O Le Uluai Aso o Tama o le Lumanai a Steven
E alala le tusitala i Kuiniselani, Ausetalia.
Sa afe e Steven i luga lona fusiua i lalo tonu lava o lona auvae a o faataitaiina e le toatele o tamaiti Peraimeri le pese fou. Leai, e leai se auala o le a ia usuina ai lenei pese.
O le tama o lo matou aiga e taitaia lo matou aiga. …
Sa tilotilo Steven i fafo i le faamalama ma luga i le taualuga. Na matuai feminoiai solo o ia i lona nofoa na toetoe lava a siva. Sa le mafai ona ia pese e tusa lava pe sa ia manao ai. Sa i ai se mea tele ma le faalavelave sa mau i lona fa’ai. Sa faauau pea ona pepese isi tamaiti o le Peraimeri, i le aoaoina o upu fou, e taitasi laina i le taimi.
I le malamalama o le poto i mea uma ua sa‘o;
O lou tama e lelei ia te au (“Fathers,” Children’s Songbook, 209).
Sa lagona e Steven se popo i luga o lona lima. O lona tina, o le sa tilotilo mai ma le filemu i le faitotoa o le potu o le Peraimeri, sa uuina lemu atu lona lima. Sa ia taitaiina atu o ia i fafo i le potu tele. Ua mamao mai ana uo i le Peraimeri, sa le mafai ona taofia e Steven le maligi o ona loimata. Na opo faalatalata mai e tina o ia i se opo mafanafana, ma le malosi.
“E le afaina le le fiafia,” o le tala lea a Tina, a o popo lemu lona tua. “Ou te iloa o le faalogoina ma le usuina o lena pese e faigata.”
Sa lue atu le ulu o Steven, ona solo lea o ona mata. “Ou te le manao e pese i le Aso o Tama ona e leai sou tama.” Sa mumu mata o Steven, ma sa ia ūina lona laugutu. “Ou te le toe fia taua o ia o Tama. Ou te lei vaai ia te ia i le tele o tausaga, ma e le manao foi o ia e avea ma o‘u tama.”
Sa taumafai malosi lava Steven e aua le tagi—ae na lagona atu lava e i latou o pepese. O lena pese na ona faatiga ai o ia i totonu o lona fatu. E pei lava o le taimi na tusi mai ai lona tama ma fai mai o ia ma lona toalua fou ua filifili na te le toe vaai ia Steven po o lona uso.
Na toe opo mai e Tina o ia mo se isi opo, ma sa faamaligi e Steven ni nai isi loimata ma faasusu ai lona ofutino [Tina]. “O le a ou talanoa atu i le peresitene o le Peraimeri. E le tatau ona e pese pe a e le manao ai. Ae sole—ua ou maua se manatu.” Sa tilotilo sao atu Tina i ona mata. “O le tausaga lenei tatou te le faamanatuina ai le Aso o Tama—o le a tatou faamanatuina le Aso o Tama o le Lumanai!” Sa ataata o ia, ae sa sioa mai i ai Steve.
“Ea? Faamanatu le a?”
“Aso o Tama o le lumanai—o le a tatou faamanatuina le ofoofogia o le a avea ai oe ma lou uso o ni tamā i se aso. O le a tatou faia ni meaalofa ma se keke ma lau vaiinu e sili ona e fiafia i ai!”
Sa sogi atu Tina i lona muaulu ona taumafai lea e faaleleia lona fusiua ua maanuminumi. “O oe, Steven, o le a avea ma se tama atamai—ua ou iloaina lava. Aua ua uma ona e mafaufau i le mea o le a e faia ma au tamaiti ma ua fuafuaina le ituaiga tama o le a avea ai oe.”
O le tele ona mafaufau Steven i ai, o le faateleina foi lena o lana ataata. Sa ia fusi ia Tina ma toe foi atu i le Peraimeri ma se lagona e sili atu ona lelei.
I le lua vaiaso mulimuli ane, sa tu Steven i luma o le faaata, ma faasa’o lona fusiua fou manaia. Na tuuina atu e Tina ia te ia i lena taeao mo lona uluai Aso o Tama o le Lumanai! Sa piki e Steven i luga ana tusitusiga paia ma savali atu i le faitotoa i luma e alu i le lotu.
Sa ataata o ia i lona tina.
“Manuia le Aso o Tama, Tina.”
Na ataata Tina. “Manuia le Aso o Tama o le Lumanai, Steven.”
Ata na tusia e Alyssa Tallent