Pe a Alia’e Masalosaloga ma Fesili
E alala le tusitala i Georgia, ISA.
O fesili o se vaega taua o lo tatou tuputupu a’e e faavavau, ma o le sailiga mo tali i le auala a le Alii e mafai ona aumaia ai i tatou ia latalata atili atu i lo tatou Tama Faalelagi.
Ata na tusia e Beth Jepson
Ona o le initoneti, ua le o se mea e le masani ai i tagata o le Ekalesia ona fetaiai ma manatu e faapea ona luitauina ai o latou talitonuga. O nisi tagata o le au paia ua latou manatu o fesili e tulai mai e faaoso ai le le fiafia ma mafaufau ai pe mata e fetaui le i ai o se fesili e uiga i lo latou faatuatua.
E taua le malamalama e lelei le i ai o fesili. O le mea moni, o le tuuina atu o fesili i le faatuatua e taua i lo tatou alualu i luma faaleagaga. Ae peitai, o fesili faamaoni e le tutusa ma masalosaloga.
O le va o Fesili ma Masalosaloga
O le a la le eseesega i le va o se fesili ma se masalosaloga? O fesili, pe a fesiligia ma se manao faamaoni e faateleina le malamalama ma le faatuatua o se tasi, e tatau ona uunaiaina. E tele faaaliga anamua ma onaponei ua oo mai o le taunuuga o se fesili faamaoni.1 O le poloaiga faaletusi paia ia saili ma ole atu ina ia mafai ona maua, o se tasi lea [o aoaoga] ua ese le ta’ua soo. O fesili faamaoni o fesili ia e fesiligia ma le “manatu moni” (Moronae 10:4) ina ia malamalama lelei ai ma ia atili usitai atoatoa ai i le finagalo o le Alii.
O se tagata e fesili faamaoni e faaauau pea ona usiusitai a’o sailiili mo tali. O le faatusatusaga, ua ou vaai, a masalosalo tagata i o latou talitonuga, e masani ona latou taofia lo latou tuuto i poloaiga ma feagaiga a’o faatalitali mo ni tali. O le aga a le tagata masalosalo e masani lava ona taofi le usiusitai pe faatapulaa foi, a’o faatalitali i se iuga o masalosaloga.
E le o i ai se fautuaga i tusitusiga paia po o aoaoga a perofeta o uunaia ai le masalosalo. O le mea moni, ua tumu tusitusiga paia i aoaoga o le faafeagai. Mo se faataitaiga, ua poloaiina i tatou e “aua le masalosalo, aua le fefe” (MF&F 6:36). Ma i le Mamona 9:27, o loo uunaia ai i tatou e “aua le masalosalo, ae ia talitonu.”
O le tasi o faafitauli i le masalosalo o le naunau lea e usitai pe afai lena e uma ona taliina se le mautonu ma ua faamalieina ai tagata masalosalo. O le ituaiga uiga lenei na faaalia e Korioa, o le na fai atu, “Afai e te faaali mai ia te a’u se faailoga … ona ou talitonu ai lea i le moni” (Alema 30:43).
E tuuitiitia le malosi o le masalosalo e faaumatia ai le faatuatua, faamoemoe, ma e oo foi i le aiga i le minute lava e fai mai faamaoni ai se tasi, “O le a ou faia mea ua poloaiina mai e le Alii, e tusa lava pe vave pe afai foi e taliina a’u fesili, ona ua ou osifeagaiga e faia o lea.” O le eseesega i le va o se [faamatalaga] faamaoni “O le a ou tausia poloaiga ona …” ma se [faamatalaga] masalosalo “O le a ou tausia poloaiga pe afai …” e malosi ma faavavau le taua.
O Le Mamanu a le Alii mo le Mauaina o Tali
I le avea ai ma se enisinia o upegatafailagi, e tatau ai ona ou mulimuli i ni taiala ua maioio lelei pe afai ou te manao ia mafai ona fesootai upegatafailagi a la’u komepiuta ma isi upegatafailagi. O nisi taimi o nei tulafono e fai si le manaia, ae a mulimuli ia enisinia taitasi o upegatafailagi i tulaga faatonuina e tasi, e mafai ona matou fatuina se mea e sili atu ona malosi nai lo le mea e mafai ona matou faia pe afai e galue na o le tagata lava ia.
