E Le Siitia
E alala le tusitala i Iuta, ISA.
Ai ua fai e lau peresitene o le misiona se mea sese—o le a se mea ou te ono aoao mai i le nofo faaumiumi ai i lenei eria?
Ata o le faitotoa saunia e gracethang/iStock/Thinkstock; ata o le atopau saunia e monticello/iStock/Thinkstock
Sa ou tuua lo‘u aiga i NanTze, Taiuani, e avea ma se faifeautalai faamisiona i Kalefonia i matu i le 2005. Sa laitiiti lava le eria no tofia i ai i maua ma lau soa ma i totonu o le fa ma le afa masina ua uma ona ma tuitui i faitotoa o auala uma i le eria autu o le taulaga. Sa faigata le galuega faafaifeautalai, ma o tagata sa masani ona feei mai ia i maua. Sa i ai ni nai ma tagata sailiili. Sa foliga mai ia te au o le galuega e leo agai i se mea. Ina ua mavae le fa masina iina, sa ou sauni e tuua le eria. Sa ou talitonu o le a ou siitia.
I le po o le aso Sa sa ou faatalitali i talaane o le telefoni seia oo ina valaau mai lo‘u taitai sone. Ina ua ia lipotia mai ua tofia au e tumau ai i le eria lenei mo se isi ono vaiaso, sa ou le talitonu i o‘u taliga. Sa ou mafaufau masalo ua i ai se mea sese!
O le vaiaso na sosoo ai o se mala lava mo a‘u ma atonu na faapena lau soa ma tagata foi i lalo o le ma tausiga. Sa ou musu e talitonu o le filifiliga sa‘o lea. Ae, ou te faia lava se ataata lapoa i soo se taimi lava ma te vaai ai po o le talanoa i tagata, ae o lo‘u loto sa ou tumau i le le fiafia. I lo‘u faamaualuga, sa faaauau pea ona ou ta’u atu ia te au lava ia ou te leo i ai i le nofoaga sa tatau ona ou i ai. Sa ou moomoo pea o le a valaau mai la‘u peresitene o le misiona e ta’u mai ia te au ua ou siitia ese atu i se isi eria.
O le Ala na oo Mai ai se Faamautinoaga
O le taeao o le aso Sa na sosoo ai ao ou sauni ma le musua mo le lotu, sa tatagi le telefoni. O le peresitene o le misiona. Sa ia faafeiloaia a‘u i lona leo agalelei masani, ma le agaalofa ma faapea mai, “Sister Cho, o ananafi i le aiga o le aoauli sa ou mafaufau ai ia te oe ma maua ai se lagona e tatau ona ou valaau atu ia te oe ma faailoa atu ia te oe o loo e i ai i le nofoaga sa’o. O loo e i ai i le mea e tatau ona e i ai.” Sa maligi ou loimata ina ua ou faalogo i ana upu.
Sa ou faafetai atu ia te ia ma tuu i lalo le telefoni. A o amata ona ou tagi, sa oo mai ma le malosi i lou loto se lagona manino ma le mama faapea sa i ai ni tofiga e lei faataunuuina o loo faatalitali mai ia te au i la matou eria. Sa ou iloa foi e silafia e lo‘u Tama Faalelagi ou mafaufauga ma lou le fiafia. Sa ia malamalama i lo‘u vaivaiga, ma na Ia auina mai Lana auauna ina ia toe faamautinoa mai ia te au.
Ina ua mavae lena valaau i le telefoni, sa amata ona ou galue malosi loa. Sa ou tatalo mo le malosi i aso uma, ma ole atu ia sili atu ona manino le vaai pe faapefea ona mafai ona ou faia mea na faamoemoe le Alii ia te au e fai. I le lima vaiaso na sosoo ai, na ma molimauina ma lau soa ni vavega se tele a o ma faaaogaina ia lava le faatuatua e galulue malosi ai. Sa siitia mai se tagata sailiili i totonu o le ma eria ma na papatisoina i totonu o le taimi o lena siitaga.
Sa valaaulia foi i maua i totonu o fale o tagata o e na muai le taliaina i maua. Na matou feiloai i le toatele o tagata fou o e sa i ai ni faigata ma na faamanuiaina ai e faasoa atu ni upu faamafanafana a le Atua ma i latou. E ui lava e lei filifili nisi e papatiso i lena taimi, o le a ou le faagaloina lava o latou foliga susulu po o le ala na pai atu ai le Agaga ma le alofa o le Atua i o latou loto—ma aʼu foi.
O le Mea Na ou Aoaoina
Sa ou aoaoina e silafia moni lava e le Alii i tatou taitoatasi; Na te le auina atu Ana faifeautalai i nofoaga e aunoa ma se mafuaaga. Sa ou aoaoina a tofia loa i tatou i se eria, e finagalo le Alii e faaaoga iina i tatou o ni meafaigaluega e faataunuu ai Lana galuega. Pe a tatou tuuina i tatou lava i Ona aao, e tutupu vavega ma e faamaluluina loto, e tusa lava pe tatou te le vaai pe faapefea ona mafai lea mea.
O le mea taua, sa ou aoaoina o la‘u peresitene o le misiona, e pei o isi taitai o le Ekalesia, sa valaauina moni lava e le Atua e avea ma Ana auauna. E faaagavaaina e le Alii o tatou taitai e mauaina le faaaliga ma le musumusuga tatou te manaomia mo le manuia o o tatou agaga.
Ou te faafetai pea lava pea mo le aafiaga na oo mai o se taunuuga o le le siitia ese.