Auaunaga i le Ekalesia
O La‘u Lesona i le Alofa
E alala le tusitala i Kalefonia, ISA.
Ou te lei faamoemoeina le galuega fesoasoani faatauvaa e aoao mai ai ia te au ni mea se tele e uiga i le alofa o le Tama Faalelagi mo Ana fanau.
Ata na tusia e Doug Fakkel
Na foliga mai o se galuega masani o le auauna atu: e ao mai se vaega o uso o le Aualofa e faatulaga se polokalama o se aufaipese laitiiti i se nofoaga autu e tausia ai gasegase i se falemai i le lotoifale, e ui lava e leai se tasi mai le matou uarota o i ai.
Sa matou faaofiofi i totonu o se potu laitiiti faatasi ma le toaiva o gasegase matutua o faasasaga mai ia te i matou o latou nofoa faataavalevale. Sa foliga gaogao mai o latou fofoga, e leai ni lagona faaalia. Sa vevela ma leai se ea, ma sa ou mafaufau, “Sei o tatou faavave uma lenei mea.”
Sa ou taitaia le musika, o lea sa ou fuli atu ai lo‘u tua i gasegase ma sa taulai i le polokalama. A o matou amataina, sa ou faalogo i se tasi ma’i o valaau, “Mama, Mama,” a o le isi ua patipati ma pisa. Sa ou lagona le le mautonu, ae i ni nai minute o le a matou faauma ai ma o i le fale.
A o matou sauni e usu le pese faaiu, “Ua Sili Oe” (Viiga, nu. 46), sa matou valaaulia gasegase ma fomai e pepese faatasi ma i matou. Sa ou faliu e taitai tagata uma i le pese, ma o le taimi lena sa ou vaai ai ia te ia—se tamaitai laitiiti, maanuminumi, lauulu-sinasina ma luga o le vae ua tumu i pepa solo ua susū i ona loimata.
Sa ia gego mai ia te au e sau ia te ia. Sa ou faia, ma ina ua ou punou lou ulu ma faalogo, sa ia uuina lo‘u lima. Sa tetete lona tino atoa a o ia musumusu mai, “O au o se Au Paia o Aso e Gata Ai. E ese le manaia o le o mai o ou uso.”
Sa faatumulia lo‘u loto i le Agaga, ma sa ou tootuli i talaane o ia, ma loimata ua tafe mai i oʼu mata. Sa ia tuu se lima ua vaivai faataamilo ia te au ma pōpō ia te au e pei o loo ia malamalama i o‘u lagona. Sa amata e tagata uma ona usu le viiga, ae sa le mafai ona ou usuina le fuaiupu muamua.
A o usuina e gasegase ma le aufaigaluega le tulaga maoae o le Atua, sa faatumulia le potu i le Agaga, ma na pai atu i tagata uma. Na iu ina ou pulea o‘u lagona ma auai faatasi ma isi, i le usuina:
A afio mai Iesu, i le mamalu,
Ma ave au, ai sou fiafia!
Ou te ifo ai
Ma tautino atu, “Lo‘u Atua e, ua sili lava oe!”
Ina ua maea le polokalama sa fefiloi tuafafine o le Aualofa ma le aufaigaluega ma gasegase. Sa fai mai le tuafafine lauulu-sinasina sa ia lagonaina le tuuatoatasi ma sa siomia e ni tagata ese seia oo ina matou o mai. Matou te lei iloa o le a i ai o ia iina, ae sa silafia e le Tama Faalelagi.
Sa toe faamanatu mai ia te au o nei tagata uma o o tatou tuagane ma uso, latou te manaomia le alofa ma le mafanafana, ma e i ai se aso o le a mafai ona ou i ai i lo latou tulaga. Sa ootia au ona e mafai ona avea i tatou ma meafaigaluega a se Tama alofa, ma sa ou faafetai o le matou galuega auauna atu na aoaoina mai ia te au se lesona mamana e uiga i le alofa.