O Mea na Tatou Aoaoina mai i o Tatou Matua
Ua faasoa mai e le au talavou matutua auala o loo latou faaaogaina ai lesona ua latou aoaoina mai o latou matua.
Filiga e Galue
I lo’u aiga sa ou aoao ai e galue malosi. Sa faaaoga e lo’u aiga se faiga na matou ta’ua o le “lisi filiga.” I le amataga o le masina, matou te mauaina ai se lisi o feau eseese, e pei o le fufuluina o ipu, tausiga o solofanua, ma isi lava mea. Matou te maka faasa’oina ia feau pe a uma ona matou faia, ma a oo i le faaiuga o le masina, na tuuina mai ia i matou ni tupe mo a matou galuega filiga e faavae i le tele o maka faasa’o na i ai i luga o le siata. Mai lenei mea, ua ou aoaoina ai ia galue ma le filiga ma ia faautauta i mea tautupe.
Peter Stegeby o Västerbotten, Suetena
Tulaga Faamatua Amiotonu
I le avea ai ma se matua e toatasi, sa tele lava ni galuega a lo’u tina e fai, ae sa ia faaavanoaina i taimi uma se taimi e fesoasoani mai ai ia te a’u, faamafanafana a’u, pe tau lava o le faalogo mai ia te a’u. O le iloaina sa i ai o ia iina i taimi uma sa matuai taua tele, ma ou te manao e tuu atu foi lena mea i sa’u lava fanau i le lumanai.
Ina ua toe faaipoipo lo’u tina, sa filifili lona toalua fou e avea ma tama ia i ma’ua ma lo’u tuagane matua. I se taimi e le’i mamao mulimuli ane, na auai mai ai se uso laitiiti i le matou aiga, ae ou te le’i lagonaina lava sina eseesega i le alofa ma le agalelei sa ia tausia ai i matou uma e pei lava o lana lava fanau. E faafetai i ona uiga faaalia, na mafai ai e i ma’ua ma lo’u tuagane matua ona tutupu ae i se aiga malosi ma lotogatasi faapea ma le perisitua i totonu o le aiga. O le aso sa faamauina ai i matou o se aiga sa ese le faapitoa. O ana faataitaiga agalelei ua aoaoina ai a’u e faapea, o se tama e le na o se tulaga e i ai oe—o se tulaga e avea ai oe.
Amanda Cornelius o Stockholm, Suetena
Puipuiga Faalelagi
A’o ou laitiiti, sa faigaluega lo’u tama i se mea mamao ma o taimi uma lava e oo mai ai i le fale ae ua matuai pogisa. Ou te ala lava seiiloga e sau o ia i le fale. Ae i se tasi aso, sa matuai tuai mai ai lava, ma sa le mafai ona ou maua o ia i le telefoni. Sa matuai o’u fefe lava. Sa ou manatuaina na aoaoina a’u e o’u matua e tatalo e le aunoa ma ia ole atu mo se fesoasoani i soo se taimi ou te fefe ai, o lea na ou tootuli ai ma tatalo ina ia mafai ona foi saogalemu mai lo’u tama i le fale. Sa ou te’i, ona a’o faaiuiu la’u tatalo, sa ou faalogo atu i le pasika a lo’u tama i fafo. Sa matuai o’u faafetai i lo’u Tama Faalelagi mo le puipuia o lo’u tama.
I le avea ai ma se talavou matua, soo se taimi lava ou te le mautonu ai pe fefe, o le tagata muamua lava e oo mai i lo’u mafaufau o le Tama Faalelagi. Ou te iloa e faatasi mai e le aunoa o Ia ia te a’u ma e faafofoga mai o Ia i a’u tatalo.
Rohini Krishnan o Bangalore, Initia
Tatalo
I se tasi po na ou alu atu ai i le potu o o’u matua e fesili atu i lo’u tama e uiga i se mea, peitai, sa tootuli o ia i le tatalo, o lea na ou aluese ai ma toe foi mai i ni nai minute mulimuli ane ma maua atu o ia o loo i ai lava i lea tulaga e tasi. Sa ou filifili loa ou te sauni ou te moe, ma le manatu e mautinoa lava e oo ane i le taimi e uma ai ona tapena lo’u moega ua uma foi lana tatalo. Sa ou toe foi atu i le potu o o’u matua pe a ma le 10 minute mulimuli ane ma tau atu o loo tatalo pea o ia! O le vaaia o lena faataitaiga mai lo’u tama ua faamalosia ai la’u molimau. Sa sasaa moni atu lona loto i le tatalo i le Tama Faalelagi.
