O Mea na Ou Aoaoina na Suia ai Lo’u Loto

Darcy Logan, Alaska, ISA

Ina ua mavae le maliu o le ma atalii e 18 tausaga le matua o Jaxon, sa ou manatunatu loloto i le tulaga ma le faasinomaga o lo’u olaga. Ua i ai sa’u tama i le faavavau, ma na i ai so’u faanaunautaiga malosi ia ou ola i se auala ina ia i ai se aso matou te toe fiafia ai i la matou sootaga faaleaiga. Sa ou manao foi ia ou malamalama lelei i tusitusiga paia ina ia mafai ona latou taialaina ai lo’u olaga.

Ou te le o mautinoa lelei po o anafea na amata le naunau i ai o lo’u loto, ae sa faaosoina e le faamoemoe o le toe vaaia o le ma atalii. A’o ou faitau i le Tusi a Mamona, sa amata ona ou matauina auala na faaaoga faafaatusa ai le loto o le tulaga o le olaga o se tagata po o se taitaiga po o se tulaga o se nuu.

O taimi uma lava e ta’ua ai le loto, pe maaa pe faamaluluina, ou te faia ai se fatu laitiiti lanumumu i tafatafa o le fuaiupu. Sa amata ona ou vaaia ni mamanu. Ina ua faamaluluina loto o tagata, sa latou maua le malosi e taulima ai faigata, na faateleina lo latou alolofa i isi, ma sa latou agalelei ma agamalu sili atu. Na ou aoaoina o le salamo o le mea lena e suia ai loto a’o tatou valaau atu i le Faaola ma Lana taulaga togiola.

Sa ou fiafia i se faigamalaga matagofie i le Tusi a Mamona. O mea na ou aoaoina na suia ai lo’u loto, lea ua suia ai lo’u olaga. O mea na ou aoaoina ua fesoasoani foi ia te a’u i la’u matata faalegaluega a’o o’u lagolago atu i ulugalii e ala i o latou luitau. Ua oo ina ou malamalama ai e mafai ona ou aoaoina ma faamanatu atu i ulugalii e uiga i mataupu faavae masani lea e aumaia ai le faamalieina faaleulugalii ma le felata’i moni. Ae seiiloga la te aumaia se loto faamaluluina i la laua faaipoipoga, e laitiiti lava se avanoa mo le suiga e tupu ai pe tumau ai.

Talu mai le taimi na ou faia ai fatu i tafatafa o fuaiupu o la’u Tusi a Mamona, ua ou toe foi soo ai e toe faitau na fuaitau ma faaauau ai ona aoao mai na fuaiupu. Ua ou mauaina foi ni fuaitau fou e ta’ua ai le loto lea na ou misia i le faitauga muamua, lea e faamanatu mai ai o le a i ai i taimi uma se mea fou i tusitusiga paia e aoaoina, malamalama ma faaaoga.

Ae o le mea e sili ona taua, ua faamanatu mai ai ia te a’u le alofa o lo’u Tama Faalelagi ma lo’u Faaola. Ona o lena alofa, o le a ou faatasi ai ma lo’u aiga e faavavau. Ua ou iloa lenei mea ma lo’u loto atoa, lea ou te matuai faafetai ai lava.