Ola ai i se Lalolagi Televave
Saunia e Peresitene Dieter F. Uchtdorf
Fesoasoani Lua i le Au Peresitene Sili
Mai se lauga na tuuina atu i le konafesi aoao o Oketopa 2010.
Afai o le olaga ma lona saoasaoa nanativale ma le tele o le atuatuvale ua faafaigata ai ona e lagona le manao e olioli, ia atonu o se taimi lelei lenei e toe faatulaga ai mea e sili ona taua.
Ata na pueina o le vaalele © 06 photo/dollar Photo Club; ata na tusia e David Stoker
Pe i ai se taimi na e i ai i se vaalele ma na lagonaina se faafitauli? O le mafuaaga taatele o le faafitauli o le suia faafuasei o gaoioiga o le ea e mafua ai ona faatu i lalo, le vaalele, taumalua i autafa, ma taavilivili. E ui ina fausia vaalele ina ia tetee atu i faafitauli ia e sili atu nai lo soo se mea e te fetaiai i se faigamalaga masani, ae e mafai ona faapopoleina ai lava le pasese.
O le a sou manatu o a mea e fai e pailate pe a latou feagai ma ni faafitauli? Atonu e manatu se tagata aoga faapailate o le faateleina o le saoasaoa o se fuafuaga lelei lea aua o le a vave ai ona o ese atu mai le faafitauli . Ae atonu o le mea sese lena e fai. E malamalama lelei pailate atamamai o loo i ai se saoasaoa faatapulaaina o le a tuuitiitia ai aafiaga le lelei o le faafitauli. Ma o le tele o taimi o lona uiga o le faaitiitia o le saoasaoa. O le mataupu faavae lava lea e tasi e faatatau foi i patupatu i luga o se auala.
O lea la, o se fautuaga lelei le faalemu teisi, ia tumau pea i le ala, ma taulai atu i mea e taua pe a feagai ma ni tulaga faigata.
O Le Saoasaoa o le Olaga i Aso Nei
O se tasi o uiga o le olaga i aso nei e foliga mai o loo tatou gaoioi i se saoasaoa faateleina, e ui lava ina tatou feagai ma tulaga le mautonu po o mea faalavefau.
Ia tatou faamaoni; e sili atu le faigofie o le pisi. E mafai ona tatou mafaufau i se lisi o galuega o le a lofituina ai o tatou taimi faatulagaina. O nisi atonu foi e manatu o lo latou taua faaletagata lava ia, e faalagolago i le umi o le latou lisi o mea e fai.
O e atamamai e tetee atu i le faaosoosoga e maileia ai i le pisi o le popolevale o le olaga i aso uma. Latou te mulimuli i le fautuaga “E sili atu mea taua o le olaga nai lo le faateleina o lona saoasaoa.”1 E faapuupuu atu, latou te taulai atu i mea e sili ona taua.
Na aoao mai Elder Dallin H. Oaks, o le Korama a Aposetolo e Toasefululua, “E ao ona tatou tuuese nisi o mea lelei ina ia filifili ai mea e lelei tele pe sili atu le lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.”2
O le sailiga mo mea e sili ona lelei e le maalofia le taunuu atu i mataupu faavae autu o le talalelei a Iesu Keriso—upumoni faigofie ma le matagofie ua faaalia mai ia i tatou e se Tama alofa, e faavavau, ma silafia mea uma i le Lagi.
E Faapefea Ona Mafai Ona ou Aoaoina le Mea e Sili Ona Taua?
Ou te manatu o le toatele o i tatou e malamalama lelei i le taua tele o faavae. Pau lava le mea ona o tatou i nisi taimi e faalavelavea e ala i le tele o mea e foliga mai e sili atu ona faatosina.
O tusi e lolomiina, o ala o faasalalauga eseese e tele, o meafaigaluega faaeletonika ma masini faaeletonika—e aoga uma lava pe a faaaoga tatau—e mafai ona avea ma ni maagao ogaoga po o nofoaga e le i ai se alofa o le tuua toatasi.
Ae i totonu o tele o leo ma filifiliga, o le Tamalii lotomaulalo o Kalilaia o loo tu ma ona aao mafola, o loo faatalitali mai. O ia o se savali faigofie: “Sau, mulimuli mai ia te au” (Luka 18:22). Ma e le fetalai atu o Ia i se faaleotele leo ae i se leo itiiti ma le filemu (tagai i le 1 Tupu 19:12). E faigofie lava mo le savali autu o le talalelei ona leiloa i le malomaloa o faamatalaga o loo taia ai i tatou mai itu uma.
O tusitusiga paia ma afioga tulei a perofeta soifua e tuuina mai le faamamafa i mataupu faavae autu ma aoaoga faavae o le talalelei. O le mafuaaga tatou te toe foi atu ai i nei mataupu faavae autu, i aoaoga faavae mama, aua o le faitotoa lea i upumoni e loloto le taua.
O Faavae: Sootaga Autu e Fa
A o tatou liliu atu i lo tatou Tama Faalelagi ma saili atu i Lona poto e faatatau i mea e sili ona taua, tatou te aoaoina pea lava pea le taua o sootaga autu e fa: ma lo tatou Atua, ma o tatou aiga, ma o tatou uso a tagata, ma i tatou lava. A o tatou iloiloina o tatou lava olaga ma se mafaufau naunautai, o le a tatou vaai ai i le mea na tatou se ese ai mai le ala e silisili ona lelei. O le a matala mata o lo tatou malamalama, ma o le a tatou iloa le mea e tatau ona fai e faamama ai o tatou loto ma toe faatulaga ai o tatou olaga.
