Pipii Mau i le Ai Uamea
Saunia e Elder Ulisses Soares
O Le Au Peresitene o Fitugafulu
Mai se saunoaga i le faigalotu Becoming a Work of Art,” a le Iunivesite o Polika Iaga–Idaho i le aso 5 Nov. 2013. Mo le tusiga atoa i le gagana Peretania, asiasi i le speeches.byu.edu.
Afai e faaaoga o tatou faatuatua ma usitai ma le maelega i poloaiga a le Alii, o le a faigofie atu ona tatou filifilia le mea sa’o.
Ata na tusia e Katie Payne
A o aoga se tagata lelei o le Ekalesia ou te masani ai i le kolisi, sa valaaulia o ia i se pati i le po o se Aso Toonai i le fale o se tasi sa la vasega. Sa valaaulia ai foi ma polofesa o le kolisi a la’u uo, ae maise o i latou sa fiafia i tagata aooga. O le pati sa foliga manaia ma saogalemu.
Ae peitai, ina ua taunuu atu la’u uo, sa vave ona ia iloaina, e le o le siosiomaga lea sa ia faamoemoeina. O tagata aooga sa inupia, ulaula, faaaoga fualaau oona, ma fai ni mea leaga i tulimanu uma o le fale. Sa popole o ia ma tonu ai loa e tuumuli, ae peitai sa mamao le mea na fai ai le pati mai lona fale. Sa maua mai lana lifi i ana uo, o lea sa leai ai se auala e toe foi atu ai na o ia.
O le taimi lena na tatalo lemu ai i le Alii, ma ole atu mo se fesoasoani. Ina ua uma ona mafaufau loloto, sa ia lagonaina e tatau ona alu i fafo. Sa ia mulimuli i ona lagona ma nofo ai i fafo o le fale seia oo ina uma le pati.
A’o malaga atu i le fale, sa talanoa ana uo e uiga i mea leaga na tutupu i le taimi o le pati. Sa le lagolelei lagona o la’u uo i lea tulaga. Sa le faigofie ona ia onosaia.
Ae peitai, Ina ua ai ma inu o ia i le faamanatuga i le aso na sosoo ai i le lotu, sa ia lagona le toafimalie, filemu, ma le mautinoa sa ia faia le faaiuga sa’o. Sa ia iloaina le uiga o le uumau i le ai uamea ma aua ne’i faamamulua, e tusa lava pe a i ai i le puao o le pogisa. Sa ia malamalama lelei i le mea na aoao atu e Nifae i ona uso ina ua ia fai atu, “ma ai se e faalogo i le afioga a le Atua; ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga” (1 Nifae 15:24).
Mafaufau i le mea e ono tupu, pe ana faapea na matamuli lena alii talavou, ma le lava ai lona malosi e pipii mau ai i le ai uamea. O se taunuuga o lenei ma isi filifiliga i lona olaga, ua faaipoipo atu ai i se tamaitai talavou i le malumalu, atinae se aiga amiotonu, ma avea ma se tagata faamanuiaina. O loo auauna atu o ia ma le faamaoni i le Ekalesia i le taimi nei ma taumafai lava ia avea ma se faataitaiga lelei mo lana fanau.
O Le Tagata Natura
E le faigofie le fetaiai ma tofotofoga i aso uma. Tatou te i ai uma i se siosiomaga e le fiafia i le talalelei a Iesu Keriso. Ua tatou ola i se lalolagi ua faaitiitia ma osofaia ai le mama. Ua valaaulia i tatou e ala i faasalalauga ma le tekinolosi e auai i gaoioiga faataumaoi ma faatafuna olaga ia e tetee i o tatou talitonuga ma tulaga faatonuina o le talalelei a Iesu Keriso. O faatosinaga mai uo o e e le tutusa o tatou tulaga faatonuina, po o e tutusa o tatou tulaga faatonuina ae e vaivai i lo latou faatuatua, e uunaia ai i tatou e auai i amioga faatufanua. E le gata i lea, e tatau ona tatou feagai ma le tagata o le lalolagi lea e i totonu o i tatou taitoatasi.
