Savali a Faiaoga Asiasi
O Uiga o Iesu Keriso: e Talitiga ma Onosai
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O le onosai e masani ona manatu i ai o se amio filemu, uiga o le le tali atu, ae e pei ona saunoa Peresitene Dieter F. Uchtdorf, Fesoasoani Lua i le Au Peresitene Sili, “O le onosai e le o le taliaina ma le usiusitai, pe o le toilalo foi e galue ona o o tatou atuatuvalega. O le onosai o lona uiga o le faatalitali ma le tumau. O lona uiga o le tumau ai i se mea … e tusa lava pe tolopoina manaoga o o tatou loto. O le onosai e le na o le tumau, ae o le tumau lelei ai!”
I lo tatou muai olaga, sa saunia ai e lo tatou Tama Faalelagi se fuafuaga mo i tatou—o Ana fanau agaga—ma sa tatou alalaga fiafia i le avanoa e o mai ai i le lalolagi (tagai i le Iopu 38:7). A o tatou filifili e faaogatasi o tatou loto ma Lona finagalo i le taimi o lo tatou olaga i le lalolagi, o le a Ia “faia i [tatou] ma se mea faigaluega i [Ona] lima mo le olataga o agaga e toatele” (Alema 17:11).
Sa faaauau le saunoaga a Peresitene Uchtdorf, “O le onosai o lona uiga o le taliaina o le mea e le mafai ona suia ma le faafetaiaia i le lototele, faatamalii ma le faatuatua. O lona uiga o le “fia gauai i mea uma ua silafia e le Atua e tatau ona faatiga ai [tatou], e pei lava ona gauai le tamaitiiti i lona tama” [Mosaea 3:19]. Ma le mea mulimuli, o le onosai o lona uiga o le ‘mausali ma le le mafaagaeetia i le tausiga o poloaiga a le Atua’ [1 Nifae 2:10] i itula uma o aso taitasi, e tusa lava pe faigata ona fai.”1
Mau Faaopoopo
Mai Tusitusiga Paia
Ua ta’u mai e tusitusiga paia ia i tatou e faapea, i lo tatou olaga i le lalolagi, e tatau ona tatou “onosai i puapuaga, ona o le a tele [o le a] oo mai ia [i tatou].” Ona tuuina mai lea e le Atua ia i tatou le folafolaga faamafanafana lenei, “Onosaia i latou, aua faauta, ua ou faatasi ma oe, e oo lava i le faaiuga o ou aso” (MF&F 24:8).
O le tala faale-Tusi Paia lenei o se faataitaiga o le onosai ma le faatuatua.
“O le fafine sa ia te ia le puna toto i tausaga e sefulu ma le lua … na pa’i ane i le tuupao o le ofu [o Keriso]: ona [uma ai] lea o lona puna toto.
“Ona fetalai ane lea o Iesu, … Na pa’i mai lava se tasi ia te a’u: aua ua ou iloa ua alu atu le mana nai ia te a’u.
“Ua iloa e le fafine ua le lilo o ia, ona alu atu lea o ia ma le gatete, ua faapau mai i ona luma, ma faamatala mai ia te ia i luma o le nuu uma le mea na pa’ i atu ai o ia ia te ia, ma le faamaloloina loa o ia.
“Ona fetalai atu lea o ia ia te ia, Lo’u afafine, ina faalototeleina ia oe: ua e ola i lou faatuatua; ina alu ia oe ma le manuia” (Luka 8:43–48).
E pei foi o le [fafine], e mafai ona tatou maua faamanuiaga ma le faamafanafanaga, faapea foi i le faamalologa, a’o tatou aapa atu ia Iesu Keriso—o Lana Togiola e mafai ona faamalolo ai i tatou.