E faapena foi, afai tatou te sailia se tali i se fesili faaleagaga mai le Punavai o le malamalama uma, ona tatau lea ona e mulimuli i Ana tulafono ia maua ai le tali. O lenei faagasologa e manaomia ai i soo se tulaga se manao ia malamalama i le upumoni ma se naunau e mulimuli i le finagalo o le Alii (tagai i le Alema 32:27). A le o lena, e te oo i le tulaga lamatia o le faatauanauina o oe lava i tali e te manao e talitonu i ai nai lo o le mauaina o tali moni mai le Atua.
O se mea masani le lagonaina o le atugalu po o le le mautonu pe a luitauina i se manatu e le masani ai, ae maise lava pe a luitauina ai se talitonuga mausali. O le mea taua, ia aua ne’i faatagaina lena le mautonu e aveese ai i tatou mai a tatou feagaiga a’o faagasolo la tatou sailiga mo ni tali. Ua ou aoaoina mai aafiaga patino e faapea, e le mafai ona fuli o tatou tua i le Atua ona faamoemoe lea e tali mai o Ia i a tatou fesili i a tatou tuutuuga. E manaomia le faatuatua e tausi ai poloaiga a’o iloiloina lo tatou le mautonu. E ono tau faaosooso le taofi pe faatapulaa o lo tatou usiusitai a’o faatali ni tali mautu o o tatou atugaluga, ae peitai, e le o le auala lenei o le Alii.
I tulaga e tatau ai, e ao ona tatou fesili muamua ia i tatou lava, “Pe o o’u naunau e fai mea e manaomia ia maua ai se tali mai le Alii, pe ua na o lo’u manao e fai i la’u lava ala? Na aoao mai e le Alii lava Ia lenei mamanu ina ua Ia fetalai: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:17).
O le laasaga muamua la i le taliina o fesili o le tu “mausali ma le le mafaagaeetia i le tausiga o poloaiga a le Atua” (Alema 1:25). Na fesili Elder Neil L. Andersen o le Korama a Aposetolo e Toasefululua:
“E faapefea ona e tumau ma le “mausali ma le le mafaagaeetia” i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.
“Pe fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua oo mai se asiosio.”2
Na aoao mai foi Elder Andersen o le “faatuatua … o se faaiuga.”3 O le a le faamalosia e le Alii lou mafaufau po o lou usiusitai. E tatau ona e filifilia le faatuatua ma le loto i ai. O lena filifiliga e le satia ai lou atamai faamaoni; o le faamaoniga o le faaaloalo faavavau ma paia mo lou faitalia.
O Fesili e Faateleina ai le Malamalama
Ua manatu sese nisi o le i ai o ni atugaluga faamaoni e uiga i le talafaasolopito po o aoaoga faavae o le Ekalesia o le faamaoniga lea e le o ola se tagata e tusa ai ma tulaga faatonuina o le Ekalesia. O le i ai o ni fesili e le faapea ai ua tausalaina oe i se agasala tele. O fesili o ni vaega o le olaga ma e alagatatau mo lo tatou alualu i luma ma le malamalama faateleina. O le popolega, e le o le pe a i ai ni a tatou fesili, ae pe o le a tatou tausia poloaiga a’o tatou galulue i le faagasologa o faaaliga lea e taitai atu ai i tali.