Muamua, lo tatou sootaga ma le Atua e sili ona paia ma taua. O i tatou o Ana fanau. O Ia o lo tatou Tama. Ua finagalo o Ia ia tatou fiafia. A o tatou saili ia te Ia, a o tatou aoao i Lona Alo, o Iesu Keriso, a o tatou tatalaina o tatou loto i le uunaiga a le Agaga Paia, o o tatou olaga o le a sili atu ona mausali ma saogalemu. Tatou te oo i le filemu sili atu, olioli, ma le faamanuiaina a o tatou tuuina atu le mea sili e ola e tusa ai ma fuafuaga e faavavau a le Atua ma tausi Ana poloaiga.
Tatou te faaleleia atili la tatou sootaga ma lo tatou Tama Faalelagi e ala i le aoao ia te Ia, e ala i le fesootai ma Ia, e ala i le salamo i a tatou agasala, ma e ala i le mulimuli tui ia Iesu Keriso, aua “e le alu atu lava se asi i le Tama, pe a le ui mai ia [Keriso]” (Ioane 14:6). Ina ia faamalosia lo tatou sootaga ma le Atua, tatou te manaomia nai taimi anoa e na o i tatou ai ma Ia. O le taulai atu ma le filemu i tatalo patino i aso uma ma le suesueina o tusitusiga paia, ia taumafai e le aunoa ia agavaa mo se pepa faataga aoga o le malumalu—o nisi nei o teugaoa atamai o o tatou taimi ma taumafaiga ia latalata atili atu i lo tatou Tama Faalelagi. Ia tatou taliaina le valaaulia o i le Salamo: “Ina soia, ma ia outou iloa o aʼu lava o le Atua” (Salamo 46:10).
O la tatou sootaga autu lona lua o le ma o tatou aiga. Talu ai “e leai se isi manuia e mafai ona suitulaga ai le toilalo”3 o iinei, e tatau ona tatou tuu le faamuamua maualuga i o tatou aiga. Tatou te fausia sootaga agalelei ma loloto ma o tatou aiga e ala i le faia o mea faigofie faatasi, e pei o taumafataga faaleaiga, ma afiafi faaleaiga, ma e ala i le na o le faia lava oni mea malie faatasi. I sootaga faaleaiga o le alofa e sipelaina moni lava t-a-i-m-i, taimi. O le faaavanoaina o le taimi mo le tasi ma le isi o le ki lea i le lotogatasi i le aiga. Tatou te talanoa ma i latou, nai lo le talanoa e uiga i le tasi ma le isi. Tatou te aoao mai le tasi i le isi, ma tatou te talisapaia o tatou eseesega faapea foi ma mea tatou te tutusa ai. Tatou te faia se sootaga paia ma isi pe a faalatalata i le Atua faatasi e ala i tatalo faaleaiga, suesueina o le talalelei, ma tapuaiga i aso Sa.
O la tatou sootaga autu lona tolu o le ma o tatou uso a tagata. Tatou te fausia lenei sootaga i le toatasi le tagata i le taimi—i le nofouta i manaoga o isi, auauna atu ia te i latou, ma le tuuina atu o o tatou taimi ma taleni. Sa faagaeetia au i se tasi tuafafine o le sa feagai ma luitau o le soifua matua ma gasegase ae sa filifili e ui lava e le mafai ona ia faia le tele o mea, e mafai ona ia faalogologo. Ma sa ia tulimatai atu i vaiaso taitasi mo tagata o foliga mafatia pe lotovaivai, ma sa ia faaaluina le taimi ma i latou, e faalogo ai Oka se faamanuiaga tele sa ia faia i olaga o ni tagata se toatele.
O le sootaga autu lona fa o le ma i tatou lava. Atonu e foliga mai e fou le mafaufau o le i ai o se sootaga ma i tatou lava, ae tatou te mafaia. O nisi tagata e le mafai ona lelei ma i latou lava. Latou te faitioina ma tuuina i latou lava i lalo i le aso atoa seia oo ina ua amata ona latou inoino ia i latou lava. Se‘i ou fautuaina atu oe e tuuitiitia le nanativale ae faaalu sina taimi faaopoopo ina ia e iloa atili ai oe lava ia. Savalivali i le natura, matamata i se la oso, fiafia i foafoaga a le Atua, mafaufau loloto i upumoni o le talalelei toefuataiina, ma vaai po o le a lo latou uiga ia te oe lava ia. Aoao e vaai ia te oe lava e pei ona silasila le Tama Faalelagi ia te oe—o Lona afafine po o le atalii faapelepele ma se malosiaga faalelagi.
Malosiaga i le Faigofie
O le malosi e le oo mai mai gaoioiga fitivale ae mai le tumau i se faavae mautu o le upumoni ma le malamalama. E oo mai i le tuuina o o tatou taulaiga ma taumafaiga i aoaoga faavae autu o le talalelei toefuataiina a Iesu Keriso. E oo mai i le gauai atu i mea paia e sili ona taua.
Ia tatou faafaigofie laitiiti o tatou olaga. Ia tatou faia suiga e tatau ai ona toe faatulaga o tatou olaga i le matagofie faagaeetia o le ala faigofie ma le lotomaualalo o se soo Kerisiano—le ala e taitaiina atu ai lava i taimi uma i se olaga e i ai se uiga, fiafia, ma le filemu.