O Taiala i Tusitusiga Paia o loo faauigaina ai le tagata natura “o se tagata e filifili ina ia faatosinaina e tuinanau, manao, ma mea e faamemelo i ai le tino nai lo o uunaiga a le Agaga Paia. O se tagata faapena e malamalama i mea faaletino ae le o mea faaleagaga. … E ao i tagata taitoatasi ona toe fanaufouina e ala i le togiola a Iesu Keriso ina ia tuu ai le avea ma se tagata o le lalolagi.”1
E masani ona sii mai e Peresitene Thomas S. Monson se agaga faigofie e fesoasoani tatou te aloese ai i faasalaveiga o faaosoosoga ma faatumau ai pea ona tatou o i le ala sa’o: “E le mafai ona e sa’o i le faia o le mea sese, e le mafai ona e sese i le faia o le mea sa’o.”2
Afai e faaaoga o tatou faatuatua ma usitai ma le maelega i poloaiga a le Alii, o le a faigofie atu ona tatou filifilia le mea sa’o.
O Le Malamalama o Keriso
Na aoao e le Perofeta o Mamona lona nuu:
O le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.
“Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafiti o ia, ma ia le auauna i le Atua, ona outou iloa lea ma le malamalama atoatoa ua mai le tiapolo; ona o le ala lea e galue ai le tiapolo, aua e le faatauanauina e ia se tagata ia faia le lelei, e leai, e leai lava se tasi; pe faia foi e ana agelu; pe faia foi e i latou o e latou te tuu atu i latou lava ia te ia” (Moronae 7:16–17).
Ua tuuina mai e lo tatou Tama Faalelagi ia i tatou le Malamalama o Keriso, o le “malosiaga faalelagi, mana, po o le uunaiga e mai le Atua e ala ia Keriso ma e tuuina mai le ola ma le malamalama i mea uma.”3 E fesoasoani i se tagata e filifili i le va o le sa’o ma le sese. O le meaalofa, e o faatasi ma le mafutaga a le Agaga Paia, e fesoasoani ia i tatou e iloilo ai po o se filifiliga e tuu ai i tatou i le teritori a le Alii po o tua i le autau a le fili. Afai e lelei la tatou amio, o loo musuia i tatou e le Atua. Afai e leaga la tatou amio, o loo faatosina i tatou e le fili.
Na faaaoga e la’u uo i le kolisi ia nei meaalofa e lua. O le Malamalama o Keriso na fesoasoani ia te ia e iloa ai le mea sa’o, ae o le Agaga Paia na taialaina lana filifiliga po o le fea le ala e mulimuli ai. O nei meaalofa e lua e avanoa mo i latou o e pipii mau i le ai uamea.
O Le Meaalofa o le Salamo
Sei o tatou vaai faalemafaufau e faapea, tatou te le iloa le mafuaaga ua faaseseina ai i tatou pe fenumiai ai i faaosoosoga ma iu ai ina solia le agasala. O le a se mea e tatau ona tatou faia? Afai tatou te pauu atu i le faaosoosoga ma le agasala, e tatau ona tatou toe faalelei ma le Atua. I le gagana o tusitusiga paia, e ao ona tatou salamo.
Ua aoao mai Elder Neil L. Andersen o le Korama a Aposetolo e Toasefululua:
“A tatou agasala, ua tatou liliu ese mai le Atua. A tatou salamo, ua tatou toe liliu atu i le Atua.
