Faalagolago i le Faamautinoaga a le Alii
Atonu e le mafai ona laveaiina i tatou i taimi uma mai o tatou tofotofoga, ae a o tatou saili le faamautinoaga a le Alii, e mafai ona tatou iloa o mea uma e lelei e oo lava i taimi o faigata.
Sa ou nofo i le potu selesitila o le malumalu, ma mafaufau i le ala o loo i ai lo‘u olaga—e moni lava sa se ese mai le ala na ou fuafuaina. E pei o le toatele o isi talavou matutua, o popolega ua faatumulia ai lo‘u mafaufau: e faapefea ona mafai ona ou faapaleniina ni togi lelei ma se olaga faaagafesootai? E tatau ea ona ou le toe faigaluega? saili se galuega lona lua? E faapefea ona mafai ona ou faasaoina se tupe pe afai e leai ni au tupe? Aisea ua ou le faaipoipo ai? Na alu pea lava pea le lisi. Sa ou alu i le malumalu e saili se faamafanafanaga, ma tatalo mo le faamautinoaga o loo i ai lo‘u olaga i lima o le Tama Faalelagi. “Pe o le a lelei mea uma i lo‘u olaga?” Sa ou fesiligia. O le tali na oo vave mai ma le mautinoa i lo‘u mafaufau: “Ua lelei mea uma.”
Sa ou malamalama i lena taimi, e ui lava sa le sologa lelei lo‘u olaga e pei sa ou fuafuaina, o lea lava sa ogatusa ma Lana fuafuaga ma o Ia sa puleaina. O lena faamautinoaga matagofie o loo Ia silafia ma tausia au, e tusa lava pe Na te le aveesea o‘u tofotofoga, na fesoasoani ia te au i le tele o puapuaga. A o tatou maua le malamalama, saili, ma faatalitali mo nei faamautinoaga, e mafai ona tatou iloa e lagolagoina i tatou e le Alii i avega ua tuuina i o tatou luga.
O le faamautinoaga ae le o le Laveaiga
E manino lava, o le vave aveeseina mai o tatou tofotofoga e le o le tali masani lea a le Alii i a tatou aioiga. Nai lo o lena, e mafai ona Ia faamanuiaina i tatou i ni taimi taua o le faamautinoaga e ala i faaaliga faaletagata lava ia—le faamautinoaga o Ia o lo o taialaina o tatou olaga, ma o le a laveaiina i tatou mai o tatou tofotofoga. O nei faamautinoaga atonu e le mafai ona laveaia i tatou mai o tatou tofotofoga, ae atonu o le a aumaia ia i tatou le malosi tatou te manaomia e laveai ai i tatou lava, e tusa lava pe o lena laveaiina ua na o le faamafanafanaga a le Agaga Paia. Ua ou matauina le tele o faataitaiga i tusitusiga paia o auala na auina mai ai e le Alii le faamautinoaga a o lei laveaiina.
A o taitaia e Helamana ana fitafita talavou e 2,060 ma isi au a sa Nifae, na latou maua se faamautinoaga a le Alii. Ina ua mavae le tele o masina o faatalitali mo meaai ma le faaopoopo mai o le autau, na toeitiiti lava faaumatia i latou i le fiaaai ae taunuu mai loa ni meaai ma se vaega toalaiti o alii. I le fefefe ona o lenei faaopoopoga laitiiti e le lava, na iu ina latou liliu atu i le Alii ma “sa sasaa atu ai o [latou] agaga i le Atua i le tatalo, ina ia faamalosia e Ia [i latou] ma laveai [i latou].” Ina ua uma ona latou tatalo, na toe taua e Helamana, “sa oo ina asiasi mai le Alii lo tatou Atua ia i matou ma ni tautinoga o le a ia laveaiina i matou; ioe, sa oo ina ia fetalai mai le filemu i o matou agaga, ma tuu mai ia te i matou le faatuatua tele, ma faatonu i matou ia matou faamoemoe mo le laveaiga mai ia te ia” (Alema 58:10–11). O nei faamautinoaga na tuuina atu ia Helamana ma lana autau le malosi e onosai ai ma manumalo i o latou fili.
Na maua foi e Iosefa Samita se faamautinoaga a le Alii a o faafalepuipuiina i le falepuipui o Liperate. A o ia tatalo faatauanau, sa tauina atu ia te ia:
“Lo’u atalii e, ia filemu lou agaga; o lou tiga ma ou puapuaga o le a nao sina minute laitiiti;
“Ma ona oo lea, afai e te talitalia lelei, o le a faaeaina oe e le Atua i luga; o le a e manumalo i ou fili uma” (MF&F 121:7–8).
