O Le Fua mo seAiga Fiafia
O auala nei e iva e mafai ona e faamalosia ai lou aiga.
E tusa ai ma aoaoga faavae taua i totonu o le talalelei a Iesu Keriso, o le aiga e mautinoa lava le maualuga i luga o le lisi. O outou tamaitai talavou e masani ona taulotoina e le aunoa la outou tautinoga “e faamalolosia aiga ma auaiga,”1 o outou alii talavou ua valaaulia e “faia se lisi o auala e mafai ona e fesoasoani e fausia se aiga fiafia,”2 ma e faamanatu atu i alii ma tamaitai talavou uma: “O le a faamanuiaina lou aiga pe a e faia lau vaega e faamalosia ai.”3
O le a la le auala sili e faamalosia ai lou aiga ma fesoasoani e fausia se aiga fiafia? “O Le Aiga: O Se Folafolaga i le Lalolagi,” o loo i ai le tali! O lenei pepa o faamatalaga taua o loo faamatala mai pe aisea e matua taua ai aiga i le fuafuaga a le Tama Faalelagi ma o le a le mea tonu lava e mafai ona tatou faia e faamalolosia ai a tatou sootaga faaleaiga. O loo faamalamalama mai ai foi le mea tonu lava e mafai ai ona sili atu le fiafia i o tatou aiga. E leai se fua faalilolilo—ae na o mataupu faavae autu lava o le talalelei ua uma ona aoaoina ai i tatou i taimi uma lava: “O le fiafia i le olaga faaleaiga e sili ona mafai ona ausia pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”4
O iina e maua ai—o le mamanu faigofie mo le fatuina o se aiga fiafia ma le faaleleia atili o lou sootaga faaleaiga e faavavau. E le faapea la e le manaomia ai le galuega ma le taumafaiga, i lau vaega. Ae o taumafaiga uma e te tuuina i totonu o le faamalosia o lou aiga o le a oo ina avea ai oe—ma i latou—e sili atu le fiafia.
I nisi nei o manatu i le tulaga o le a i ai nei mataupu faavae pe a faatinoina.
Faatuatua
-
Auai i suesuega faaletusitusiga paia faaleaiga ma faaletagata lava ia ma afiafi faaleaiga.
-
Fai se sini ma lou aiga ia sili atu ona tausia se poloaiga, e pei o le tulafono o le anapogi po o le tulafono o le sefuluai.
-
Fai ni fuafuaga e faalogo i le konafesi aoao o loo loma pe suesueina le konafesi aoao talu ai faatasi o se aiga.
Tatalo
-
Ia auai i tatalo faaleaiga.
-
I au tatalo faaletagata lava ia, tatalo mo tagata taitoatasi faapitoa lava, i o latou igoa. Mafaufau e uiga i o latou manaoga a o e tatalo mo i latou.
Salamo
-
Fai atu se faatoesega; fai soo atu i ai. Ma manatu mamafa i ai.
-
Aoao e uiga i le taua o le Togiola a Keriso ma le faamanatuga faatasi ma le la matafaioi i le i ai i le faagasologa o le salamo.
Faamagaloga
-
Ia lotomaualalo ma iloa o tagata uma, e oo lava i matua, e sese.
-
Ia manatua mea e te fiafia ai e uiga ia i latou o e ua faatiga pe na faaitaina oe.
-
Tatalo mo le fesoasoani e faamagalo ai isi.
Faaaloalo
-
Usitai i ou matua.
-
Aua e te tautala leaga pe agaleaga i se tasi o lou aiga.
-
Vaavaai mo uiga lelei e te vaaia i tagata taitoatasi o le aiga. Faasoa atu ia i latou mea e te faamemelo ai ia i latou.
Alofa
-
Tatalo mo le alofa mama—le alofa o le Faaola—mo tagata o lou aiga.
-
Saili i auala e auauna atu ai i lou aiga.
-
Tusi ia ni tusi pupuu o le faamalosiauga ma le alofa. Nana i pusa meaai mo le malologa, ato taitai, po o ato tupe mo tagata o lou aiga e maua i se taimi mulimuli ane.
Agaalofa
-
Ia uunaia tagata o le aiga e faasoa mai o latou lagona ma taumafai e malamalama le tasi i le isi.
