O Se Taunuuga Fou
E alala le tusitala i Farani.
O lo’u olaga atoa na pei o se tietiega vaalele e le uma. Sa ou momoo mo se filemu ma le mautu ae sa le’i mauaina lava seia oo ina ou liliu moni atu i le Alii.
Ata na tusia e urii Kovalenko/iStock/Thinkstock
O nisi taimi e pei ai lo’u olaga o se malaga faifai pea e tasi a le vaalele. O lo’u tina o le Ekuatoa ae o lo’u tama o le Polani. Sa ou fanau i Ekuatoa, ae ina ua 10 o’u tausaga sa matou siitia atu i Sepania. Sa na o le lua tausaga sa matou nonofo ai iina. Ina ua 12 o’u tausaga sa toe aluese foi lena vaalele, o le taimi lenei mo Polani. Sa ou momoo ia faamautu, uo ma ni aiga e latalata mai, ma ia lava loa ia faatofa.
Feiloaiga Muamua ma Alii Faifeautalai
Sa tuitui mai le matou faitotoa. Sa ou tatalaina ma iloa ai ni alii talavou se toalua na tutu ai. O lo’u faavalevalea, sa ou tapunia ai le faitotoa a o le’i faia mai se la tala.
“Toe tatala le faitotoa ma faamalie i ai ua e sese,” o le faatonu mai lea o le leo o lo’u tama mai le pito i tua o le fale. “Ma te le’i aoaoina oe e fai faapenei tagata!”
O le lagonaina o si faavalevalea laitiiti, sa ou tatalaina ai le faitotoa. “Ou te faamalie atu,” o la’u mumumumu lea.
Ou te fia iloa e uiga ia te outou, e uiga i a outou talitonuga. Faamolemole susu mai i totonu,” na valaaulia ai e lo’u tama. Sa faailoa mai e alii talavou i laua lava o ni faifeautalai mai Le Ekalesia a Iesu Keriso o le Au Paia o Aso e Gata Ai. Sa ou faalogologo ma le musua i la laua savali—i le 13 o o’u tausaga, sa leai sa’u filifiliga ae ia auai.
E fa masina na asiasi mai ai na faifeautalai i lo’u aiga, aoao mai aoaoga faavae o le Ekalesia toefuataiina a Iesu Keriso. “Matou te faaaloalo ma faamemelo i lo oulua lototetele, ae e le mafai ona suia la matou tapuaiga,” o le tala lea na iu ina fai atu ai lo’u tama ia i laua, ma matou te le’i toe vaai lava na alii faifeautalai.
O Se Naunau e Maua le Upumoni
E lua tausaga na tuanai, ma o le suiga o tulaga faaleaiga na faamalosia ai a’u i se faanoanoaga o’oo’o. Sa tuua e lo’u tama ia Polani i le suega o se galuega o lea na taapeape ai lo matou aiga. Sa matuai o’u manao lava e saili le Atua. Sa faasolo ina atili faamaoni a’u tatalo, i le augani atu i le Tama Faalelagi e fesoasoani mai ia te a’u ia ou maua Lana mafutaga.
O se tasi aso na ta’u mai ai e lo’u tina, “Sa fesili mai se tagata e igoa ia Garling ia te oe. Sa ou fai i ai e toe valaau mai i le vaiaso lea.” Sa ia iloaina o se faifeautalai ma sa le’i fia faalogo o ia i le savali, o lea sa le’i manatu ai e manaomia ona vave tali atu i ai.
O le afiafi o le Aso Faraile lena na ou toe faalogoina ai le tu’itu’i i le faitotoa. O le taimi lenei sa ou tuuina atu ai i avefeau se faafeiloai faamaoni ma se ataata. “E talia lava oulua i totonu o lo’u fale, ae e tatau ona oulua silafia e le avea lava a’u ma se Mamona,” sa ou ta’u atu ai ia i la’ua.
Ae sa aoao lava a’u e alii faifeautalai—i aoauli o Aso Faraile uma mo le ono masina. O le tele o kuki a lo’u tina ma le afe o fesili mulimuli ane, na amata taliina ai a’u fesili loloto uma. Na foliga mai o soo se taimi lava na asiasi mai ai faifeautalai, na faapipiiina ai foi ma se isi fasi paso o le olaga. O le fiailoa lava, na iu ai ina ou faia le mea na talosaga mai ai faifeautalai ou te faia: tatalo ma fesili atu i le Tama Faalelagi pe moni a la’ua upu ma le Tusi a Mamona. Sa la faamautinoa mai ia te a’u e tali le Atua i tatalo.