Ia nofouta e mafai e Satani ona faalautele o tatou masalosaloga pe taitai atu foi i tatou ia tauamiotonuina a tatou agasala. O le a uunaia i tatou e le Agaga Paia i faalogona le lelei pe a tatou agasala, ma e mafai a le o le tatou salamo pe teena foi nei uunaiga. A o aliae masalosaloga, atonu e aoga ona fesili faamaoni ifo ia te oe lava, Pe o i ai se mea o loo o’u faia pe o o’u manao i ai o tetee ai i le talalelei? Afai o lau tali o le ioe, saili le fesoasoani mai lou epikopo. E mafai ona faia ai le eseesega atoa! O le faatagaina o ou masalosaloga e tauamiotonuina au agasala, e le o se suitulaga faamanuiaina lea mo le salamo.
O nisi foi tagata ua lavelavea i luga o faamatalaga na faia e taitai o le Ekalesia ua faapea ona iu ane e le sa’o, e le faatatau i aoaoga faavae ae o o latou lava manatu faaalia patino. Mo se faataitaiga, na tusia e Peresitene Iosefa Filitia Samita (1876–1972) i le lomiga muamua o lana tusi Tali i Fesili o le Talalelei, “E le mautinoa pe o le a faatagaina le tagata e fai soo se meafaigaluega po o se vaa e malaga i le vateatea ma asiasi atu i le masina po o se isi lava paneta mamao.”4
Mulimuli ane, i le mavae ai o le tulaueleele o le Apolo i le masina ma le maliu o Peresitene Tavita O. MaKei, na avea ai Iosefa Filitia Samita ma Peresitene o le Ekalesia. I se faatalanoaga ma le au faasalalau, na fesili atu ai se tagata faasalalau ia te ia e uiga i lenei faamatalaga. Na tali Peresitene Samita, “Ia, na ou sese, a ea?”5
Na saunoa Elder Jeffrey R. Holland o le Korama a Aposetolo e Toasefululua: “Tatou te [mafai ona] faaaogaina ia malosiaga taua faalelagona ma faaleagaga e manatua ai pea se … mea na tupu i le talafaasolopito o le Ekalesia lea ua faamaonia ai o le a faigata pea i tagata o le olaga nei ona faatutusa lo latou lelei i faamoemoega faalelagi ua folasia i o latou luma.”6
Sailiga i se Auala Faagaeetia
E anoanoai tusi ua tusiaina ma itula e le mafaitaulia ua faaaluina i le suesueina o le tala o le Toefuataiga. O lenei mea e masani ona oo atu ai i se malamalamaaga faateleina, ae e mafai foi ona faaosofia ai fesili le logomalie, ae maise lava pe afai tatou te le malamalama i faamoemoega o tagata i lena taimi. E faigofie foi ona lofituina i le sailiga o mea moni ua tuanai ia e ono faauigaseseina pe tatou le maua i le taimi nei, ae e mafai i taimi uma ona maua faamatalaga moni ma talafeagai mai le Tagata o loo malamalama i mea uma.
O lenei mea atonu o le vaega aupito taua lea o mea uma: a tatou mausali i le tausiga o a tatou feagaiga ma ola faamaoni i le malamalama ua tatou maua, o le a faamanuia e le Alii o tatou olaga ma tuuina mai musumusuga ia i tatou. Ua ou lagonaina nei alofa mutimutivale agamalu; o ni aafiaga e ese le patino ma tuusa’o i lo tatou va ma lo tatou Tama Faalelagi. O le malamalama ma le poto. E le mafai e le tele o le faitautusi po o le suesueina o aafiaga ua toatele ni tagata na talatalaina mai ona faatusalia le mana o aafiaga e tuusa’o mai ia i tatou e le agalelei ma le alofa o lo tatou Tama.
O le a faaauau pea ona tulai mai fesili a’o tatou tulitulimatagauina se faiga o le suesueina i aso taitasi o tusitusiga paia ma isi mataupu o le talalelei. A finagalo le Alii e aoaoina i tatou, e masani ona Ia faia e ala i le tuuina mai ia i tatou o se fesili e mafaufau loloto i ai. E oo mai tali e ala i le faamaoni i a tatou feagaiga ma le auauna atu i isi a’o tatou suesue, aua o le ala lena i le mauaina o ni aafiaga patino lea, i le aluga o taimi, o le a tuuina mai ai tali i fesili uma.