O lenei faamautinoaga na maua ai e Iosefa le lototoa ma le malosiaga e faaauau ai i faigata na toeitiiti lava vaivai ai.
I nei faataitaiga ma le tele o isi (tagai, mo se faataitaiga, Mosaea 24:8–16), e lei laveaiina vave e le Alii le au faatuatua mai o latou tofotofoga i le taimi lava lena. Nai lo o lena, sa Ia asiasi atu ia i latou i le faamautinoaga o le a Ia laveaiina i latou i Lona lava taimi. O nei faamautinoaga, e faaaoga ai le upu a Elder Richard G. Scott o le Korama a Aposetolo e Toasefululua, e pei o “le malamalama faaleagaga” e tuu e le Tama Faalelagi i o tatou ala “e faasusulu ai o [tatou] ala.”1 O nisi taimi o lena faamautinoaga e pau lea o le mea tatou te manaomia e onosai ai i tofotofoga, i le iloaina o le a i ai se laveaiga mulimuli ane.
Sailia o Faamautinoaga
E faigata le olaga. E i ai taimi pe a tatou fesiligia, pe a leai so tatou talitonuga ia i tatou lava ma lo tatou malosiaga e manumalo ai i puapuaga, pe leai so tatou faamoemoe. E masani ona lagonaina e pei o o tatou tofotofoga o le a le muta lava. Ma e ui lava e oo mai nisi faamautinoaga e le ala mai i se taumafaiga i la tatou vaega, ae o le tele o taimi e manaomia lo tatou sailia o na faamautinoaga o loo tau maia ia i tatou o le a i ai lava le laveaiina mai o tatou tofotofoga.
E masani ona oo mai faamautinoaga a le Alii e ala mai i le siufofoga o Ana auauna: taitai i le lotoifale, faiaoga o le inisitituti ma le Aoga Sa, aemaise lava Ana perofeta ma aposetolo. Sa faamanatu mai e Carol F. McConkie, fesoasoani muamua i le au peresitene aoao o Tamaitai Talavou, ia i tatou e “i a latou upu tatou te faalogoina le siufofoga o le Alii ma tatou te lagona ai le alofa o le Faaola.”2
O nei foi faamautinoaga e ala mai i le leo o le Agaga a o tatou talanoa faamaoni ma le Tama Faalelagi e ala i le tatalo faatauanau, a o tatou faitau ma mafaufau loloto i tusitusiga paia, a o tatou auai atu i le malumalu ma a tatou sauniga Lotu, a o tatou auauna atu i isi ma taumafai e fai le mea sa‘o. I se faapuupuuga, o faamautinoaga a le Alii e oo mai pe a tatou “saili ia te ia ma o [tatou] loto atoa, ma o [tatou] agaga atoa” (Teuteronome 4:29) ma usiusitai i Ana poloaiga.
Na maua e Helamana ma ana autau se faamautinoaga ina ua mavae le tele o tatalo faamaoni; na maua e Iosefa Samita se faamautinoaga ina ua maea ona tatalo ma mafaufau loloto. I tulaga uma e lua, na suesue e le Alii lo latou onosai ma le faatuatua a o lei tuuina mai se faamautinoaga—o se faamanatu lelei i taimi o tofotofoga e tatau ona tatou pipiimau pea i lo tatou faatuatua ma faatinoina le onosai.
Faatalitali mo Faamautinoaga
E pei foi o isi suega o le onosai, o le faamautinoaga a le Alii atonu e le oo mai i le ala ma le taimi tatou te faamoemoeina. Atonu e tatau ona tatou tatalo ia i ai ni “mata e vaai” (Esekielu 12:2) o le aao o le Alii ma Ana faamautinoaga i o tatou olaga. Na saunoa Elder David A. Bednar o le Korama a Aposetolo e Toasefululua i auala e mafai ona aofia ai i nei faamautinoaga le alofa mutimutivale o le Alii ma fai atu, latou te “le soona tutupu pe faafuasei foi. O le faatuatua, ma le usiusitai e mafai ai ona tatou maua nei meaalofa taua, ma, e masani lava e oo mai le alofa mutimutivale o le Alii i taimi e fesoasoani ai ia te i tatou e tau fai iloatino ma taliaina ai.”3
E masani lava, o le faatalitali mo le laveaiga po o se faamautinoaga o le laveaiina e manaomia ai le onosai sili atu nai lo le mea tatou te manatu ua tatou maua. Atonu e mafai ona tatou feagai ma ni tofotofoga ogaoga a o le‘i mauaina soo se ituaiga o faamautinoaga. E pei ona faamatala mai e Elder Scott, “o le malamalama faaleagaga” ua saunia e le Alii “e masani ona oo mai pe a mavae le malosi o le tofotofoga, o se faamaoniga o le alofa ma le agalelei o se Tama Na te silafia mea uma. Latou te faasino maia le ala i le fiafia sili atu, o se malamalama sili atu, ma faamalolosia [tatou] naunautai e talia ma usiusitai i Lona finagalo.”4 A o tatou tumau faamaoni ma usiusitai e ala i o tatou tofotofoga, o le a oo mai faamautinoaga o le Alii o le a afio mai e fesoasoani ia i tatou e tumau pea e pei ona i ai.