Faamautinoaga ma le Faalotolotolua
A o o’u tatalo ma suesue loloto atili i tusitusiga paia, sa oo ina avea nei aoaoga faavae ma mea suamalie i lo’u loto. Mo ni masina sa ou musu lava, ma le manatu na ou manaomia se faamaoniga mausali, na tatau ona [ou] iloa mea uma e uiga i le talalelei ona faatoa auai ai lea i lenei Ekalesia. Mulimuli ane, ona tautala mai lea o afioga a le Faaola i le Ioane 20:29 i lo’u loto: “Amuia o e le vaai mai, a e talitonu mai pea.” Sa tonu ia te a’u ou te papatiso.
Sa manaomia e o’u matua ou te faatali seia ou matua ona papatiso ai lea, ae o le taimi na faatalitali ai sa fesoasoani i lo’u alualu i luma ma le malamalama i le talalelei. O le mea na faanoanoa ai, a o latalata i le aso o lo’u papatisoga, sa aluese lo’u talitonuina o la’u tali. Sa ou toe oo i mea o le lalolagi ma sa ou popole ina ne’i le taliaina e e pele ia te a’u la’u filifiliga ina ia papatisoina.
Na faasolosolo malie lava, o a’u mea sese ma faaiuga na ou tutuli ai i musumusuga a le Agaga. Sa iu ane a’u tusitusiga paia i le vaega pito maualalo lava o la’u pusa ma sa iu foi ina ou le toe tatalo.
O le Faamanuiaga o le Salamo
Sa le’i tulaga lelei lo’u olaga--na tele naua loimata ma le le fiafia. Sa faigata ona malamalama pe aisea na oo ai lo’u aiga i le tele o le mau tofotofoga. E oo tonu lava i lo’u tausaga mulimuli i le aoga maualuga, ae tatau loa ona tuua e o’u matua ia Polani. O le manatu o le toe me’i foi na mafua ai lo’u ita. Mulimuli ane, sa ou toe tootuli ai i le tatalo, sa faia ma le loto atoa a’u upu: Lo’u Tama Faalelagi, ia faia Lou finagalo, ae le o lo’u loto.”
O lena tatalo na faailoga ai le amataga o lo’u toe foi mai i le Ekalesia, lea na ou iloaina o le a manaomia ai le salamo. O le Aso Sa lena, mo le taimi muamua i le toeitiiti atoa o le tausaga, na ou auai ai i le sauniga faamanatuga. O le aso na sosoo ai, sa ou toe filifili ai loa e papatiso.
Sa fesoasoani mai le Alii ia te a’u i la’u faagasologa faigata o le toe foi i le mea sa ou iloaina ua moni. Ua ou faauigaina nei na tulaga faigata o nisi o faamanuiaga aupito sili ona matagofie mai le Atua. Na te lei faagaloina a’u. Sa faafofoga mai o ia i a’u talosaga ma faatalitali mai mo a’u ia ou iloa Lana tali. Sa Ia fesoasoani mai ia te a’u i mafatiaga uma sa ou onosaia, faamalosia ma puipuia a’u. I le faagasologa sa ou maua ai le manino faateleina i le uiga o le misiona paia a Keriso ma Lana Togiola.
Sa ou papatiso ia Aperila 2011. Na aluese mai la’u vaalele talu mai lena taimi—o lenei ua ou nofo nei i Farani, o lona uiga o isi foi suiga e tele. Ae peitai, ua ou faafetai nei ia te Ia mo lo’u olaga ma mo tulaga na Ia faatagaina a’u ou te ola ai. Ona o la’u molimau i le Togiola a Iesu Keriso, ua ou malamalama ai nei e le o tuua na o a’u, e tusa lava po o a taunuuga o le a sosoo mai o le olaga. Ou te le iloa pe o le a toe malaga ese la’u vaalele. Ae pau le mea ou te iloa, o la’u taunuuga fou o le auala sa’o lena e tau atu i le ola e faavavau faatasi ma le Tama Faalelagi ma Lona Alo, o Iesu Keriso.