Fesili & Tali

“O se tasi o a‘u uo e manao e faataitai se mea leaga mo na o se taimi lava e tasi ina ia mafai ona ia malamalama pe a talanoa i ai tagata. E mafai faapefea ona ou fesoasoani ia te ia ia malamalama e le o se manatu lelei lena?”

O se tasi o mea e sili ona lelei e mafai ona e faia o le fesoasoani lea i lau uo ia manatua pe aisea ua tatou maua ai poloaiga. Ua tuuina mai e le Tama Faalelagi poloaiga ia i tatou ona e alofa o Ia ia i tatou ma silafia o le a tatou maua ai le fiafia ma fesoasoani ia i tatou e avea faapei o Ia.

I le Feagaiga Fou, na fetalai le Faaola, “Afai tou te alolofa mai ia te au, ia outou tausi mai i au poloaiga” (Ioane 14:15). Fesoasoani i lau uo ia iloa o le filifilia o le mea sa‘o e faaalia ai le alofa mo le Tama Faalelagi ma Iesu Keriso ma le agaga faafetai mo Lana Togiola ma le talalelei.

E mafai foi ona e faamanatu ia te ia o le faia o mea leaga e taitai atu ai i taunuuga leaga, e tusa lava pe na o le faatasi [ona fai]. Tatou te le mafai ona fai le agasala ma aloese mai ona aafiaga. O le soli o poloaiga ma le loto i ai e pei o le laa ese mai le Tama Faalelagi ma tauina atu ia te Ia e le taua o Ia e pei o a tatou uo po o isi tagata.

E alofa le Tama Faalelagi ia i tatou, ma o le a Ia faamanuiaina i tatou i le taitaiga a le Agaga pe a tatou tausia Ana poloaiga. Afai tatou te usiusitai, o le Agaga o le a aoaoina i tatou e sili atu nai lo se isi mea e mafai ona tatou aoao mai le faataitaiina o le agasala.

Tatou te Le Manaomia le Faataitaia

O le a ou aoaoina lau uo faapea “soo se mea ualelei ua sau mai le Atua, ma o soo se mea ua leaga ua sau mai le tiapolo” (Alema 5:40). O le a ou faamatalaina foi o gaoioiga uma lava e i ai taunuuga ma e le tatau ona tatou faia soo se mea e mafai ona faaleagaina ai i tatou. Tatou te le manaomia ona faataitaia le leaga. O loo ua matuai tele le leaga ua siomia ai i tatou, ma e faigofie ona iloa e toatele tagata ua nonofo i le faanoanoa aua latou te lei tausia poloaiga.

Vinicius S., 17 tausaga, São Paulo, Pasila

Faamatala pe Faapefea Ona E Manumalo i Faaosoosoga

Tau atu i lau uo o le mea e sili ona taua o lona tulaga i luma o le Alii. E le tatau ona tatou tuuina atu lo tatou faaolataga e faavavau e faafesuiai mo se aafiaga faaletino. Ma, o le a sili atu ona e fesoasoani i lau uo pe afai e mafai ona e faamatalaina ia te ia le ala na e faatoilaloina ai faaosoosoga.

Emily G., 19 tausaga, Puerto Rico

O Loo Ia i Tatou le Malosi Faalelagi

E mafai ona e tau atu ma le agalelei i lau uo faapea e ui e ono le afaina se filifiliga leaga se tasi, e mafai ona ia taitai atu i agasala e sili atu ona ogaoga. E mafai foi ona e faasoa atu le mau lenei: “O Aʼu o le Alii e lē mafai ona Ou vaai i luga o le agasala ma sina tikeri itiiti o le faatagaina” (MF&F 1:31). Faamanatu atu i lau uo e tusa lava pe tasi se aafiaga i le agasala e mafai ona tatou le lagonaina ai le leo o le Agaga. O le mea e sili ona taua, ia iloa e ia e te alofa ia te ia ma o le faia o filifiliga sao o se vaega o lona malosi faalelagi i le avea ai ma se afafine o le Atua.