O La Tatou Faamautinoaga Silisili
I le iuga, e tusa lava pe fia faamautinoaga tatou te maua faapea e silafia i tatou ma lo tatou tulaga e le Tama Faalelagi, o le a le lava lea e fesoasoani ia i tatou e tumau e oo i le iuga pe afai e leai so tatou faatuatua ma le faamoemoe ia Iesu Keriso. E ala i Lana Togiola, e mafai ona tatou maua ai le faamoemoe atoatoa o le a i ai se aso o le a laveaiina ai i tatou mai o tatou tofotofoga uma. E mafai ona tatou iloa foi o loo i ai lo tatou Faaola e alofa atoatoa ia i tatou, aua na “afio ifo o [ia] i lalo o mea uma, lea na malamalama ai o [ia] i mea uma” (MF&F 88:6). E malamalama o Ia i o tatou tofotofoga, ma o tatou faanoanoaga aua o Ia “[sa] mafatia ma tiga i puapuaga ma faaosoosoga o ituaiga eseese uma … ina ia mafai ona ia silafia … le ala e fesoasoani ai i ona tagata e tusa ma o latou vaivaiga” (Alema 7:11–12).
Na saunoa mai Elder Jeffrey R. Holland o le Korama a Aposetolo e Toasefululua: “O le faamautinoaga silisili i le fuafuaga a le Atua, o lea sa folafola mai ai se Faaola, o se Togiola lea e ala i lo tatou faatuatua ia te Ia, o le a sii ae ai i tatou ma le manumalo i luga a’e o na faaosoosoga ma tofotofoga. … Ua na o le talisapaiaina lava o le alofa paia lenei o le a muamua ai ona lavātia o tatou lava puapuaga ia e itiiti ifo i lo [ō Laua puapuaga], ona sosoo ai lea ma le malamalama i ai, ma mulimuli ai togiolaina.”5 O le aoao ia te Ia ma Lana Togiola o se faamautinoaga lava lena.
Ua Lelei Mea Uma
A o tatou malamalama, saili, ma faatalitali mo faamautinoaga mai le Alii, o le a latou oo moni mai lava. E tatau ona tatou manatua na taimi e le mafaatauina, tusi i lalo, ma mafaufau soo i ai. O le mea e aupito sili ona taua, e tatau ona tatou faalagolago i ai ma talitonu i ai, pei ona talitonu i ai Helamana ma ona tagata ma le Perofeta o Iosefa, o le a faataunuuina e le Alii folafolaga na Ia faia ia i tatou. Ua ia faamanatu mai ia i tatou na folafolaga e ala mai i Ana faamautinoaga, ma e ui lava e le mafai ona mou ese ai o tatou tofotofoga, ua mafai ona tatou iloa o le Tama Faalelagi o loo i ai faatasi ma i tatou e lagolago ma fesoasoani ia i tatou e ala mai i soo se mea.
Ina ua mavae lo‘u aafiaga i le malumalu i lena aso, e lei faaitiitia o’u tofotofoga. E lei faafuasei lava ona ou maua ni togi atoatoa po o ni tupe e sili atu po o ni tafaoga faamasani se tele. Ae o le mea sa ou maua o se faamautinoaga toafilemu e faapea e ui lava i o‘u tofotofoga, o le a ou le afaina aua o loo faamoemoe le Alii e tausia pea Ana folafolaga e laveaiina au. Faatasi ai ma lena faamautinoaga ua ou iloa ua lelei mea uma.
O le “o afifi o le la susulu faaleagaga … e masani ona oo mai ina ua uma ona silisili ona ogaoga le tofotofoga, o se faamaoniga o le agaalofa ma le alofa o se Tama e silafia mea uma. Latou te faasino maia le ala i le fiafia sili atu.”