Ataata
Tamamatua, Tama
Ata na saunia e Bjorn Thorkelson
Vaai faalemafaufau i ni faifeautalai e 3,000 o faapotopoto i totonu o se potu tele. O le lua afe ivaselau ivasefulu ma le iva o i latou o loo talanoa fiafia ma tilotilo atu i le itu e tasi o le potu. O nisi o loo tutu tetee i o latou tamatamaivae. O nisi o loo tulioso i luga ia maua sina vaaiga vave i luga a’e o i latou o loo tutu tetee. O nisi o loo tutu i luga o nofoa faamomoe. E toatasi le faifeautalai o loo saofai i luga o se nofoa faamoe, o loo tuu ona tulilima i luga o ona tulivae, tuufaatasi ona lima, ma punou lona ulu.
Atonu e le o le mea tonu lena na tupu, ae o le tulaga lena o loo o’u manatuaina ai. O le tulaga lena na ou lagonaina. O a’u lena o le faifeautalai e toatasi.
A’o e vaai faalemafaufau i le vaaiga, atonu e te manatu sa tuua na o a’u pe sa faanoanoa foi. O le mea moni, sa ou oo i se tasi o taimi na sili ona fiafia o lo’u olaga—o se taimi na ou fiafia e toe manatua pea i le tele o taimi talu mai lena aso.
Sa ou i ai i le nofoaga autu e aoao ai faifeautalai i Provo, Iuta, e sauniuni ai e auauna atu o se faifeautalai faamisiona i le Misiona a Ekuatoa Quinto. Sa susu mai Peresitene Gordon B. Hinckley (1910–2008), o le sa avea ma Fesoasoani Muamua i le Au Peresitene Sili, e saunoa mai i faifeautalai uma i le NAF.
O le maea o le fonotaga lea na amata ai le vavao. Sa ou matauina sa le’i lolofi atu tagata i faitotoa, o lea na ou fesili ai i le isi alii faifeautalai po o le a le mea na tupu.
“O le atalii o le atalii o Peresitene Hinckley o loo iinei i le NAF,” o lana tala mai lea, “ma faatoa tuua lava e Peresitene Hinckley le tulaga ina ia fusi atu ia te ia!”
Faatasi ai ma lena faamalamalamaga, na tu ai le alii faifeautalai i luga o lona nofoa ina ia iloa lelei atu ai, ma sa alaga faapea, “Oka! Pe e le o se mea matagofie ea le avea o Peresitene Hinckely ma [sou] tamamatua?
Ou te alofa ma faaaloalo ia Peresitene Hinckely, ma sa musuia a’u i lana savali i lena aso. Ae i lena taimi, sa taia a’u i se manatu lea na oo ai ina ou saofai i luga o lo’u nofoa nai lo o le tu ai luga. I le ogatotonu o lena tiotioga fiafia, sa ou saofai filemu ai ma mafaufau, “Ou te mautinoa o le a matuai manaia le avea o Peresitene Hinckley ma [sou] tamamatua. Ae o le a ou le faafesuia’ia lo’u Tamamatua o Felt po o lo’u Tamamatua o West mo ia.” Sa ea a’e lo’u ulu ma lagonaina le lagona mafanafana o le agaga faafetai a’o ou tomanatu i lo’u tupuaga, lo’u aiga.
Ona oo mai lea o se isi manatu, e sili atu le malosi nai lo o le muamua: “Ma le isi mea, o a’u o le atalii o le Atua.” Sa ou iloaina, o le atalii o se atalii o se fa’inifo ma se supavaisa i se falegaosi oloa, na tutusa lava le taua ma le avea o se atalii o se atalii o se perofeta. Aisea? Aua o i ma’ua e toalua e tasi lava lo ma Tama oi le Lagi.
Mulimuli ane, na savavali atu ai isi faifeautalai e 2,999 agai i faitotoa o lena potu tele. Sa ou auai atu faatasi ma i latou, ua sili atu ona saunia e auauna atu i le Alii nai lo o le mea sa ou i ai i ni nai minute na muamua atu.