e i ai, Na te le’i tuuina mai ni poloaiga e faatatau ia i tatou i aso nei.
Faalelalolagi o Manatu o le Tagata
O le faafitia o se Atua e le o mafai ona faamaonia ma le teena o le sa’o ma le sese, e sili ona malosi i le lalolagi o aoaoga maualuluga atu. O le filosofia faalelalolagi e faamamafa ai tulaga faatonuina ma faitalia o tagata, o se lala o le tulaga o le tagata, ma atonu ua faaupuina faapea ona o le malosi o le ogatasi ma le faalelalolagi, ua faaaofia ai ma le iloa lelei pe faafuasei foi i aoaoga a faiaoga i le tele o kolisi ma iunivesite.
Mo tagata lolotu, o le elemene e teena i filosofia eseese a tagata e faatauaina gaoioiga ma le tulaga manuia o tagata, o lo latou le taliaina lea o le i ai o le Atua ma lo latou teenaina o amioga lelei atoatoa ua faavaeina i Ana poloaiga. O lea, na teena ai e le Humanist Manifesto i le 1973 “aiaiga masani o amioga lelei” ma “uiga masani e faavae i tala e le faamaonia ma valea po o tapuaiga e faatonu malosi e tuuina faaaliga, Atua, sauniga, po o le matape’ape’a e sili atu nai lo o manaoga ma aafiaga o tagata.” Na faapea mai foi, “E mafai ona tatou iloatino le leai o se faamoemoega faalelagi mo le tagata. … O tagata e nafa ma tulaga ua tatou i ai po o tulaga o le a avea ai i tatou. E leai se atua o le a laveaia i tatou; e tatau ona tatou laveaia i tatou lava.”3
Ioe, o e opogiina le filosofia o le faamamafaina o tulaga faatonuina ma faitalia o tagata soifua, ua latou faia ni saofaga lelei se tele. Mo se faataitaiga, ua latou lagolagoina le faatemokarasi, aia tatau o tagata soifua, aoga, ma le alualu i luma i mea o le olaga. Pau lava le mea a le vavaeesea e nei atinaega ia tagata talitonu, o le tatou atugaluga i tagata mo tagata [humanists], o le latou teenaina o le pule ma tulaga faatonuina faalelagi.
E pei ona tusia e le sa avea ma se polofesa o le filosofia i le BYU o Chauncey Riddle, “O le filosofia e faamamafa ai tulaga faatonuina ma faitalia o tagata, e faia ai se tagata ma atua, o le tagata maualuga, ae o le tagata poto e avea ma fautua o mea uma e moni, lelei ma matagofie.” Ua ia faamanatu mai foi ia i tatou, o le filosofia e faamamafaina tulaga faatonuina ma faitalia o tagata “e fiafia i faasalalauga lelei i le lalolagi i aso nei, aua o le toatele o le au tusitala, faatonu, ma le au faitofa ma tagata i ala o faasalalauga, e a lenei fegalegaleaiga.”4
O le toatele o e teena pe masalomia le i ai o le Atua atonu o le a le aveesea lea filosofia o le sa’o ma le sese e le o ni tulaga faatonuina mama. O le a latou vaai ia i latou lava ua i ai ni tulaga faatonuina o le sa’o ma le sese i tua atu, e ui o tulaga faatonuina atoatoa e le faavaea i le talitonuga i le Atua, e faigata ona faamalamalama. O tagata o le lalolagi o e aloaia le teenaina o “amioga faalelotu masani” ma folafola atu lo latou faalagolago i “suesuega o faamaoniga faasaienisi,”5 e foliga mai ua faataunuu ai se valoaga o le Tusi a Mamona e uiga ia i latou “sa ola e aunoa ma le Atua i le lalolagi” (Mosaea 27:31).
