Tatou te Talanoa ia Keriso
O Tofotofoga Uma e Mafai ona Aumaia ai le Faatuatua Faateleina
E alala le tusitala i Sardinia, Italia.
I le avea ai ma se tamaitiiti e fitu tausaga, ma ina ua ou iloaina na maliu lo’u tama i se faalavelave, sa ou tatalo ai mo se vavega.
A’o o’u laitiiti, o se tasi o vaega e sili ona ou fiafia i ai o le aso o le faatalitali lea mo le fo’i mai o lo’u tama i le fale mai le galuega. Ou te tilotilo atu i fafo o le faamalama ma iloa atu o ia o sau, ona ou faitauina lea o ana laa taitasi e agai mai i le fale, ma tulimata’i atu i le olioli na te aumaia. Ou te le’i mafaufauina lava o le a ou ola e aunoa ma lena lagona.
O se tasi o aso a’o fitu o’u tausaga, i le tulaga o lo’u tama sa sau ai se tamaloa ma ni foliga pau ma sa tu i le faitotoa ma ta’u mai ia i matou ua maliu lo’u tama i se faalavelave.
O lena aso sa ou sao. Sa ou tilotilo atu i lo’u tuagane e fa tausaga ma lo’u tina, sa talavou ma tuua toatasi, ma ou te le’i tagi. Ou te le’i manatu e ono mo’i, o lea sa ou alu ai i le faamalama ma sioa atu i le alatele. Sa amata ona ou lagonaina se mamafa tiga na taomia ai i lalo o’u tauau, o se avega sa le mafai ai ona ou manava e pei ona masani ai, o se avega na faapuapuagatiaina ai a’u.
E le’i leva ona uma le maliu o lo’u tama, sa ou alu atu toatasi i lo’u potu a’o mou malie atu le malamalama o le lagoto ma, e pei ona sa aoaoina ai a’u, sa ou tatalo atu i lo’u Tama Faalelagi. Sa ou augani atu ia te Ia ina ia ou toe vaai atu i lo’u tama peleina, tau lava ona ou fusi atu ia te ia. I totonu o lo’u loto, sa ou mautinoa e mafai ona tuuina mai e le Tama Faalelagi lenei vavega ia te a’u.
O lena aso, ou te le’i vaai i lo’u tama pe fusi atu foi ia te ia, ae na tele atu ni mea na tuuina mai ia te a’u. Sa pei na ou lagonaina aao o le Faaola i luga o o’u tauau. Sa pei uma lava na vaaia Lona i ai a’o Ia aveese atu le avega na mamafa mai i lo’u fatafata.
Ata na tusia e James Johnson
O le taimi nei, ua silia ma le 20 tausaga mulimuli ane, e le’i aluese lava lena mapusaga ma a’u. E i ai taimi ou te lagonaina ai le faanoaoa ae sa le’o le leai o se faamoemoe i le maliu o lo’u tama. E mafai ona ou toe tepa i tua ma iloa ai le tele o taimi na oo mai ai le Agaga e faamafanafana a’u, fesoasoani ia te a’u, ma faaali mai ia te a’u le ala e mulimuli ai i tulaga aao taua o le Faaola. E mafai ona ou lagona Lona i ai i lo’u olaga, e faafetai ai i lena tofotofoga muamua, lea ua fesoasoani ou te vaai atu ai i tofotofoga o aso uma i se vaaiga e faavavau. Ou te iloa o le talalelei i o tatou olaga ua mafai ai ona tatou lagona le milimili le vaaia o le aao o le Faaola.
Ua ou faaipoipo mo le faavavau, ma o le taimi nei ua ma maua ma lo’u toalua se fanau teine laiti e toatolu, o e e aumaia se tofo o le lagi i totonu o lo matou aiga. Pe a ou vaai atu ia i latou, ou te olioli i le filemu ma le malamalama e faapea, o faanoanoa uma, tofotofoga, ma luitau i o latou olaga e mafai ona aumaia faatasi ai ma le faatuatua faateleina, molimau fou, ma vavega matagofie. Ou te olioli i le mautinoa loloto e faapea, pe a latou manaomia se mea i tua atu o mea e mafai ona ma tuuina atu ma lo’u toalua ia i latou, o le a puipuia i latou, faamafanafanaina, ma faasaoina, e pei lava ona sa faia ia te a’u.