Jen Hansen o Idaho, ISA
Faaipoipoga i le Malumalu
Ou te faafetai ona sa faasoa mai e o’u matua le tala i le la mafutaga ia te a’u. Sa avea i la’ua ma se uo lelei i le 14 o o la’ua tausaga, ma sa la ola a’e ma aooga faatasi. I le aluga o taimi, na tuputupu a’e le la faauoga i le alofa moni, ma sa faaipoipoina i la’ua i le malumalu. Ua ou fuafua e mulimuli i faataitaiga a o’u matua o le faaipoipo i le malumalu ma e faamoemoe o le a ou maua foi le fiafia ma le alofa moni e pei ona la mauaina.
Pasăre Ana Maria o Prahova, Romania
O Se Aiga e Faatotonugalemu ia Keriso
O loo avea i taimi uma Iesu Keriso ma ogatotonu o le mafutaga a o’u matua. La’ua te taulai atu i le fatuina o se aiga e mafuta ai le Agaga ma tuu le faamuamua maualuga i le suesueina o tusitusiga paia, tatalo faaleaiga, ma afiafi faaleaiga.
Sa valaauina lo’u tina e faiaoga asiasi i se tina talavou o le sa feagai ma se tauiviga o se teteaga sa le’i mamao atu. Sa masani ona ou sau i le fale o vaai e lo’u tina le fanau tama laiti e toalua a lea tamaitai. O nisi taimi matou te afe ai i le fale o lenei tamaitai a’o matou o e faagasolo ni a matou fuafuaga, ma e tuu ai e lo’u tina se faamatalaga puupuu i le faitotoa. Ou te matuai faafetai i le faataitaiga a lo’u tina o le alofa mama “ e le sailia e ia ana lava” (Moronae 7:45).
E aoao i taimi uma o’u matua ma faaaoga o la’ua tomai fou ma malamalama e atinae ai le malo o le Atua. Ona o a la’ua faataitaiga, ua ou faia ai foi aoaoga ma se mea e faamuamua i lo’u lava olaga. O le faataitaiga a o’u matua ua taitaiina ai a’u e faaipoipo atu i se alii o le foi o loo i ai Iesu Keriso i le ogatotonu o lona olaga.
Rachel Nielsen o Iuta, ISA
Faalagolago Atu i le Tama Faalelagi ma Iesu Keriso
Toeitiiti o soo se mea lava e mafai ona lipea e lo’u tama. A’o ou talavou, sa ou fesili ai ia te ia pe na mafai faapefea ona ia toe faia lelei ni mea. Sa ia fai mai, “A’o le’i amata ona ou galuega, ou te faia se tatalo e talosagaina ai le Tama Faalelagi e fesoasoani mai ia te a’u. Ona faatoa ou galue loa lea. O lana faataitaiga ua aoaoina ai a’u ia lotomaualalo ma ia saili atu i musumusuga faalelagi.
Ina ua lagona e lo’u tina le lotovaivai, sa ia sailia le faamalologa ma le toafilemu i aao o le Faaola. Ina ua ou oo foi i ni taimi faapena, sa ia uunaia a’u ia ou mafaufau loloto i le mana o le Togiola. I le avea ai ma se talavou matua, e faaauau pea ona ou sailia le filemu ma le alofa mautinoa o le Faaola e ala i le mulimuli i ana faataitaiga amiotonu.
Isak Malm o Jönköping, Suetena
Amio Atua
A’o ou laitiiti na totoina e o’u matua i totonu ia te a’u le alofa mama mai lo’u Tama oi le Lagi. Na amata ona ou iloa o Ia a’o usuina mai e lo’u tina ia te a’u le “O Le Atua Lo’u Tama” (Viiga, nu. 184), ma i le aluga o taimi, o faataitaiga a o’u matua na avea ma o’u uunaiga sili na oo ina [ou] iloa ma alofa ai i lo’u Tama oi le Lagi e ala i auaunaga ma e ala i le auai faamaoni i sauniga ma gaoioiga a le Ekalesia.
Marlin Ortega Vásquez o Managua, Nicaragua