Pe na Tatou Faia le Mea Sao?

Carlos Javier León Ugarte, Lima, Peru

Sa avea au o se tusitala lauiloa lea na tusitala mo nisi o mekasini lelei ma nusipepa i Lima, Peru, ae o lo‘u ituaiga olaga—mamao ese mai le Atua—sa faateleina ai le faatiga i lou mafaufau i aso taitasi. Ona o lenei mea, sa ou taliaina ai se galuega i le avea ai ma se siakifaitau mo se mekasini i le Itu o Ventanilla, e mamao ese mai lo‘u aiga. Sa matuai ou sailia se auala e alu ese ai mai lo‘u li’o o uo i lena taimi. I Ventanilla, sa ou lagonaina i lo‘u loto o le a suia lo’u olaga.

Sa i ai taimi ma te o ai i le lotu ma lau uo teine, o María Cristina, ae e uunai au e ni faifeautalai se toalua lelei, ma finafinau e ole atu i le Tama Faalelagi i le tatalo pe moni le Ekalesia. Sa ou faia lena mea, ma o le mea na ou lagonaina sa le mafaamatalaina. Ou te le‘i lagonaina muamua se malosi naua o le Agaga e pei o lena aso e le mafaagaloina.

Na faaipoipo ma papatisoina i se taimi puupuu mulimuli ane, sa ma lisiina se tamai potu, e le lelei i Ventanilla ma María Cristina. Ona o lo‘u galue malosi, sa ou siitia ai mai le siakifaitau i le faatonu o le mekasini ma le nusipepa a le kamupani. Ou te lei faatonu muamua lava, ae sa ou fiafia i le tofiga. E ui i lea, na amata ona suia mea uma ina ua fai ifo i lalo le tulaga faatonuina o a matou lomiga, i le lolomiina o aitema e fesiligia le tulaga mama. O nei suiga, sa faatonuina e o matou faatonu, na feteenai ma mataupu faavae o le Ekalesia ma tulaga faatauaina.

Sa ou manao lava e avea ma se faatonu, ae o le tulaga na ou le to‘a lelei ai. Na fautua mai lo matou epikopo pe afai tatou te faia mea e fiafia ai le Tama Faalelagi, o le a Ia faamanuiaina i tatou. Ina ua uma ona ma talanoa ma lo‘u toalua ma tatalo e uiga i lena mea, na ma lagona le uunaiga ua tatau ona ou faamavae i la’u galuega.

I ni nai aso mulimuli ane, sa amata ona ou lagona le lotovaivai ma mafaufau pe sa ou faia le mea sao. Ina ua uma ona ou faamavae, sa ou auina atu au tusi talosaga i ni nai kamupani ae sa leai se tali mai. Sa fautua mai María Cristina ma te toe tatalo, ma sa ma faia lena mea. Sa ma tatalo ina ia lelei mea uma ma ia aua nei vaivai lo ma faatuatua e ui lava ina sa faateleina pili.

I ni nai itula mulimuli ane na faamalosiau mai lo‘u toalua e valaau i se tasi o kamupani. Sa fai si lē talitonu, ae sa ou valaau. Sa ou maofa ina ua fai mai se taitai iina o lae toeitiiti lava valaau mai ia te au. Sa manao o ia e iloa pe mafai ona ou amata i le aso na sosoo ai!

Sa ma fetagisi i le olioli. Sa tali mai lo tatou Tama Faalelagi i a ma tatalo.

Sa tatau ona ma tuua le matou uarota ma le tele o uo lelei mo la‘u galuega fou, ae na ma tuua faatasi ma ni molimau malolosi atu. Ua ou mauaina nei se galuega faaaloalogia ma se totogi lelei, ma ua matou maua se nofoaga manaia e nonofo ai. I mea uma, ua faamanuiaina i matou ma le mautinoa pe a tatou faia mea e fiafia i ai le Atua, tatou te maua Ana faamanuiaga.