O Se FilifiligaFaigata
E alala le tusitala i Iuta, ISA.
Pe mafai e se taaloga vitio leaga ona maimau ai sana uo fou?
“Filifili tau o mea tonu, tau mai e le Agaga Sa” (Viiga, nu. 149).
Sa aeae atu Diego i luga o le mauga i lona fale mai le aoga. O le malologa puupuu sa masani lava o le vaega sili ona manaia o le aso. Ae o le vaiaso atoa sa matautia! E leai se tasi sa fia taalo lapaki ma ia, o lea na savalivali faataamilo ai i le malae taalo na o ia lava seia oo ina ta le logo.
“Tina, lea ua ou sau i le fale!” Sa ee atu ai Diego a‘o ia faaofiofi atu i le faitotoa ma nofo i lalo i le umukuka.
“Na faapefea mai le aoga?” O le fesili lea a tina.
“E le lelei tele.” Sa uu mai e Diego se apu. “E leai se tasi sa manao ma te taaalo i le malologa.” Sa ia lagonaina loimata ua maligi, lea na moeiini mau ai ona mata.
“E faigata le lagona o le tuuatoatasi po o le faaesea,” o le tala lea a Tina. Sa ia tuu atu lona lima i luga o le tauau o Diego. “Atonu e mafai ona e faia se tatalo mo se fesoasoani.”
Sa solo e Diego ona mata. “Faafetai, Tina,” na ia fai mai ai ma tamoe atu i lona potu. Pe na popole moni lava le Tama Faalelagi pe sa i ai ni ana uo e taaalo faatasi i le malologa? Sa tootuli i lalo Diego ma tatalo ina ia mafai ona ia maua se uo. Ina ua maea, sa ia maua se lagona sili atu, ae sa ia leiloa pea le mea e fai.
Ina ua tuua le aoga i le aso na sosoo ai, na tatagi mai le logo o le faitotoa. Sa tamoe Diego e tatala le faitotoa. Sa i ai se tamaitiiti fou i le vai aai o loo tutu ai iina. Sa vaai Diego ia te ia i le malae taalo i le aso.
“Talofa, o au o Ruben,” o lana tala lea. “Pe e te fia taalo i lou fale?”
Sa ataata Diego. Se uo e taaalo faatasi? O se tali i lana tatalo!
Sa la savavali atu i le fale o Ruben ma saofafai i lalo i le nofoa. Sa taalo le uso matua o Ruben i se taaloga vitio. Sa leiloa e Diego se mea e mafaufau i ai i le taimi muamua. Sa matuai matautia lava le taaloga ma sa i ai ni ata leaga, ae sa foliga mai sa fiafia i ai Ruben ma lona uso. “Pue mai ia!” Sa ee atu ai Ruben a o la matamata.
Sa lagona e Diego ua faaletonu lona manava, sa ia sioa atu i lalo i ona vae. Sa ia iloa e le tatau ona ia matamata i taaloga vitio faapenei.
Ae o le a se mea e mafai ona ia faia?
Na te le‘i manao i lana uo fou e manatu sa le manaia tele le taalo i taaloga vitio e ese le manaia. Pe o le a manatu Ruben e ese lava ia pe afai e fai atu sana tala?
Sa ia tilotilo solo i le potu ma taumafai e mafaufau i isi mea e mafai ona latou faia.
Sa manava loloa Diego. “Ei, a … e mafai ona e faaali mai ia te au le vaega o totoe o le tou fale? Pe atonu e mafai ona ta taaalo i le falealuga?” o lana tala lea.
Sa tilotilo atu Ruben ia Diego mo se sekone. Sa u e Diego lona laugutu. Pe o le a fai mai Ruben e le o toe manao e taalo?
Ona fiafia lea o mata o Ruben. “Faatali, e te fiafia i taavale? O loo ia te au ni taavale e sili ona saoasaoa. E te manao e faataututuu?”
Sa ataata Diego ma luelue lona ulu. Sa ia mulimuli ia Ruben i le falealuga. Na siitia ese le lagona mamafa—sa ia lagonaina e pei ua ia lele i luga o faasitepu! Sa fiafia o ia ua i ai sana uo fou, ma sa fiafia o ia na te lei matamata i se mea leaga.
“O le taavale mumu o au,” o le tala lea a Ruben, “ae e mafai ona e faaaogaina le lanumoana po o le lanu meamata. O le fea e te manao ai?”
Sa aapa atu Diego mo le taavale lanu meamata—lana lanu e fiafia i ai. O se filifiliga faigofie lenei e fai.
Ata na tusia e Jan Leifering