Sailia o le Laveai
E alala le tusitala i Iuta, ISA.
E pei o alii e 33 na maileia i se maina na solo i Chile, e mafai ona tatou lagonaina le maileia i o tatou tofotofoga ma vaivaiga; ae peitai, e ala i le ata o le faaolataga e mafai ona tatou maua le faamoemoe mo se laveai.
Ata na tusia mai iStockphoto/Thinkstock
I le aso 5 o Aokuso, 2010, e 33 tagata o Chile e galulue i maina sa maileia i se solo maoae ina ua solo ifo i lalo le papa i totonu o le maina. Sa lokaina i latou i se vaega itiiti o le saogalemu ma auala o le maina i lalo o le solo, 2,300 futu (700 m) le loloto i totonu o le eleele.
Sa foliga mai ua leai se faamoemoe. Na vavae ese i latou mai aiga ma auaiga e toetoe lava o le afa o se maila mai se papa e le mafai ona aveese o i luga atu, ma e na o se sapalai laitiiti o meaai ma vai o loo ia i latou. E ui ina sa i ai a latou meafaigaluega ma le atamai, ae ona o le le saogalemu o le maina e le mafai ai ona latou faaolaina i latou lava. Na pau lava lo latou avanoa o le mauaina lea ma laveaiina e se tasi.
E ui lava i lenei mea, sa latou filifili ia maua le faamoemoe. Na latou faatulagaina i latou lava, fuafua lelei a latou meaai ma vai, ma faatalitali. Sa latou faatuatua ia i latou o loo i luga ia faia le mea sili latou te mafaia e laveai ai i latou. E oo lava i lea, ai se faigata ona taofimau i lena faamoemoe a o latou faatalitali i le pogisa. Ua mavae aso, ona sosoo lea ma vaiaso. Na uma a latou meaai na faasoasoaina ma le faaeteete.
Sa ou mafatia i se solo maoae i lo‘u lava olaga. Ua vaai atu o‘u mata, i lo’u atalii aulelei, malie, ma le atoatoa o le malosi e valu tausaga le matua na oti i se faalavelave tautaavale. Sa ou siiina lona tino a o masaa atu lona toto i luga o le auala ma na aluese malie atu lona agaga ma toe foi atu i lona aiga i le lagi. Sa ou aioi atu i lo‘u Tama Faalelagi ina ia tuu mai o ia ia ola, ae e le o le fuafuaga lena o le olaga o lo’u atalii.
Sa ou leiloa i le pogisa, ua lofituina i le avega o lo‘u faanoanoa. Sa ou vaivai, e le mafai ona malolo, a o puaoa lau vaai i le faafitauli o le olaga nei. Na ou iloa o se loto momomo o se lagona moni o le faaletino. O le mea sa i ai lou fatu, ua i ai nei se gaogao ii pogisa sa matuitui ma tiga.
Sa ou talitonu ua tatau ona lava si ou malosi e malo ai. E toatele tagata sa sili atu le mafatia. Ae e pei o le au galulue maina, na maileia e le papa e le mafai ona fuliese na faafalepuipuia i latou, na ou le mafai ona aveese le avega o lo‘u faanoanoa.
I le tele o auala tatou te lagonaina uma le maileia. O nisi atonu e maileia i tofotofoga faaletagata lava ia, vaivaiga, po o tulaga faigata i le olaga. Ae ui i lea, e i ai le mafanafana i le iloaina o le olaga faaletino o se taimi tatou te tuputupu ae malolosi ai a o tatou feagai ma lo tatou faanoanoa ma le faavauvau. Tatou te maua ai le faamoemoe ia Iesu Keriso.
O Se Ave o le La o le Faamoemoe
I le aso lona 17 o lo latou puapuaga, na faafouina le faamoemoe mo le au galulue maina ina ua faia se auala vaiti i se auvili lena na faapu ai le papa na punitia ai i latou.
O alii na maileia, i le manao ia iloa e le au laveai o i luga ua mauaina i latou o loo feola, na tatui atu i le auvili ma faapipii se tusi puupuu lanu mumu i le pito o le auvili. E faitauina faapea, “Estamos bien en el refugio, los 33” (“O loo manuia i matou i le malu, le au 33”). Na toefuatai mai le faamoemoe. Ua maua i latou.