O le Ekalesia Tele ma le Inosia ma Isi “Ekalesia”
Ua faamatalaina e valoaga o le Tusi a Mamona le “ekalesia tele ma le inosia lea o le lalolagi atoa, o lona faavae o le tiapolo” (1 Nifae 14:17). O lenei “ekalesia” ua valoiaina e “pule i luga o le lalolagi atoa, i totonu o atunuu uma, ituaiga gagana ma nuu” (1 Nifae 14:11). Ua ta’ua “ua sili ona inosia i isi ekalesia uma,” o lenei foi ekalesia ua faapea mai e galue “mo viiga o le lalolagi” i le aumaia “o le au paia a le Atua … i lalo i le faatagataotauaina” (1 Nifae 13:5, 9).
Talu ai e leai se aulotu—Kerisiano pe e le Kerisiano—na “pule” i atunuu uma o le lalolagi po o le gafatia foi e aumai ai le au paia a le Atua i lalo i le “faatagataotauaina,” o lenei ekalesia tele ma le inosia o se mea e sili atu ona taatele ma salalau solo nai lo o se “ekalesia” e tasi e pei ona tatou malamalama ai i lena upu i aso nei. Atonu la o soo se filosofia po o se faalapotopotoga e tetee i le talitonuga i le Atua. Ma o le “faatagataotauaina” lea e taumafai lenei “ekalesia” e aumai i ai le au paia, o le a le tele foi se taofiofiga faaletino e pei o le faatagataotauaina o manatu sese.
Na tau atu ia Nifae e ala i se faaaliga, e na o le “lua lava ekalesia”: “o le ekalesia a le Tamai Mamoe a le Atua” ma le “ekalesia a le tiapolo” (1 Nifae 14:10; tagai foi i le 13:4–6). O lenei faamatalaga ua ta’u mai ai le eseesega i le va o i latou o e talitonu i le Atua ma saili e auauna atu ia te Ia e tusa ai ma le lelei o lo latou malamalamaaga, ma i latou o e teena le i ai o le Atua (tagai i le 1 Nifae 14:10).
O isi aoaoga i le Tusi a Mamona o loo faaaoga ai foi le upu ekalesia e faailoa ai le talitonu po o le le talitonu i le Atua. O mataupu mulimuli o le 2 Nifae o loo valoia mai ai e faapea, i aso e gata ai o le a faatutu a’e e Nuuese “ekalesia e tele” o le a “tuu i lalo le mana ma vavega a le Atua, ma ua latou talai aʼe mo i latou lava lo latou lava poto ma a latou lava aoaoga, ina ia mafai ona latou maua ai oloa” (2 Nifae 26:20). Ua latou ta’u mai e uiga i “ekalesia ua ati a’e a ua le ati a’e i le Alii” (2 Nifae 28:3), o le a “aoao atu e tusa ma lo latou poto” ma “teena le mana o le Atua” (2 Nifae 28:4, 5). O le a latou “fai atu i tagata: Faalogo mai ia te i matou, ma ia outou faalogo mai ia matou mataupu; aua faauta, ua leai se Atua i aso nei” (2 Nifae 28:5).
I le galuega a le Faaola i sa Nifae, sa Ia lapatai atu e uiga i se ekalesia e le o “atiae i luga o la’u talalelei, [ae] ua atiae i luga o galuega a tagata, po o luga o galuega a le tiapolo” (3 Nifae 27:11; tagai foi i le aoaoga e uiga i le “fale tele ma le ateatea” i le 1 Nifae 8:26–33; 11:35; ma le 12:18). E le o faatapulaaina nei lapataiga i faalapotopotoga faalelotu. I tulaga o o tatou aso, o loo aofia ai le tele o filosofia ma gaoioiga faalelalolagi.
III.
E toatele tagata e talitonu i le Atua ma le sa’o ma le sese o loo i ai ona o le aafia o Ana poloaiga i faalumaluma ma taufaifaiga mai aoaoga a le lalolagi ma le teenaina o le Atua lea e tupu i le tele o faalapotopotoga, e aofia ai faalapotopotoga faaleaoaoga ma ala o faasalalauga. O na luitau na valoiaina o loo fetaiai ma se numera faaitiitia o tagata e matatau i le Atua, o e tutusa o tatou talitonuga i le Atua ma le i ai o le sa’o ma le sese ona o Ana poloaiga. O lenei mea ua toe tupu ai foi le mea na i ai i le taimi o le Faaola.