“O le valaaulia e salamo e seasea lava o se leo o le aoaiga ae o se talosaga alofa e toe liliu ma ia ‘toe-foi’ atu i le Atua [tagai i le Helamana 7:17]. O le augani mai a se Tama agalelei ma Lona Alo Pele e Toatasi ia tatou sili atu nai lo le tagata o tatou i ai, ia aapa atu i se ituaiga olaga maualuga atu, ia sui, ma ia lagona le fiafia i le tausiga o poloaiga. O le avea ai ma soo o Keriso, tatou te fiafia ai i faamanuiaga o le salamo ma le olioli o le faamagaloina. E avea ma se vaega o i tatou, e mamanu ai le ala tatou te mafaufau ma manatu ai.”4
O le salamo o se meaalofa matagofie e avanoa i tagata uma o e mananao e toe foi atu i le Atua ma faataga o Ia e mamanuina o latou olaga.
Sa tatou fananau mai ma fua o le faavavau i o tatou agaga aua o i tatou o fanau a le Atua. E tatau ona tupu lenei fatu. E tupu pe a tatou faaaoga lo tatou faitalia i le amiotonu, a’o tatou faia faaiuga sa’o, ma a’o tatou faaaogaina le Malamalama o Keriso ma le Agaga Paia e taiala i tatou i faaiuga tatou te faia i le aluga o o tatou olaga. O lenei faagasologa e umi se taimi e fai ai, ae e mafai ona mamanuina ai o tatou agaga ma o tatou olaga mai i le aso muamua i le isi.
O le faailoa atu o lo tatou tuuto ma le maelega, o le a foai mai ai e le Alii ia i tatou ia mea ia na le mafai ona tatou mauaina. O le a ia mamanuina i tatou ona e Na te silafia a tatou taumafaiga e faatoilalo o tatou le atoatoa ma vaivaiga faaletagata.
I lena tulaga, o le salamo e avea ma se vaega o o tatou olaga i aso uma. O lo tatou fetagofi atu i vaiaso uma i le Faamanatuga—ia o mai ma le agamalu, lotomaualalo, i luma o le Alii, ma faailoa atu lo tatou faalagolago ia te Ia, ole atu ia te Ia e faamagalo ma faafou i tatou, ma folafola atu ia manatua pea o Ia—e matuai taua tele.
O nisi taimi i a tatou taumafaiga i aso taitasi ia avea atili e faapei o Keriso, tatou te tauivi ai pea lava pea ma faafitauli lava e tasi. E pei lava sa tatou feaei i se laau na sio i se mauga. E i ai taimi tatou te le iloa ai lo tatou alualu i luma seiiloga tatou te latalata atu i le tumutumu ma toe vaai ifo ai mai tumutumu mauga maualuluga. Ia aua le lotovaivai. Afai o loo e taumafai ma galue ia salamo, ua e i ai i le faagasologa o le salamo.
Na saunoa Elder D. Todd Christofferson o le Korama a Aposetolo e Toasefululua e faapea, “O le faatoilaloina o mausa po o ‑vaisu leaga, e masani lava o lona uiga o se taumafaiga i le aso ona sosoo ai lea ma le isi ma le isi, atonu e moni ni aso se tele, po o ni masina ma ni tausaga, seia oo ina tatou ausia le manumalo.”5
A o tatou agai i luma, ua sili atu ona manino la tatou vaai i le olaga ma lagona le malosi atu o le galue o le Agaga Paia i totonu ia i tatou. Mo i latou o e ua salamo faamaoni ae e foliga mai e le o mafai ona lagona le toomaga, ia faaauau pea ona tausi poloaiga. Ou te folafola atu ia te outou o le a oo mai lena toomaga i le taimi lava a le Alii. O le faamaloloina e manaomia ai le taimi.
Ia tatou faatumauina se vaaiga e faavavau e ala i le faatoilaloina o le tagata o le lalolagi, faamasino e ala i le Malamalama o Keriso, saili le taitaiga mai le Agaga Paia, salamo pe a tatou faia se mea sese, ma faataga lo tatou Tama Faalelagi e suia o tatou olaga i le mea ua Ia fuafuaina mo i tatou.