E ala i se tamai pu, o le faataamilo o se moli ai suka, na faafoeina ai le fesootaiga ma le lalolagi i luga. O meaai, vai, vailaau, ma tusi pupuu mai e pele ia i latou na auina atu i lalo i le tamai pu i le au galulue maina.
Atonu na maua e le au galulue maina ni lagona fefiloi a o latou iloaina lo latou tulaga. E ui ina sa latou olioli tele ma faagaeetia ua maua i latou, o lo latou tulaga sa faaeteete gata lava. E ui lava ina ua iloa e i latou i luga le mea o loo latou i ai, o le a manaomia se taimi e faatino ai se fuafuaga o le laveai, ma na pau lo latou faamoemoe ia faamanuiaina.
Sa logo atu e le au laveai ma le musuā le au galulue maina o le a faitau masina faatoa mafai ona aumai i latou i luga. Na latou faamoemoe ia toe faatasia le au galulue maina ma o latou aiga i le Kerisimasi, o lona uiga o le au galulue maina o le a feagai ma se tuugamau mo le isi fa masina faaopoopo. Ae ui i lea, ua latou faatalitali nei ma le faamoemoe.
Ua i ai foi so tatou ave o le la o le faamoemoe. A o lei foafoaina lenei lalolagi, sa faatulagaina se fuafuaga e laveai i tatou. Sa saunia e le Tama Faalelagi se Faaola mo i tatou, o le a laveaiina i tatou mai lo tatou olaga faaletino, mai a tatou agasala, mai o tatou vaivaiga, ma mai mea uma tatou te puapuagatia ai i lenei olaga. O ia o lē tuuina mai le faamoemoe, ma le ola. Sa ia asaina le ala mo i tatou e toe foi atu ai i lo tatou Tama Faalelagi, ma toe faatasia ai ma e pele ua maliliu. Ua ia tu i tafatafa o i tatou e tauave le mamafa o avega ua tatou tauave, solo o tatou loimata, ma aumaia ia i tatou le filemu. Na Ia afio mai e toe faafoi atu i tatou i le lagi, pe afai tatou te mulimuli i le fuafuaga na Ia faatulagaina.
O Le Laveai
E ui ina eseese ni taumafaiga na faia e laveai ai le au galulue maina, e na o le tasi le auvili na mulimuli i le ala sa‘o, e ala atu i tamai pu laiti faataitai na viliina muamua ina ia iloa ai le mea o i ai le au galulue maina.
Sa tau le mautonu le au galulue maina i lo latou laveaiina. A o tu’i atu e le auvili lona ala i lo latou laveaiina, na pauu atu i lalo maa i le pu laitiiti ma faaputu agai i luga i le ana o loo saisaitia ai le au galulue maina. Na latou lau ese maa a o agai mai lalo, ma faaavanoa le ala mo le auvili e lapoa atu.
Sa fausia e le au laveai se pusa e mafai ona tuutuu ifo i lalo i le pu vaapiapi e faaaoga ai uaea. Sa toeitiiti lava le lava le lapoa o le pusa laveai e ofi ai se tagata i totonu. O le pusa sa na o le fa inisi (10 cm) e vaiti ai nai lo le pu lea na vili atu i le 2,300 futu (700 m) o le papa malo.
Ina ua oo i le taimi mo le au galulue maina e laveaiina ai, o alii taitasi na feagai ma se filifiliga. Sa taitoatasi ona laa atu se tagata i le pusa; e tatau ona o ae taitoatasi i luga. A o filifili alii taitoatasi e talitonu i le fuafuaga, e tatau ona ia faamoemoe o le a tosoina atu le pusa i luga o le ala vaapiapi i se auala moni ma le sa‘o ae aua nei sipa ma mau ai. Sa tatau ona manuia le fuafuaga, pe o le a leai se faamoemoe. Na laa atu taitoatasi le au galulue maina i le pusa ma tuuina atu lona faatuatuaga i le fuafuaga ma le au laveai.
