O se Fesili o le Faatalanoaga e Le‘i Faamoemoeina

Alvin A., Filipaina

Ina ua maea la‘u misiona, sa ou tauivi e sue se galuega. Na iu lava ina ou maua se faatalanoaga. O le galuega o le a avea ma se avanoa maoae, ae sa ou popole sa le lava lou tomai. Na oo mai lo‘u taimi mo le faatalanoaga, ma sa ou nofo ma le popole i luma o le pule. A o ou autilo atu i lana laulau, sa ou vaai i se pepa o fesili sa ia fai atu i tagata talosaga. Sa tatavale lou fatu. Sa faaaoga i fesili ni faaupuga faigata.

Na maua e le pule faamatalaga o o‘u tomai ma amata ona ia fesili e uiga i ou tomai faalegaluega. Ina ua ia faitauina “faifeautalai faamisiona”, sa fesili mai pe mafai ona ou tauina atu ia te ia mea sa ou aoaoina atu i la‘u misiona.

Sa ou talanoa ia te ia e uiga i perofeta, le ata o le faaolataga, ma aiga e faavavau. Sa ataata o ia ma fai mai, “Ou te manao e te sau e feiloai i lo‘u aiga.”

Sa ia toe uu mai le pepa o fesili o le faatalanoaga. Sa toe foi mai o‘u lagona popole. Sa ia fesili mai, “O i ai se mea e te nofo ai iinei i Manila?” Sa lei faatali o ia mo la’u tali ma fai mai, “Ia, e tatau ona e vaavaai mo se fale. O le a e amata taeao.”

O se vavega lava. O le a ou le faagaloina lava le ala na fesoasoani ai lou auauna atu i se misiona i lau faatalanoaga mo se galuega.