-
Faamafanafana le tasi ma le isi e ala i taimi faigata ma taumafai e tauave avega a le tasi (tagai i le Mosaea 18:8–9).
Galue
-
Ofo atu e saunia se meaai mo le aiga.
-
Fesoasoani i feau i le aiga, e pei o le moaina o le vao, le veleina o le togalaau, po o le faamamaina o faamalama.
-
Fesoasoani i nai ou tei laiti ifo i a latou meaaoga.
Gaoioiga Faafiafia Lelei Faaleaiga
-
Fesoasoani e fuafuaina tafaoga faaleaiga, faiga-malologa, po o gaoioiga e mafai ona olioli ai lou aiga i le faia faatasi.
-
Faaitiitia le faaaogaina o masini fuainumera omiomi. Tapē le TV ma isi faaeletonika a o e faatasi ma lou aiga.
Aafiaga o le Autalavou
Na matou fesili atu i nisi o le autalavou pe faapefea ona latou faataitaia nei mataupu faavae i o latou lava aiga. O mea nei sa latou fai mai ai e uiga i o latou aafiaga:
Faatuatua
Sa ou filifili e faatulaga afiafi faaleaiga e lua e sosoo ai, e taulai atu i le faatuatua. Sa ou amata e ala i le sauniaina o lesona ma taumafai e aoao ki i luga o le kitara mo pese o le a matou usuina.
O le lesona muamua o le faatuatua. Sa ou fesili atu po o le a se mea e mafai ona matou suia o se aiga e tuputupu ae ai lo matou faatuatua. Na latou tali mai, “Tatalo, suesueina o tusitusiga paia, anapogi, o i le lotu,” ma isi. Na matou malilie e tele mea e mafai ona e faia e tuputupu ae ai lou faatuatua, ae o le mea aupito sili ona taua, o le faia moni lava o na mea. E taua tele lou galue ina ia mafai ona faamalosia lou faatuatua.
O le lesona lona lua o meaalofa faaleagaga. Sa matou talanoa e uiga i le fesootaiga o le faatuatua ma meaalofa faaleagaga.
O a matou afiafi faaleaiga o le faatuatua sa lelei lava le faagasologa. Sa matou faaleleia atili nisi o mea i lo matou aiga; sa avea ma mea malie ia i matou ma taumafai ia aua nei tau lava ina fai. Sa matou lagonaina le Agaga faatasi o se aiga.
Riza S., 16 tausaga, Roskilde, Tenimaka
Tatalo
Sa ou filifili e faataitai lo‘u faatuatua e ala i le tatalo ma ole atu i le Atua mo se fesoasoani ma le taitaiga. I le taimi muamua ou te lei iloaina le aafiaga o la‘u tatalo, ae ina ua mavae ni nai aso na ou iloaina ua faateleina le filemu i le aiga.
Ona lu‘iina lea o lo’u faatuatua. Sa tigaina lo‘u tuagane laitiiti ma sa tatau ona vave faia se taotoga, o se tasi o a’u uo sa tigaina foi, ma sa tiga le faai ma maualuga le fiva o lou tina. O nei tulaga matautia uma na faate‘a ese ai le lagona o le filemu na siomia ai au. Sa ou matuai faanoanoa lava ae na faaauau pea ona ou tatalo. O se solo e fiafia i ai lo‘u tina matua na oo mai i lou mafaufau, e faapea e silafia e le Atua mea uma e sili atu nai lo le mea tatou te iloa, ma e tatau ona tatou faalagolago ia te Ia. O lea sa amata ai ona ou faataitaia lo‘u faatuatua e sili atu ma faia mea uma ou te mafaia. E lei umi se taimi ae mafai ona tuua e lo’u tuagane le falemai. Sa le toe tigaina tele lau uo e pei ona i ai muamua. Na toe malosi lo‘u tina.
O le taimi lenei, pe a ou tatalo mo isi, ou te tatalo ma le taulai sili atu ma le faatuatua sili atu nai lo le taimi muamua. E tatau ona tatou maua le faatuatua i le Atua, aemaise lava pe a faigata le talitonu ia te Ia ma Ana fuafuaga, ma aua lava le faitio aua ua Ia silafia le mea e sili ona lelei.