Sa taitoatasi ona faia e le au galulue maina le malaga taitoatasi i luga mai le pouliuli ma agai atu i le malamalama. Sa faafeiloaia i latou e e pele ia i latou a o matamata mai le lalolagi atoa ma faamalosiau atu.
Sa faamanuiaina le fuafuaga laveai; e leai se tagata e toatasi na maliu. Sa laveaiina i latou i le aso 13 o Oketopa, 2010—69 aso talu ona solo le maina ma le 52 aso talu ona maua i latou o loo feola.
Talitonu i le Togiola a Iesu Keriso.
E tatau ona tatou filifili taitasi e tuu atu o tatou loto e faalagolago i lo tatou Faaola o Iesu Keriso. Mo i tatou, ua na o le tasi lava le fuafuaga laveai; o loo i totonu ma e ala mai i Lana taulaga togiola. Na alu ifo o Ia i lalo o mea uma e laveai i tatou.
Keriso i Ketesemane, saunia e Harry Anderson.
E pei lava o le au galulue maina, o la tatou laveai o le laveai o se tagata lava ia. E ui lava o le faaolataga o loo avanoa mo tagata uma, o la tatou sootaga ma le Faaola o se sootaga mafanafana ma patino. E tatau ona tatou filifili taitasi e tuu atu o tatou loto e faalagolago i lo tatou Faaola o Iesu Keriso.
Ona o le paia e faavavau o le faitalia o le tagata lea na faavaeina ai lenei olaga faaletino, e le mafai e le Faaola ona aveese mai ia i tatou lo tatou loto. Ua tatou saoloto e filifili. O loo tu le Faaola i tafatafa o i tatou o loo faatalitali mai e faamaloloina o tatou manua ma siitia i tatou i le faaolataga e faavavau, ae faatoa Ia mafai ona faia i la tatou valaaulia. E tatau ona tatou filifilia o Ia. Mo i tatou, ua na o le tasi le fuafuaga o le laveai; e i totonu ma e ala mai i Lana taulaga togiola. Na alu ifo i lalo o mea uma e laveai i tatou.
Na oo mai lou laveai a o ou tootuli i ou tulivae i le loloto o le faanoanoa i le oti o lou atalii. E pei o le au galulue maina a o latou ulu atu i le pusa, sa ou i ai i se taimi sili ona maaleale: pe tatau ona ou taumafai e faatoilalo ou luitau i lo‘u lava malosi ma le atamai, pe e tatau ona ou aapa atu i lo’u Tama Faalelagi ma fesili atu mo se fesoasoani?
I le faavauvau ai i le mamafatu o lo‘u faanoanoa, sa ou filifili e liliu atu i le Atua. A o ou ole atu i lo‘u Tama oi le Lagi, sa ou tau atu ia te Ia lou vaivai tele ua i ai ma ole atu ia te Ia e siitia i luga le avega o lo’u faanoanoa. A e ou te lei toe tu i luga, o le mamafa o o‘u faanoanoaga sa siitia ese mai ou tauau. Sa manaomia ona ou galue pea i le tiga ma le mafatia, ae ua leai le avega e le mafai ona tatalia.
O iina na ou iloa ai e tu le Faaola i o tatou tafatafa, ma faatalitali e siitia i tatou, e na ona faatalitali mo i tatou e fesili atu ia te Ia, e faatalitali mo i tatou e tuuina atu a tatou avega i luga o Lona tauau, e faatalitali mo i tatou e tuu atu o tatou lima i Lona aao ina ia mafai ona Ia laveai i tatou.
O i tatou—e pei o le au galulue maina, o e ua tatau ona toso le faitotoa o le pusa ia tapunia i tua atu o i latou ma faalagolago i lo latou au laveai—e tatau ona tatou tuu atu lo tatou loto i le Faaola ma faalagolago i Lana fuafuaga laveai mo i tatou.
O lo‘u faamoemoe, pe a ou faia lena malaga toatasi na o au mai lenei olaga i le isi, o le a i ai le olioli a o ou toe faatasia ma i latou o e na malaga muamua atu ia te au! I le taimi nei ou te iloa o lo‘u Faaola o loo soifua ma e alofa ia te au ma o loo tu i ou tafatafa.