O Le Molimau a Mia
E alala le tusitala i Kalefonia, ISA.
“E musumusu mai Ia i se leo malu. E molimau i le Atua ma Iesu Keriso” (Tusipese a tamaiti, 56).
Ua te‘a lona taimi moe, ae e le i alu lava Mia i le moega. Sa ia nofonofo i luga o le fola o lona potu, ma mafaufau e uiga i se mea na faitau atu e Sister Duval i le Peraimeri: “O le a oo mai le taimi o le a leai se alii po o se tamaitai o le a mafai ai ona tulai mai i se malamalama nono.”1
“O se molimau e pei o se malamalama i totonu o i tatou,” le faamalamalama lea a Sister Duval. “Ma e manaomia e i tatou taitotasi se tasi mo i tatou lava. Ona mafai lea ona tatou malolosi pe a faigata le olaga ma faaosoosoina i tatou e Satani.”
Sa faalagolago atu le ulu o Mia i lona moega. “Ou te manao i se molimau e moni le talalelei,” sa ia mafaufau ai. Ae e faapefea tonu lava ona e maua se molimau? Sa ia iloaina o le tatalo o se vaega lea o le mauaina.
“O le a ou tatalo,” o lana tonu lea. O le a ia tatalo ma o le a le taofi seia oo ina tupu se mea e tau maia ia te ia e moni le Ekalesia. Ua saunia e tatalo i le po atoa pe afai e tatau ai!
Sa ia tootuli i ona tulivae. “Tama Faalelagi pele e,” sa ia musumusu ai, “ou te fia iloa pe moni le Ekalesia. Ou te fia lagonaina i lo‘u loto ma tau lava ia iloa.”
Sa faatalitali Mia. Na te lei lagonaina se mea sei vagana ai le lagona malu e masani lava ona ia lagonaina pe a ia tatalo. O le a lana mea sese ua fai? O fea lana molimau?
Sa tootuli o ia i ona tulivae mo se taimi na foliga e pei sa umi lava ae matala laitiiti loa le faitotoa i lona potu ma sa autilo atu i totonu lona tama.
“Sa ou vaaia le malamalama i lalo o le faitotoa,” o lana tala lea. “O e ala e toe faitau?” Ona ia vaaia lea o loimata i alafau o Mia. Sa ia tootuli i lalo ma opo mai o ia i lona lima. “O le a se mea ua tupu?”
Sa filemu o ia mo se minute. Ona ia fesili mai lea, “Tama, e faapefea ona e maua se molimau?”
Sa fusi mau o ia e Tama. “O se fesili lelei lena. O le manao i se molimau o se tasi o laasaga muamua.”
Sa lagona e Mia le faaletonu i lona fa’ai ua amata ona alu ese.
“O le mauaina o se molimau e le masani ona tupu i se tatalo se tasi. Ma e tusa lava pe ua i ai sau molimau, e tatau ona e galue pea i ai.”
“Ae o fea e sau ai se molimau?” Le fesili lea a Mia.
“O se molimau e sau mai le Agaga Paia,” o le tala lea a Tama. “Pe na e lagonaina ea se mafanafana ma le lelei i le taimi o se afiafi faaleaiga po o le lotu?”
Sa mafaufau Mia i lena mea. “Ina ua e tuuina mai ia te au se faamanuiaga faapitoa a o lei toe amataina aoga, sa ou mauaina se lagona lelei.” Sa ia toe mafaufau atili. “Ma ou te lagonaina lava le fiafia i totonu pe a ou faalogo ia Peresitene Monson o lauga i konafesi aoao. Ma pe a ou agalelei i au uo pe ou te faitauina a‘u tusitusiga paia, ou te mauaina foi lagona lelei.”
Sa ataata Tama. “O na lagona o le Agaga Paia o loo tautala atu ia te oe. Na te tuuina atu na lagona pe a e faia se mea sa‘o po o lou faalogo foi i se mea e moni.”
“Ua ou lagonaina nei le mafanafana ma le fiafia,” o le tala lea a Mia. “Pe o le Agaga Paia lena?”
Sa toe fusi mai o ia e Tama. “Ioe. O loo ia ta‘u atu ia te oe o mea o loo ta talanoaina e moni. Ma o le ala lena e te maua ai se molimau.”
Ina ua alu Mia e moe mulimuli ane, na te lei manatu sa i ai sana molimau atoa, ae sa i ai pea lena lagona lelei, ma le mafanafana faapea o mea na ta‘u atu e Tama ia te ia ua moni. Sa ia iloaina o lenei lagona ua na o se amataga.
Sa faapupuu Mia i lona palanikeke mafanafana, ma moeiini ona mata. A o lei faagalegale moe o ia, sa ia musumusu atu, “Faafetai ia te Oe le Tama Faalelagi, mo le fesoasoani mai ia te au ia maua sau molimau. Ma faafetai ia te Oe mo lo‘u tama.”
Ata na tusia e Brad Teare