O Uso i le Talalelei
E alala le tusitala i le Setete o Mekisiko, Mekisiko.
Ona ua mafai ona ou vaai i faamanuiaga o le talalelei i lo‘u olaga, sa ou fia faasoa atu i la’u uo.
Ou te alofa i la‘u uo o Lupita e pei o se uso. Na ma feiloai i le vasega ono, ma sa ma i ai faatasi i le faaili savali a le aoga. O le tausaga aoga na sosoo ai na sili atu ai ona ma vavalalata ma amata ai ona faalagolago le tasi i le isi. Sa ia tau mai ia te au luitau sa ia te ia i le fale ona e le i ai lona tama i le fale ma o lona tina sa le mafai ona tuu atu ia te ia le taulaiga sa ia manaomia. Sa ou iloaina sa faanoanoa o ia ona o ona matua sa le o se vaega tele o lona olaga. Sa tuuatoatasi o ia, ae sa ou i ai pea mo ia.
Sa ou lagona le faamanuiaina na fanauina au i totonu o se aiga lea na matou maua ai le talalelei a Iesu Keriso. Ua ia aumaia i totonu o lo‘u olaga se filemu e leo maua e le toatele o a’u uo. Ona sa mafai ona ou vaai i faamanuiaga ua aumaia e le talalelei ia te au, sa ou fia faasoa atu ia Lupita.
Sa ou talanoa ia te ia e uiga i le Ekalesia ma valaaulia o ia ma te o faatasi i le Mutuale. Sa ia taliaina ma amata ona sau i le lotu ma gaoioiga a le uarota faatasi ma au ma lo‘u aiga. Sa ou faafeiloaia o ia i faifeautalai, o e na aoaoina o ia i le talalelei ma valaaulia o ia e papatiso. Sa ia mauaina se molimau, ma ina ua ia fesili i lona tina pe mafai ona papatiso, sa fai mai lona tina ioe.
Sa sili ona faapitoa le aso o lona papatisoga aua sa ia osia ni feagaiga ma lo tatou Tama Faalelagi ia manatua o Ia ma tausi Ana poloaiga. Sa ou tuuina atu la‘u molimau ia te ia i lena aso, ma fai atu i ai ua i ai o ia i le nofoaga sa’o ma ua tatau ona mitamita le Tama Faalelagi ona o ia. Ou te alofa ia Lupita ma ou te fiafia o ia o la‘u uo ma o lenei, o lo’u uso i le talalelei. Ou te iloa o lona olaga o le a sili atu le fiafia ona o le a olioli o ia ma lona aiga i le lumanai i faamanuiaga o le talalelei.
Ua ta‘u mai e Lupita ia te au e faafetai sa ou filifili e faasoa atu le talalelei ia te ia. Sa ia fai mai talu ona amata ona ia auai i le lotu, ua sili atu le lelei o lona olaga ma ua ia lagonaina le toafilemu. Ou te iloa o le Agaga lenei ua faamauina le upumoni ia te ia. Na ia fai mai foi e i ai se aso o le a ia faaipoipo ai i le malumalu. Ou te faafetai i lo‘u Tama Faalelagi aua sa ou mauaina la’u uo ma ona o le olioli na ou lagonaina ina ua ou faasoa atu le mea e sili ona taua ia te au.
Ata na tusia e Michael Mullans