O Seevae Selesitila a La’u Soa
Michael Reid, Arisona, ISA
I tausaga ua mavae, ina ua ou tuua le Nofoaga e Aoaoina ai Faifeautalai i Provo, sa ou taunuu atu i Florida ma le lagona saunia ma le fiafia e amata i totonu o le misiona. Ina ua ou feiloai i la’u soa fou, sa tele ni mea sa ma fiafia i ai na tutusa ma na foliga mai le ma soa na fetaui lelei.
Ae peitai, ina ua mavae ni nai vaiaso, na faapea ona ou matauina ai ni eseesega. Mo se faataitaiga, sa ou sauni i aso uma ma te o e talai tuitui [i fale o aiga], ae sa tau le fiafia tele la’u soa e tuitui i faitotoa. O le mea moni, e ui lava o ia sa soa sinia, ae sa filifili lava na te le faia ni mea se tele.
Sa ou matauina foi sa pei na tele lava ina talanoa la’u soa e uiga ia te ia lava. Sa tulaga lelei lona aiga i mea tautupe, ma e tele ni aafiaga na ia oo i ai, ia ou te le’i oo i ai ona o o’u tulaga maualalo.
O nei mea na amata ona tutupu ai ni lagona faalelelei ia te a’u, lea na toetoe lava a oo i le tulaga o le inoino. O le i ai o le lagona inoino i la’u soa na aafia ai lo’u faaleagaga, ae maise lava a’o ou taumafai e aoao atu le talalelei. Na tatau ona ou faia se mea. O le taimi muamua sa ou mafaufau e talanoa atu i la’u soa ma ia faapa uma atu i ai o lo’u le fiafia. Ae sa ou filifilia se isi auala.
O taeao uma lava e auauai ai ona ma taeele ma la’u soa ma sauni mo le aso. A o i ai o ia i le faletaele, sa tonu ia te a’u ou te tolotolo atu i vae o lona moega ma faaiila ona seevae e uumi luma. A uma ona faamama vave ma polesi, ona ou toe tuua faalelei lea o ona seevae i le mea sa i ai. Sa ou faia lenei mea i taeao uma i le pe a ma le lua vaiaso.
I le taimi lea, na ou matauina ai ua amata ona aluese atu lo’u inoino. A o ou auauna atu i la’u soa, sa amata ona liua lo’u loto. Sa leai sa’u tala na fai atu ia te ia e uiga i la’u tama’i auaunaga. Ae peitai, i se tasi aso, na fai mai ai la’u soa, sa pei na faamanuiaina o ia i ni “seevae selesitila” ona sa foliga mai sa le’i palapala lava.
Sa ou aoaoina ni lesona maoae se lua mai lenei aafiaga. Muamua, sa ou aoaoina o le faafitauli moni lava sa i totonu o a’u lava—e ui lava o le mafuaaga o o’u lagona na sau mai fafo. Na lelei lava la’u soa.
Lona lua, sa ou iloaina e masani lava ona tatou auauna atu ia i latou tatou te alolofa i ai. Ae ou te le’i iloaina o lea lava mataupu faavae e aoga foi i le isi itu: e oo ina tatou alolofa ia i latou tatou te auauna atu i ai.