Ave o Ia i le Falemai!

Gayle Y. Brandvold, Kalefonia, ISA

Na fai mai Anita o loo lelei lana faalogona, ae sa ou alu ese mai autafa o lona moega, tootuli, ma tatalo ai.

Sa ou nofofua ma e fai au lava galuega i le taimi sa ou fou ai i le Ekalesia, o lea sa i ai aso sa ou avanoa ai. I se tasi o na aso, sa ou valaau ai i le peresitene o le Aualofa ma fesili atu pe i ai se tasi o manaomia se fesoasoani i lena aoauli. Sa ia ta‘ua se uso olomatua e igoa ia Anita (ua suia le igoa) faatoa tea mai le falemai, ma sa nofo toatasi. Sa ou feiloai muamua ia Anita ma sa fiafia lava e asiasi ia te ia.

Sa ou valaau i ai ma alu atu loa i lona fale mautotogi. Sa ia fai mai ia te au e fai se meaai o le aoauli mo ia, ma mulimuli ane na ma maua se asiasiga matagofie. Sa ia te ia se uiga malie ma e fiafia e ata ma faamatala tala e uiga i lona olaga.

Ina ua uma le aiga o le aoauli sa ia fai mai ua lelava ma fai mai ia te au e fesoasoani ia te ia mai lona nofoa faataavalevale i le moega. E lei umi ae ou faamoeina o ia. Ona faafuasei lea, ona tautala mai le leo itiiti, ma le filemu sa ou faalogo soo i ai ia te au: “Ave o ia i le falemai i le taimi nei!”

E ita Anita i le falemai, ma na faatoa foi mai i le fale. Sa ou fesili ia te ia pe o lelei lana faalogona. Sa ia fai mai sa lelei lava, ae ua lagona le vaivai.

Sa ou agai ese mai autafa o lona moega ma tootuli. O le taimi lava na amata ai ona ou tatalo, na toe fai mai le leo, “Ave o ia i le falemai, ma ave loa nei lava!”

Sa ou le mautonu, ma fesili ia te au lava, “O le a lau tala e fai atu i le fomai i le falemai?”

Sa ou valaau atu i se uo, o le na tatalo foi ona tau mai lea ia te au e mulimuli i la‘u uunaiga.

Sa ita Anita i lou ta‘ua o le ave o ia i le falemai, ae sa ou valaau pea i se taavale a le falemai. Ina ua taunuu mai, sa ulu mai i totonu ni fomai se toalua ma siaki lona tulaga o i ai. E aunoa ma ni fesili, sa la tuuina o ia i se moega ma faanatinati ese atu i le taavale a le falemai.

Sa ou mulimuli atu i lau veni. Ina ua ou taunuu atu i le falemai, sa ou nofo ma faatalitali. E lei umi ae sau se fomai i fafo. Sa ia fesili mai, “Na te le‘i tauina atu faapea na pau ae e te lei oo mai i lona fale mautotogi, a ea?”

“Leai,” o lau tali lea.

Na ia tau mai o Anita na lavea lona atepili ma sa piliki i totonu. A aunoa ma le vave o togafitiga faafomai, na ia fai mai ai, semanu e maliu o ia.

Sa fefiloi ou lagona o le faanoanoa ma le olioli—faanoanoa ona sa ou faatalitali a o le olioli ona sa iu lava ina ou faalogo i le Agaga Paia. O le mea aupito sili, sa ou lagonaina le faafetai i le iloa na faatuatuaina au e le Alii e fesoasoani i lenei uso na lavea ma sa musuia lo‘u peresitene o le Aualofa e auina atu au ia te ia.

O lou lava ola maloloina ua faifai malie atu talu mai lena aafiaga, ae o le Alii o loo uunaia pea au. Ou te tatalo e le aunoa mo le malosi e mulimuli ai i na uunaiga.