E tusa lava pe o tatou “puapuagatia i mea uma,” ae “e le faaatuatuvaleina” (2 Korinito 4:8). Ua tatou iloa o lo tatou tuputupu ae faaleagaga e manaomia ai “se faafeagai o mea uma” (2 Nifae 2:11). Ua tatou iloa foi o le Alii, “ua silafia ua tatau ona aoai i lona nuu; ioe, na te tofotofoina lo latou onosai ma lo latou faatuatua’ (Mosaea 23:21).” Ae ua aoao mai foi tusitusiga paia, o le a Ia laveai i latou o e faalagolago ia te Ia (tagai i le 1 Samuelu 17:37, 45–46; Salamo 34:22; Faataoto 3:5–6; Alema 36:27; 38:5).
O le a ou fautuaina atu ni mea se tolu e mafai ona tatou faia e tali atu ai i tulaga o i ai nei, e amata atu i le mea e sili ona faigofie. O nei mea uma e tali atu ai i se aoaoga maoae o le Tusi a Mamona e faapea, e tatau ona tatou “tutu o ni molimau a le Atua i taimi uma ma i mea uma, ma i nofoaga uma atonu [tatou te] i ai, seia oo lava i le oti” (Mosaea 18:9).
Ava i le Suafa ma Musumusuga a le Atua
Ua aoaoina i tatou ia “talitonu ia Keriso, ma le teena o ia” (2 Nifae 25:29); ia “vaai atu ia [Keriso] i mafaufauga uma; aua le masalosalo, aua le fefefe” (MF&F 6:36); ma ia “tautalatala e uiga ia Keriso,” “olioli ia Keriso,” ma “talai atu Keriso” (2 Nifae 25:26). O auala e lua e mafai ona tatou faia ai lenei mea o a tatou tatalo patino ma i a tatou faafeiloaiga faaletagata lava ia.
I a tatou tatalo faaletagata lava ia ma faaleaiga, e tatau ona tatou ole atu i le Atua e fesoasoani ia i tatou ma o tatou tuaoi ma taitai ia iloa le Atua lo tatou Foafoa ma le sa’o ma le sese ua faavaeina e Ana poloaiga. E tatau ona tatou faia lenei mea mo le manuia o Ana fanau i soo se mea.
E tatau foi ona tatou tetee atu i le sitaili o aso nei, o le taofia o le talanoa i mea faalelotu e oo lava i talanoaga patino. I tausaga e le’i mamao atu, ua toetoe lava a mou atu le aofia ai o faailoga ma upu faaaloalo i feofoofoaiga o le Kerisimasi ma kata o faamaisega. A tatou faia filifiliga e uiga i nei ituaiga o fesootaiga, e le tatau ona tatou auai i le titinaeseina o faamanatu paia mai a tatou fesootaiga patino. I le avea ai ma ni tagata talitonu, ua i ai sa tatou tiute e faasaosao le suafa ma musumusuga a le Atua ma Keriso i a tatou talanoaga, o tatou olaga, ma la tatou aganuu.
Faailoaga Faalauaitele o Faamanuiaga a le Atua
Lagolago faailoaga faalauaitele o faamanuiaga a le Atua. O lenei faiga e taumafai ai e tetee i le faaitiitia o le ta’uaina o talitonuga faalelotu ma le faatatau atu i le Atua ma Ana faamanuiaga i a tatou aoaoga faalauaitele. Mo se faataitaiga, faatusatusa ia pepa o faamatalaga lautele o loo i ai nei ma gagana faatauanau ae faaoleole a taitai o le malo a le Iunaite Setete ma pepa o faamatalaga talitutusa ma upu a taitai i le vaitaimi o seneturi muamua e lua a Amerika. I lena faatusatusaga o le a e maua ai le faamaoniga o taumafaiga iloa lelei e aveese i fafo faatatauga i le Atua ma le faatosinaga a tapuaiga i le faavaeina ma le faasaosaoina o Amerika.
