O Manu‘a o le Tatalaina o Faaipoipoga
E alala le tusitala i Peretania Kolomupia, Kanata.
I le avea ai o se tasi o le Maligi a le Malo o Kanata, sa aoaoina au e fai se “iloiloga pe a uma se gaoioiga” ina ua uma ona fetaiai ma le fili po o isi mala. O se vaaiga e faigata i le ala e mafai ai e i latou o loo aafia ona faaleleia e faaitiitia ai pe aloese ai mai nisi manuaga po o faalavelave. I le olaga atoa, ae maise lava i le taimi o tofotofoga e pei o le tatalaina o se faaipoipoga, o se iloiloga pe a uma se gaoioiga e mafai ona aumaia ai le tele o avanoa e aoao ma tuputupu ae ai.
E amata i le taliaina o le aofaiga sa‘o o le mafuaaga mo le mea na tupu. A o tatou faia se faamaumauga sao o a tatou amioga, atonu i le fesoasoani mai o se fautua, i le iloaina po o fea na aafia ai lo tatou faitalia ma po o fea sa aafia ai le faitalia a le toalua muamua, e mafai ona tatou matauina mea e mafai ona tatou suia ia i tatou lava. E mafai foi ona tatou iloiloina le tulaga o lo tatou soifua maloloina faalemafaufau, faaleagaga ma faalelagona.
O le faia o ni taumafaiga aoga e suia a o tatou faaaogaina lesona na aoaoina e uunaia ai le faagasologa o le faamaloloina a o faasimaina le ala i se lumanai manuia.
Faaaogaina o le Togiola a le Faaola
I le taua e i ai pea lava pea manua taufaafefe. E mafai ona loloto ma tiga, ae o i latou o e e le‘i oo i ai e le mafai ona malamalama moni pe faapei. O manu‘a i o tatou loto ma agaga na mafua ona o le tatalaina o se faaipoipoga e tutusa lava le tiga, ma e mafai foi ona faigata ona malamalama i ai mo i latou o e e le’i oo i se mea faapena.
Ae e le o tuua na o tatou. O le Faaola ua saunia e fesoasoani ia i tatou. O le mana faamalolo o Lana Togiola e mafai ona fesoasoani ia i tatou e faamaloloina ai. Aua nei e fulitua i le Ekalesia. Talosaga atu mo faamanuiaga o le perisitua ma alu i le malumalu i le tele o taimi e mafai ona e maua. O le faagasologa o le faamaloloina e masani lava e umi tele, ae o le mauaina o le Agaga i lou olaga o le a fesoasoani e faavave ai le faagasologa.
O le tausaga muamua ina ua uma le tatalaina o le faaipoipoga e faigata. E i ai se faagasologa o le faavauvau i le leiloa lea o se sootaga lea sa avea o le totonugalemu o o tatou faamoemoega. E pei lava o se tietiega saoasaoa i luga ma lalo o lagona ma luitau. Tatou te faatinoina la tatou vaega i le faagasologa o le faamaloloina e ala i le manatuaina o i tatou o fanau faapelepele a lo tatou Tama Faalelagi ma le gafatia faalelagi, e ala i le auai i a tatou sauniga Lotu, faitauina o a tatou tusitusiga paia, tatalo, auauna atu, ma le auai i le malumalu. E ui o le auala atonu e foliga mai e umi, e mautinoa le folafolaga. Mulimuli i le Alii, ma e mafai ona e maua le ola e faavavau ma faamanuiaga uma ua folafola mai ia te oe, e aofia ai le filemu ma le olioli i lou agaga.
Agai atu i le Toe Faaipoipo
Ia e faaeteete pe a e filifili e amata ona tafafao faamasani. Ia mautinoa ua e iloa po o ai oe ma le mea e te manao ai. Ia fiafia i le i ai na o oe lava ia (ma le Faaola). Pe a e fiafia i le tagata ua avea ai oe ma le mea e te alu i ai, e faigata atu mo le fili ona faasese oe po o lou iu i se faalagolago leaga i se isi tagata. O le sootaga na e atiina ae faatasi ma lou toalua muamua na fai si umi faatoa oo atu i ni vaega taua faalelagona ma le mafutaga mafana. E oo lava i sootaga le lelei e i ai vaega o le mafanafana, o le mea lea e mafai ona i ai le faaosoosoga e vave ona see atu i na sootaga ma se tasi. Faaeteete i lau laa.
Lagolagoina o Alii ua Tatala Faaipoipoga
O i latou o e ua mafatia i se faaipoipoga ua tatala e pei o fitafita i luga o le malae o lenei taua mo o tatou agaga. Latou te manaomia la tatou faaaloalo, alofa, malamalama, lagolago, ma le taliaina. Tuuina atu le taitaiga alofa ma le faamalosiauga pe afai latou te taliaina. Faaaoga le faatuatua ia i latou ma ia manatua o loo i ai i le Faaola Lana lava taimi e faamalolo ai se loto ma le agaga momomo. O le faamalologa ma vavega o le a tupu, i se taimi.
Ata na pueina e Justin Skinner/iStock/Thinkstock