Iaroma K., 18 tausaga, Graz, Auseteria
Salamo
Ua ou iloa le tele o le aafiaga o le salamo i mea uma. Mo se faataitaiga, mo ni nai masina sa ou faia ni agasala ma le salamo ai, ma sa faigata tele ia te au ona motusia lenei taamilosaga. Ae ina ua uma ona talanoa atu i le epikopo ma isi uo mamae, sa mafai loa ona ou faaaogaina le faagasologa o le salamo ma lagona le latalata atili atu i le Atua ma toe lagona le fiafia sili atu. I le tatalo malosi ma le faaaluina o le tele o taimi e faitau ai au tusitusiga paia, sa ou iloa ai e tatau ona ou suia nisi o vaega o auala sa ou ola ai i lo‘u olaga. Ua ou iloa nei le faateteleina o lou tuputupu ae ona o lenei mea. E ala mai i lenei aafiaga sa mafai ai ona sili ona ou latalata i lo‘u tina ae maise lava lou tama.
E ui lava o loo i ai pea ou faaosoosoga ma agasala, ua ou mafai ona faaaogaina le Togiola a le Faaola e salamo ai ma toe iloilo pe na faapefea ona ou faia i aso uma ma taumafai i taimi uma ia manao e faaleleia atili. O le a faavavau pea ona ou faafetai mo le Togiola i lo‘u olaga.
Billy P., 17 tausaga, Ipswich, Egelani
Galue
Talu ona ou manatu o se ituaiga o galuega le talafaasolopito o aiga, sa ou filifili e fai la‘u lava tusi o talafaasolopito o aiga. O lea sa ou faia ai se tuufaatasiga o ni ata o tagata o lou aiga. Sa ou faia ina ia mafai ona vaai la‘u fanau ma fanau a la’u fanau pe faapei foliga o o latou tuaa. A o ou faia lena mea, sa ou lagonaina le toafilemu aua na ou iloa ou te leo faia lena mea mo au lava ia, ae sa ou faia mo augatupulaga a sau.
Glory S., 18 tausaga, Johannesburg, Aferika i Saute
Gaoioiga Faafiafia Lelei Faaleaiga
O lau taumafaiga muamua i le faia o gaoioiga faafiafia faatasi ma nai o’u tei sa leaga, e faapuupuu atu ai. Ae o se suiga mo au o se malaga i le Mauga Blue Ridge. O laulaau sa felanulanuai, ma o le paka faafiafia na malie, ae o taimi o upu faalelelei, amioga manatu faapito, ma taufaalili le lelei na masani ona faaleagaina le agaga. Ae matou te lei tuua, na ma savavali ma lo‘u uso laitiiti i luga o se mauga laitiiti ma saofai filemu a o ma faalogologo i le natura o loo siomia i maua. O le taimi muamua lea i se taimi umi sa ma nonofo ai e aunoa ma le femisaa‘i, ma talanoaina ma le filemu aso o i luma ma a ma tauiviga i le taimi nei. Sa i ai le Agaga, na aumaia le filemu na galo ai ia te a‘u.
Sa amata ona ou taumafai e alu ese ma lou auala e talanoa atu i o‘u tei, fesili atu ia te i latou e uiga i lo latou aso, opo mai i latou—ma tau lava ina ia aafia i o latou olaga. Sa ou fesoasoani i lo‘u tei aupito laitiiti, o se tuagane e le atoatoa le malosi i ana meaaoga. Sa ou fesoasoani i lou uso aupito i laitiiti e faia ni kata o le kalama ma fatu ni solo faavalevalea e tauloto ai ni vaega eseese o le gagana. I lana suega na sosoo ai sa faaleleia atili ona togi e sili atu i le 20 ma maua ai ni ona togi aupito maualuga i le suega. O le olioli na ou lagonaina mai na taimi na ese lava ma sa sili atu ona loloto nai lo le mea na ou faamoemoeina.
O le i ai i se aiga e mafai ona faigata, ae i taimi faapena e matua aoga lava. O na taimi laiti na taitai atu i taimi o le fiafia, taaloga, ma le taliega; ma sa ou lagonaina se lotogatasi fou i lo‘u aiga.
Emily C., 17 tausaga, North Carolina, ISA
Lesona i Aso Sa
O Le Autu o le Masina Lenei:
Faaipoipoga ma le Aiga