O le a la se mea e mafai ona tatou faia i ai? Muamua, e mafai ona tatou faia le faataitaiga sa’o i aoaoga i o tatou aiga ma le Ekalesia e ala i le faailoaina o faamanuiaga a le Alii i o tatou olaga ma i o tatou atunuu. Ina ia faia lenei mea “i le poto ma le faatulagaga lelei” (Mosaea 4:27), e le tatau ona pei tatou te teena o o tatou atunuu o loo aofia ai ma ua faamanuiaina i tagatanuu o Iutaia, Mosalemi, ma isi faamalosiauga e le Kerisiano, faapea foi mai le au faapaupau. Ae e tatau ona tatou tautatala ma le sa’o e uiga i le mea moni e faapea, mo se faataitaiga, o le Iunaite Setete o Amerika sa faavaeina e tagata ma taitai o e sa avea o ni Kerisiano malolosi ma o e na faavaeina mataupu faavae o o latou faatuatua i le Faavae, tulafono, ma le aganuu a le malo.6
O se tala lata mai nei na tusia e Brother Clayton Christensen, o le polofesa i le Aoga Faapisinisi a Harvard ma sa avea ma Fitugafulu Eria, o loo tautino mai ai o tapuaiga o le faavae o le faatemokalasi ma le faamanuiaina. Ua ia faamanatu mai o le faatemolakasi ma le faaletupe e faalagolago uma i se fua-tele o le usiusitai i le le mafaamalosia ma o lenei tulaga manaomia e faalagolago i tapuaiga e aoao ai mea taua e pei o le “tutusa o tagata, o le taua o le faaaloalogia o meatotino a isi, ma le faamaoni ma le amiosa’o o le tagata lava ia. O le faalelalolagi, lea e tausinio e aveese tapuaiga e talitonu i se Atua o le foafoa, e leai sona paoa po o se polokalama e tuuina mai ai le mea ua ta’u e Brother Christensen “o le faavae manaomia o le usiusitai tele i le le mafaamalosia.”7
Finau mo le Faatinoina Saoloto o Tapuaiga
Finau mo le faatinoina saoloto o tapuaiga. E faigata atu le tulaga lenei ona e manaomia ai se faatinoga tuufaatasi a tagata talitonu o tapuaiga eseese. O nofoaga e mautinoa o i ai le faatagaga a le malo e saoloto ai le faia o tapuaiga, e tatau ona tatou finafinau malosi i taitai o malo e faamamalu na faamautinoaga. O i o le a ou faamamafa atu ai na o ni faataitaiga se lua o atugaluga o loo i ai nei.
O le muamua e aafia ai tatalo i nofoaga faitele. O tatalo e fai pe a ta’ua e tagata le Atua Paia, po o le a lava lo latou aoaoga e uiga i le Atua ma pe faapefea foi ona latou filifili e faatatau atu ia te Ia. E tusa lava po o le a le faiga o se tatalo, lea o le a eseese e tusa ai ma le talitonuga o le tagata o loo tatalo, a faia se tatalo i se nofoaga faitele, e taua i le avea ma se tautinoga po o se faailoga o le faalagolago uma o se vaega i le, ma faaaloalo mo le Atua. O le natura lenei o tatalo e faia i le amataga o fono faitulafono po o fonotaga faamaopoopo ma i tautoga e faia e taimua ai molimau i faamasinoga po o faatautoga aloaia. Po o le a lava le manatu ua filifilia mo tatalo i le Atua ma po o le a foi ona uunaiga faalelotu po o le gagana o le tatalo, ou te faamoemoe o le a tatou molimauina lo tatou talitonuga i le Atua e ala i le faailoga o le tatalo, na faia ma le poto ma le onosai. O le mea lena e aoga ona finau i ai.
