Ou Te Alofa ia te Oe

Natalee T. Fristrup, Iuta, ISA

Sa ou faliu ma iloa ai se teineitiiti laitiiti aulelei ma tootuli lemu ifo loa i ona autafa i luga o le auala maa.

Ata na tusia e Bradley H. Clark

A o faasolo ina faaiu le matou konafesi faalesone, sa ou tu i fafo atu ma tau mafaufau faapea, “O le a lau mea o loo fai i lenei atunuu ese? O le a faapefea ona ou faia mea uma ua faamoemoe mai ia te au?”

Sa ou i ai i Sicily, Italia, mo le silia laitiiti i le vaiaso, ae o lea ua ou lagonaina le lotovaivai. O lo‘u taimi i le nofoaga autu e aoao ai faifeautalai sa foliga mai e pei o se miti matagofie, ae ona o lo’u le atoatoa, ua ou lagonaina nei ua pei o loo ou i ai i se miti taufaafefe.

“Tama pele e,” sa ou tatalo ai, “sa ou manao e avea ma se faifeautalai maoae. O lenei ua ou i ai iinei, ua ou iloa e leo ia te au ni taleni, tomai, po o le atamai e faataunuu ai mea na auina mai au e fai. Sa ou manatu sa ou iloaina lenei gagana, ae o tagata uma e vave le latou tautatala, ma o soo se upu ou te taumafai e fai atu e pei lava e lavelavea i lo‘u laulaufaiva. Ou te manatu e le fiafia la‘u soa ia te au. O la‘u peresitene o le misiona e tau le iloa tautala faa-Peretania. Ou te le maua se tasi e talanoa i ai. Faamolemole, fesoasoani mai ia te au.”

Sa ou iloaina e tatau ona ou toe foi atu i totonu, ae sa ou tutu ai pea i le auala mo ni nai minute. Na faafuasei lava ona ou lagonaina le toso faatolu i tua o lo‘u pelaue. Sa ou faliu ma iloa ai se teineitiiti laitiiti aulelei ma tootuli lemu ifo ai i ona autafa i luga o le auala maa. Sa ia opoina lou ua i ona lima ma musumusu mai i lo’u taliga, “Ti voglio bene.”

“O le a lau tala?” Sa ou tali atu i le gagana Peretania, ma le iloaina atoatoa lelei na te le malamalama ia te au.

Sa ia sioa mai i lau pine. “Sorella Domenici,” sa ia faitauina, “ti voglio bene.”

Sa ou iloa le uiga o le fuaitau. O se tasi o fasifuaitau muamua na matou aoaoina i le avea ai ma faifeautalai. O se fuaitau e mafai ona tautala sa‘o atu i le agaga. O lona uiga, “Ou te alofa ia te oe.”

O na upu na o le pau lea o le mea sa ou fia faalogo i ai i lena taimi. Na auina mai e le Faaola se avefeau faapitoa e momoli mai ia te au. Sa ou taitai atu ai le teineitiiti laitiiti i totonu o le fale.

“Masalo o se tama a se tasi o tagata o le ekalesia,” sa ou mafaufau ai. Sa ou faaofiofi atu i vaega o faifeautalai, ma le faamoemoe o le a iloa mai o ia e lona tina.

Ina ua ou maua la‘u soa, sa ou fesili atu, “Na e vaai muamua i lenei teineitiiti?”

“O le a le teineitiiti?” sa ia tali mai, ma foliga le mautonu.

Sa ou tilotilo ifo i o‘u autafa. Ua leai se teineitiiti.

Sa ou tu i le faitotoa na matala o le fale ma tilotilo i luga ma lalo o le auala gaogao. A o ou mafaufau loloto, o se musumusu sa le gata ina sa ou faalogoina ae sa lagonaina foi leotele mai i lo‘u agaga: “Sorella Domenici, ti voglio bene.”

Sa ou le iloa po o ai le teineitiiti, ae na ou iloaina e alofa le Faaola ia te au.