E Tatau ona E Tatalo
Jimy Saint Louis, Haiti
Ata na tusia e Bradley H. Clark
I le aso 12 o Ianuari, 2010, na faaali mai ai e le Tama Faalelagi ia te a’u Lona mana ina ua solofa ifo se fale sima fogafalefa faataamilo ma luga o a’u, ina ua mavae se mafuie leaga tele na olopalaina ai Haiti.
A’o ou tagi i lalo o le mamafa o mea na solo, na oo mai se leo toafilemu ia te a’u: “Jimy, aisea e te le tatalo ai nai lo o lou ee?”
Ae peitai, sa le mafai ona taofi lo’u ee, ona sa ou fefe o le a ou oti i totonu o ni nai minute. Sa toe tautala mai foi ia te a’u le leo, lea sa pei o se uo lelei na uunaia au e ala i le naunautai tele e fesoasoani mai: “Jimy, e tatau ona e tatalo.”
Sa oo ina le mafai ona [ou] onosaia le tiga o o’u vae, ma sa oo foi ina uma le okesene i le pogisa lea na siomia ai a’u. Sa toe oo tasi mai foi le leo: “Jimy, e tatau ona e tatalo.”
O le taimi lena na tuu ai loa lo’u tetee atu i ai. I se leo vaivai sa ou faapea atu ai: “Le Tama Faalelagi, ua E silafia lo’u malosi, ma ua E silafia le umi e mafai ona ou onosaia ai lenei tiga. Ou te ole atu i Lau Afio, faamolemole aveese lenei tiga mai ia te a’u. I le suafa o Iesu Keriso, amene.”
O le taimi lava na uma ai ona ou faia lenei tatalo faatauvaa, sa ou moe loa. Ou te le manatua le mea na tupu mulimuli ane ai, ae ina ua ou ala a’e mai se moe gapepe, ua aluese le tiga. O se taimi puupuu mulimuli ane, na maua ai a’u e le au laveai a’o latou sueina tagata na aafia i le faalavelave i mea na faaleagaina o lo’u ofisa.
Mulimuli ane, sa ou iloa ai mai le aufaigaluega e toalima o le fogafalelua o le fale o le Port-au-Prince lea sa ou faigaluega ai, sa na o a’u lava na aumai i fafo mai mea na faaleagaina na ola. Ona o o’u manuaga, sa aveese ai le tasi o o’u vae ma faaaluina ai ni nai masina i le falema’i. Ae ou te iloa na uunai a’u e le Agaga Paia e tatalo, ma na tali mai le Tama Faalelagi i lena tatalo.
E mafai ona ou molimau atu e tali mai le Tama Faalelagi ia tatou tatalo i Lana lava ala ma e tusa ai ma Lona lava finagalo—po o fea lava tatou te i ai ma po o le a foi le taimi tatou te tatalo atu ai.