Lona lua, e tatau ona tatou mataala e tetee i taitai o malo ma faufautua i aiaiga mo le lautele, o e fautuaina atu o le faatinoina saoloto o tapuaiga e tapulaa i le “saolotoga o tapuaiga.” Mo se faataitaiga, i le Iunaite Setee, o le faamautinoaga o le “faatinoga saoloto” e puipui ai aia tatau e o mai ai i fafo mai o tatou nofoaga patino, e aofia ai falesa, sunako, ma malumalu, ina ia faatino o talitonuga, e faatatau lea i le aoga o malosiaga faalemalo e manaomia e puipuia ai le soifua maloloina, saogalemu ma le manuia lautele. O le faatino saoloto e mautinoa lava e puipuia ai tagatanuu lolotu i le galueaina o o latou talitonuga i le finauina o aiaiga lautele ma i palota e faia i le avea ai ma tagatanuu po o au faitulafono.
E pei ona saunoa ai Elder Jeffrey R. Holland o le Korama a Aposetolo e Toasefululua, i se saunoaga matagofie i se au faafofoga i le atunuu atoa o taitai Kerisiano, o i matou o le Au Paia o Aso e Gata Ai e “naunau lava ia tatou uulima faatasi … ia faamautinoa le saolotoga o tapuaiga o le a mafai ai e i tatou uma ona tautatala atu [ma faataunuuina] ia mataupu faavae faaKerisiano e faatatau i faafitauli faaleagafesootai o o tatou aso.”8
E manaomia ona tatou lagolagoina le soofaatasi o taitai faalelotu ma tagata e matatau i le Atua, o e ua o mai faatasi e puipuia aganuu masani o le talitonu i le Atua ma le faailoaina atu o Ana faamanuiaga.
IV.
I le faaiuga, ou te fautuaina tagata talitonu uma i soo se mea lava, ua i ai sa tatou tiute paia faalelotu ia avea ma molimau o le Atua. E tatau ona tatou faamautuina o tatou talitonuga faalelotu, tutufaatasi e finafinau atu i luga o a tatou aia tatau i le faaaogaina saoloto o a tatou tapuaiga, ma faamamalu o latou tiute taua i le faavaeina ma le faasaosaoina ma le faamanuiaina o malo.
Ou te faamanatu atu o’u uso a Kerisiano i le aoaoga mamalu a le Aposetolo o Paulo:
“A’o agaga uma o e e le tautino ua maliu mai Iesu Keriso i le tino e le mai le Atua i latou: o lo le anetikeriso lava lenei, ua outou faalogo i ai o le a sau; o loo i ai nei lava i le lalolagi” (1 Ioane 4:3).
O le taunuuga o lo tatou le tautatala atu o ni molimau o le Atua, o loo manino lava i le aoaoga a le Faaola e uiga i le masima ua mai. O le faafefiloi ma isi mea—e pei lava ona mafai ona faavaivaia i tatou e tulaga faatonuina o le lalolagi—e aveese ai le faatosinaga tulaga ese i tagata eseese e toatele. E pei ona aoao mai le Faaola, “E leai se mea e toe aoga ai, na o le lafoaiina i fafo, ma soliga e tagata” (Mataio 5:13).
I le avea ai ma “masima o le lalolagi” (Mataio 5:13), o i tatou o le Au Paia o Aso e Gata Ai e tatau ona faatumauina lo latou tofo e ala i le ola i la tatou tapuaiga ma ia tautino atu i tatou lava o ni molimau a le Atua. A tatou faia faapea, ua tatou fegalegaleai ma i latou o e o la e fiafia i le manumalo mulimuli o le upumoni ma le amiotonu, i le taimi e “tootuli … tulivae uma lava, e ta’uta’u mai foi o laulaufaiva uma lava i le Atua” (Roma 14:11) ma i le Alii o Iesu Keriso, o le tatou te tapuai i ai ma o ana auauna i tatou.