Ataata
O Le Faamalama i le Vaitaele
E alala le tusitala i Iuta, ISA.
O a tatou sootaga faaleaiga e mafai ona fesoasoani ia i tatou e aoao ai, malamalama, ma ola i le talalelei.
Ata na tusia e Allen Garns
Sa amata ona faamaeaina la matou tafaoga. A o ai panikeke i lena taeao, sa matou fuafuaina pe faapefea ona matou faaaogaina le tele o lo matou taimi i le faletalimalo a o lei onosaia le lima itula o le tietie atu i le fale. Sa filifili lo‘u toalua e ave le ma fanau teine talavou e toatolu mo se mea malie mulimuli i le vaitaele. O le a ou faaaoga tatau le masini savali i le potu faamalosi tino.
O le masini na ou filifilia e feagai tonu lava ma le faamalama e pei o le puipui le tele e iloa atu ai le vaitaele. E lei leva ae ou vaai i se aiga, o lo‘u aiga, ua agai atu i le vai. O solo taele, seevae, ma mitiafu ua felelei solo a o sauni teineiti ma le fiafia e fepuna i totonu o le vai. E masani lava ona ou mulimuli i tua o i latou, faapotopotoina lavalava ma seevae ma, o le mea moni lava, e lagona ai sina le fiafia i na mea uma. Nai lo lena, sa ou vaai i lenei aiga mai i fafo, e peiseai o le faamalama tele i ou luma o se lau o le ata tifaga. A o tatu ou vae i se leo faifai pea i luga o le fusipa’u o loo faataamilo i lalo ifo, sa ou matamata atu.
Sa ou vaaia le fiafia o tagata uma sa, talie ma taaalo faatasi, ma sa ou mafaufau e uiga i taimi sa ou lotovaivai ai i finauga laiti e tulai mai faafuasei i se aiga, ae o le lagona lē fiafia faapea, e ui lava i a’u taumafaiga sili, sa le faamanuiaina au e aoao la‘u fanau e alofa le tasi i le isi. Ae a o ou vaavaai atu, sa ou vaai i ni tagata o e sa fiafia faatasi. Sa ou iloaina ai ou te lei toilalo e aoao i latou ia fealofani; sa na ona ou le iloaina e mafai ona latou faia.
Sa ou matauina se tasi o teineiti o oso mai le faatausiusiuga o le vaitaele pea lava pea agai i lima o lona tamā. Sa ou manatu e uiga i oso lapopoa o le a ia faia i lona olaga atoa ma faamoemoe o le a ia faalagolago i le Tama Faalelagi e pue mai o ia i taimi uma lava. Sa ou iloaina o oso taitasi uma lava sa ia aoao ai e talitonu ma o le avea ai ma se vaega o lo matou aiga o se auala saogalemu lea e aoao ai lena talitonuga.
O le isi tamaitai sa taumafai e faaatoatoa se tomai o le aau. Sa ou vaaia o le faamalosiau a lona aiga na ia taumafai ai pea. O le a i ai taimi i lona olaga o le a ia manaomia ai lena lava lagolago pe a feagai ma luitau e sili atu ona faigata.
Ma sa ou tilotilo atu a o faafuasei ona oso le ma tama lona tolu i totonu o le vaitaele. I le le fiafia ma le ita, sa ia taufetoi atu lona ala mai le vai i se nofoa. Na vave lava ona matauina e lona aiga ua misi o ia. Sa ou vaai atu i tagata taitoatasi o faamalosiau atu ia te ia ma le alofa ia toe faatasi ma i latou. Na iu lava ina ia faia, ma sa ou mafaufau i lona lumanai, i taimi uma o le a tiga ai ma lagona ai le fiu. Sa ou faamoemoe o le a ia maua pea i le alofa o lona aiga le malosi e tumau ai.
Na faafuasei lava, ona taia a‘u i le iloaina: o o tatou aiga e mafai ona avea o se ki i lo tatou gafatia e aoao, malamalama, ma ola ai i le talalelei. Na tusia e Nifae e faapea “e mafai e le Alii ona faataunuu mea tetele e ala i mea faatauvaa” (1 Nifae 16:29). E faapena foi i aiga. Ioe, o loo tauivi matua. Ae o taumafaiga uma e aoao atu ma aoao ai ma le alofa, e tusa lava po o le a le laitiiti, e taua.
Na faaiuina lau tifaga laitiiti. A o ou tapeina le masini savali ma vaai atu i lo‘u aiga o aoina mai o latou lavalava, sa ou lagonaina se naunautaiga faafouina ina ia faaauau pea, ia faia pea mea uma laiti sa ou popole i nisi taimi e le faia se eseesega.