O Le Paso o le Suesueina o Tusitusiga Paia
E alala le tusitala i Iuta, ISA.
E pei o le tuufaatasia o se paso, o taimi taitasi e te suesue ai i tusitusiga paia, e te mauaina se vaaiga faatuputupulaia pea o upumoni a le Atua.
Vaega o paso saunia e iStockphoto/Thinkstock; ata na tusia e Taia Morley
Ia Setema 2011, sa faatuina ai e tamaiti aoga i se iunivesite i Viatename se matatia fou i le lalolagi e ala i le tuufaatasia o le paso e aupito sili ona tele i le lalolagi. Na manaomia tamaiti aoga e 1,600, 17 itula e tuufaatasi ai uma fasi pepa e 551,232.
Na latou fatuina se paso e 48-futu i le 76-futu (15 m i le 23 m) e faaalia ai se fugalaau o le lili ma lau e ono e fai ma sui o tagata, faataatiaga faafaafanua, talafaasolopito, aganuu, aoaoga, ma le tamaoaiga. Mafaufau i ai—e silia ma le afa miliona tamai fasi pepa e faapipii faatasi e maua ai se ata tele. O fasi paso taitasi o lena paso atonu e foliga mai e le taua ma le manaia pe a tasi lava ia, ae o le paso e le atoa pe a na o le tasi se fasipepa o loo misi.
O tusitusiga paia e pei o se paso faapipii: o le tele lava o fasipepa e tuu faatasi, o le tele foi lea ona e vaai i upumoni o le fuafuaga a le Atua. A o faateleina lau vaaiga i lena fuafuaga, o le a e iloa ai o tusitusiga paia e matagofie ma e faatatau i lou olaga.
O ni nai fautuaga nei o le suesueina o tusitusiga paia e fesoasoani ia te oe e iloa ai le ata tele—ma faamatalaga laiti. A o e tuu faatasia nei fasipepa, o le a e vaaia upumoni ofoofogia, o loo faatalitali mai mo oe i tusitusiga paia.
Aoaoga Faavae: Fasipepa Tetele o Loo Aoao Mai Upumoni e Faavavau
O tusitusiga paia e aoaoina atu aoaoga ma mataupu faavae o le talalelei. “O tusi paia uma e mai le Agaga o le Atua ia, e aoga foi e aoao ai” (2 Timoteo 3:16). Talu ai e na o Iesu Keriso e mafai ona faaolaina i tatou (tagai i le Ioane 14:6), e tatau ona tatou aoao e uiga ia te Ia ma Ana aoaoga faavae. O le mafuaaga lena ua poloaiina ai e le Alii i tatou e “suesue outou i Tusi; aua … o Tusi foi ia o loo molimau ia te au” (Ioane 5:39).
Tagata: Fasipepa Felanulanuai o Loo Aoao Mai Lesona
E faitau selau tagata e faitau i ai i tusitusiga paia. O ai o i latou e sili ona tou fiafia i ai? Atonu e te tilotilo i luga ia Amona ona o lona usiusitai lototele pe a feagai ma tulaga matautia. Pe atonu e te manatu ia Iopu ma lona faatuatua le maluelue ma le amio sa‘o.
Na e faitau i le asini, na talanoa i lona matai (tagai i le Numera 22)? po o le tupu amioleaga na naunau e tuuina atu lona malo ina ia faamagaloina (tagai i le Alema 22)? po o le tamaitai na lauiloa o ia i lona nuu atoa i le avea ai ma se tagata o le mama (tagai i le Ruta 1–4)?
O loo i ai foi tagata i tusitusiga paia e le tele le alofagiaina. O a mea e mafai ona e aoao mai ia i latou ma le filifiliga le lelei latou te faia?
Silasila totoa i le tagata e te faitau e uiga i ai i tusitusiga paia, ma fai ifo ia te oe lava le auala e mafai ona e mulimuli ai i a latou faataitaiga lelei ma aloese ai mai a latou mea sese. I ni fasi paso o o latou olaga o nisi o fasi mea uma e aupito sili ona manaia ma felanulanuai. O a latou aafiaga o se auala e manatua pea e aoao ai ma manatua ai le mataupu faavae o le talalelei!
Faatusa: Mauaina o Vaega Natia
O nisi taimi o le mau e faaaogaina faatusa e aoao atu ai mataupu faavae o le talalelei. O le a e misia nisi fasipaso pe afai e te le vaai i le faatusa. E faaopoopo atu i vasega o le Ekalesia ma le seminare, fesoasoaniga mo suesuega e pei o le Taiala i Tusitusiga Paia po o le tusi lesona o le seminare ma inisitituti e mafai ona fesoasoani ia te oe e saili le fasipepa o loo misi.
Mo se faataitaiga, o le tala o Aperaamo ma Isaako (tagai i le Kenese 22), e musuia, ae e manaomia ai se uiga loloto atu pe a e iloa ai o se faatusa o le taulaga a lo tatou Tama Faalelagi ma o le taulaga togiola a le Faaola mo i tatou (tagai i le Iakopo 4:5).
O Le Agaga Paia: Mauaina o Vaega Fesootai
O nisi fasi paso e foliga mai latou te o faatasi, ae latou te fai lava si le fetaui i ai. E mafai ona fesoasoani le Agaga e te iloa ai po o fea vaega e o faatasi. A e valaauliaina Lana fesoasoani e ala i le tatalo ma mafaufau loloto, o le Agaga o le a fesoasoani e te iloa ai pe faapefea ona e faafesootai i fuaiupu ua e suesueina a o lei oo i mea e te suesue i ai i le taimi nei e faapena foi ma le auala e fesootai atu ai na aoaoga i lou olaga. O le tulaga e tatau ai, o le a e maua musumusuga mai i upu o i ai i tusitusiga paia, ae faapea foi mai le Agaga a o e mafaufau loloto i mea na e faitauina.
Faaaogaaga: O Le Tuufaatasia o Vaega
E te le iloa po o a ni ata o le a fausiaina e le paso pe afai e te le tuu faatasia ia vaega [uma]. E faapena foi, le aoaoga faavae, mataupu faavae ma poloaiga ua e aoaoina mai tusitusiga paia o le a le fesoasoani ia te oe lava sei vagana ua e ola i mea ua e aoaoina (tagai i le Ioane 7:17). A o e taumafai i aso taitasi e ola ai i le mataupu faavae o le talalelei na aoao mai i tusitusiga paia, o le a sili atu ona tuputupu ae malosi lo outou faatuatua ma molimau, ma o le suesueina o tusitusiga paia o le a avea ma se vaega taua o lou olaga.