Adriana F., 17 tausaga, Arisona, ISA

E Na o le Faatasi o Le A Tiga ai

O mea leaga uma, e tusa lava pe na o le faatasi ona e faia, o le a tuliesea le Agaga. Afai e aluese le Agaga, o le a sili atu ona faigofie ia Satani ona faaosooso oe e faia nisi mea leaga. Ma le isi foi, o le a manaomia ona e salamo i au agasala uma lava e tusa lava po o le a le tele o taimi e faia ai, ma o le salamo i agasala matuia e mafai ona avea ma se faagasologa umi ma tiga.

Emily L., 14 tausaga, Iuta, ISA

Tumau le Malosi

Faamautinoa ia te ia e te alofa ia te ia, ma e te manao e fesoasoani ia te ia e filifili le mea sa‘o. Ou te iloa mai aafiaga patino, tatou te le manaomia ona tatou faia filifiliga e tutusa ma se isi ina ia malamalama ai i lena tagata. A o tatou ola i le talalelei, o le a fesoasoani le Agaga ia i tatou e iloa pe faapefea ona fesootai ma tagata. Faamanatu i lau uo e manaomia lona tumau malosi ina ia mafai ona ia fesoasoani i isi ia usiusitai i poloaiga. Tatalo ina ia mafai ona e fesoasoani ma auauna atu ia te ia.

Vanina P., 19 tausaga, Buenos Aires, Atenitina

E Te Le Ono Mafai ona Taofia

O le a ou ta‘u atu i la’u uo e aua lava nei mafaufau fua i ai. E le o se manatu lelei le fai o se mea leaga i se taimi se tasi aua e te ono le mafai ona toe taofi i le taimi lava e te amata ai. Sa tuuina mai e le Tama Faalelagi ia i tatou poloaiga e fesoasoani ia i tatou ia saogalemu ma fiafia ai.

Douglas B., 13 tausaga, Kalefonia, ISA

E Amata Laitiiti

Na saunoa mai Elder Jeffrey R. Holland i se tasi taimi “o se faigamalaga i ni maila se tele e amataina i se laa se tasi” (“Ua le Toe Ulu Mai i Lou Agaga Le Ita Mai ia te Au,” Liahona, Me 2010, 44). O le a ou fesoasoani i la‘u uo ia malamalama faapea e faaaoga e Satani faaosoosoga laiti e amata ai ona tatou agai i lalo i se ala leaga. Pe a e taumafai e fai faatasi lava se mea leaga, ua e faatagaina Satani ma ana au e amata ona faaosoosoina oe e fai ai pea lava pea.

Similoni F., 18 tausaga, Iuta, ISA

O tali ua faamoemoe e mo se fesoasoani ma ni manatu, ae e le o ni faalauiloaga aloaia o aoaoga faavae o le Ekalesia.

Aisea e Le Faataitai Ai?

“I nai tausaga ua mavae, sa fesili mai ai ia te au se tasi oa ma tama tama pe aisea e le o se mea lelei ai le faataitai o le alakaholo po o le tapaa e iloa ai pe faapei. … Sa ou tali atu afai e te manao e faataitai lena mea, e tatau ona alu o ia i le pa povi ma tago e ai sina maniua. Sa faamimigi o ia ma le maniti. ‘Auoi, e oso ai le fia ma’i i lena mea,’ lana tala na fai mai.

“‘Ou te fiafia ua faapena sou manatu,’ lau tala na fai atu, ‘ae aisea e te le faataitaia ai ina ia e iloa ai e oe lava? A o faatuina mai se manatu e te fia faataitaia se tasi o mea ua e iloa e le lelei mo oe, aisea la e te le faaaoga lena aoaoga i isi mea?’”

Elder Dallin H. Oaks o le Korama a Aposetolo e Toasefululua, “Agasala ma Puapuaga,” Liahona, Ape. 1994, 26.

Fesili o le a Sosoo Mai

“E palauvavale o‘u matua, faalogologo i musika malomaloa, ma matamata i ata le talafeagai o le TV. O le a se mea e mafai ona ou faia ia lagonaina ai le Agaga i le fale, ae maise lava i le aso Sa?”

Auina mai lau tali ma se atapue sili ona manino, pe a e manao i ai, a o lei oo i le aso 1 o Iulai, 2015, i le liahona.lds.org, po o le imeli i le [e-mail], pe lafo mai i le meli (tagai i le tuatusi i le itulau e 3).

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le imeli) e lolomiina ai lau tali ma lou ata.

E ono faapupuuina tali mo le uumi po o le manino.