Seia Tatou Toe Feiloai
TUU NEI LOA
Saunia e Peresitene Boyd K. Packer
Peresitene o le Korama a Aposetolo e Toasefululua
Mai le “Pulupasama o Kiliata,” Liahona, Ian. 1988, 13–5.
Sa nutipalaina le lalolagi o lau uo. Ua maliu lona faletua.
Ata na tusia e Paul Mann
Afai o e mafatia mai le popole, mai le faanoanoa po o le maasiasi po o le loto leaga po o le le fiafia po o le lotoleaga, mai le tuuaia o oe lava-ia po o le tauamiotonuina o oe lava-ia, mafaufau i lenei lesona na aoaoina ai au i le tele o tausaga ua mavae e se peteriaka. O ia o se tagata e paia faatoa ou vaaia. …
Sa ia tuputupu ae i se nuu laitiiti ma se naunautaiga ina ia faia se mea e manuia ai ia lava. Sa ia tauivi ina ia maua se aoaoga.
Sa ia faaipoipo i lana manamea, ma o le taimi nei ua lelei mea uma. Sa lelei lana galuega, faatasi ai ma se lumanai manuia. Sa matuai faamemelo le tasi i le isi, ma sa vave ona maitaga lona faletua i lo la alo muamua.
O le po na fanau ai le pepe sa i ai ni faigata. Na o le tasi le fomai ae sa i ai i se nuu maotua, o loo togafiti foi se isi ma’i. …
Mulimuli ane, na maua mai le fomai. I le potu o faalavelave faafuasei, sa ia galue vave ma e lei umi ae tulaga lelei mea uma. Na fanau le pepe ma o le faalavelave, sa foliga mai, ua leai.
I ni nai aso mulimuli ane, na maliu ai si tina talavou mai le siama na togafiti e le fomai i le isi aiga i lena po.
Sa nutipalaina le lalolagi o Ioane. Ua le sagatonu mea uma i le taimi nei; ua sese mea uma. Ua maliu lona faletua. Sa leai se auala e mafai ai ona ia tausia le pepe ma fai lana galuega.
A o gasolo pea vaiaso, sa faateleina lona faanoanoa. “E le tatau ona faatagaina le fomai e galue,” sa ia fai mai ai. “Na ia aumaia lena siama i lo‘u toalua. Pe ana faaeteete o ia, faapenei o ola pea o ia.”
Sa pumoomoo lona manatu, ma i le oona matuitui o ona lagona, sa amata ai ona taufaamatau. …
I se tasi po na tu’itu’i mai ai le faitotoa. Sa pau lava le tala a se teineitiiti, “E manao Tama e te alu atu. O loo fia talanoa ia te oe.”
O “Tama” o le peresitene o le siteki. …
O lenei leoleo mamoe faaleagaga sa mataituina lana lafu ma sa i ai se mea e fia fai atu ia te ia.
O le fautuaga mai lena taitai atamai sa faigofie lava, “Ioane, tuu lena mea. E leai se mea e mafai ona e faia e toe faafoi mai ai o ia. Soo se mea lava e te faia o le a na ona atili ai ona leaga. Ioane, tuu lena mea.” …
Sa ia tauivi i le tiga e pulea o ia lava. Ma mulimuli ane, sa ia naunau ai o nisi lava mea na tutupu, e tatau ona ia usiusitai.
O le usiusitai o se vailaau mamana faaleagaga. E latalata lava i le avea ma se faamalologa mo mea uma.
Sa ia naunau e mulimuli i le fautuaga a lena taitai atamai faaleagaga. O le a ia tuu lena mea.
Ona ia fai mai lea, “… Faatoa ou vaai mulimuli ane ina ua ou toeaina i se fomai mativa mai se nuu maotua—e uumi taimi e galue ai, e le lava le totogi, e fealua’i solo ma le vaivai mai lea ma’i i lea ma’i, ma ni nai vailaau laiti, leai se falemai, ma ni nai meafaigaluega, e tauivi e faasaoina soifua, ma sa faamanuiaina i le tele o taimi.
“Sa ia sau i le taimi o faigata, a o tulaga lamatia uma soifua e lua, ma sa ia galue e aunoa ma le faatuai.
“Sa avea au ma se toeaina,” na ia toe faapea mai, “faatoa ou malamalama ai! Semanu ou te faataumaoia lo‘u olaga,” na ia saunoa ai, “ma olaga o isi.”
E tele taimi na ia faafetai atu ai i le Alii i ona tulivae mo se taitai perisitua atamai lea na faigofie lava lana fautuaga, “Ioane, tuu lena mea.”