Fesili & Tali
“Sa faaipoipo o‘u matua i le malumalu, ae o lenei ua tatala le la faaipoipoga. Ua ou ita ua la faamalepeina lo matou aiga. E faapefea ona ou faamagaloina i laua?”
O le tatalaina o se faaipoipoga e faanoanoa ma e faigata mo tagata uma o le aiga. O ni lagona e masani ai le ita, leiloa, ma le tiga. Ae peitai, o le tumau ai i mafaufauga le lelei e taofia ai oe mai le filemu ma le faamalologa. Tatalo i le Tama Faalelagi e fesoasoani ia te oe ia mafai ona e lafoa‘ia lagona faataumaoi ma ia malamalama i ou matua. Ia iloa o loo tiga foi i laua.
Ia manatua, o Iesu Keriso—o le na puapuagatia mo o tatou faanoanoaga ma agasala uma—ua naunau e faamagaloina i tatou taitoatasi. O i tatou foi e tatau ona faamagalo atu i isi. (Tagai i le faataoto i e nono mai o i le Mataio 18:23–35.) O le a faafetai atu ou matua mo lau meaalofa o le lē manatu faapito o le faamagaloga. A o e tuueseina ma tagata o lou aiga le ita ma le tuuaia, o le a faamalosia lou aiga atoa ma o le a sili atu ona mafai ona fetuutuunai. O i latou o e faamagalo atu “o le a siitia lo tatou lagona tauleleia faapea foi le olaga sololelei” (James E. Faust, “O le Mana Faamalolo o le Faamagaloga,” Liahona, Me 2007, 68).
I lenei taimi faigata, e taua ai le faaauau pea ona fausia lou sootaga faaleaiga, aemaise lava ma ou matua. I tausaga a sau, e mafai ona e faalagolago i ai ma faapelepele i na sootaga. Aua nei faatagaina lagona ita e taofia ai nei mafutaga taua mai le tuputupu ae.
Ia i ai le faatuatua i le fuafuaga a le Tama Faalelagi mo oe ma lou aiga. Ia talitonu faapea “o nei mea uma … o le a avea ma ou lelei” (MF&F 122:7). Ia talitonu o le a Ia faaauau pea ona taialaina ma faamanuiaina lou olaga. Ia talitonu e mafai ona e maua se faaipoipoga matagofie i se aso, ma o le a saunia e le Atua [mea uma] mo lo outou aiga i lenei olaga ma le faavavau.
O le faamagaloga o se faagasologa ma e alu ai le taimi. Ia onosai i au taumafaiga i le alofa, faamagalo, ma malamalama i ou matua. Ia tulimatai atu i le filemu ma le fiafia e oo mai i le faamagalo atu.
Tatalo ia Malamalama
Ina ua tatala le faaipoipoga a ou matua, sa faigata ia te au ma nai o‘u tei. Na ou manaomia ai ni nai tausaga e faamagalo ai lo‘u tama. Sa ou manaomia le suesue i tusitusiga paia ma le tatalo ma lo‘u loto atoa. Sa ou talanoa atu foi i se fautua. Ona ou tatalo ai lea ina ia malamalama i lo‘u tama. Sa pupula ou mata, ma sa ou malamalama ia te ia, ma na fesoasoani ia te au e faamalolo ai. Sa mafai ona ou faamagalo atu, ma sa ou saoloto mai filifili ia na taofia au i lalo mo se taimi umi. Ua ou iloa e moni le Togiola a le Faaola. E alofa le Alii ia i tatou ma e le tuua lava i tatou ia pagatia.
Taofia le igoa
Faalagolago i le Tama Faalelagi ma Faamagalo Atu
Na ou oo foi i lenei tulaga, ma ou te iloa o se tulaga faigata. E taua le iloaina faapea e ui lava o ou matua atonu ua le toe alofa le tasi i le isi, e alolofa pea ia te oe ona o oe o le la tama. Ma lea foi, ia faalagolago i le Tama Faalelagi. Ua Ia poloaiina i tatou ina ia faamagalo i tagata uma. Ua Ia silafia oe ma e i ai Sana fuafuaga mo oe. Afai e faaauau pea ona tatou ola agavaa, ou te iloa e mafai ona tatou maua le folafolaga o le mauaina o se aiga e faavavau, e ui lava o o tatou aiga i le lalolagi nei atonu ua fai sina malepelepe.
Alisha M., 17 tausaga, Texas, ISA
Faaali Atu Lou Alofa
Mafaufau e uiga i le tele o lou alofa i ou matua. Ia manatua mea malie uma na tou oo i ai a o lei tupu. Talanoa ma i laua e uiga i na taimi ma fuafua ni gaoioiga faatasi ma lou tina ma tama taitoatasi. Taaalo faatasi ma i laua ma faaali atu lou alofa ia i laua.
Sierra J., 15 tausaga, Idaho, ISA
Taumafai ia Malamalama
Taumafai e tuu oe lava i o la seevae. O le a le faigofie ona faamagalo i laua pe afai e te le taumafai e malamalama i lo la tulaga. Ia talitonu e i ai se fuafuaga a le Atua mo oe ma lou aiga ma e i ai o tatou tofotofoga i lenei olaga ina ia mafai ona tatou aoao ma alualu i luma. O nisi taimi e le mafai ona tatou pulea o tatou tulaga, ae e mafai ona tatou pulea o tatou uiga faaalia. E ui lava atonu e faigata, ia taumafai i taimi uma lava e vaai mo le lelei i ou matua ma mafaufau pe mafai faapefea ona e fesoasoani.
Elder Caten, 20 tausaga, Misiona a Atenitina Córdoba
Ia Maua le Lagolago mai i Isi
Sa mafai ona ou onosaia le tatalaina o le faaipoipoga a ou matua ma faamagaloina i laua i le fesoasoani mai o tagata na siomia au. O a‘u uo, taitai, uso ma tuagane, ma tagata o le aiga na fesoasoani ia te au i mea uma. Sa mafai ona ou faaauau i lo‘u olaga i le lagolago mai o tagata uma.
Geena C., 18 tausaga, Mekisiko Fou, ISA
Tuu Ese le Inoino
O le lagona inoino e faatamaia, ma e tetee atu i aoaoga o le Ekalesia. Tatalo i le Tama Faalelagi, anapogi, ma faitau i tusitusiga paia e vaavaai ai mo tali. Afai e te pipiimau i le inoino, o le a e faatagaina Satani e ulu mai i totonu ma faaumatia lou aiga ona ua ia iloa le taua o aiga i le fuafuaga a lo tatou Tama Faalelagi.
Carol M., 14 tausaga, Honetura
Saili mo le Agaga Paia
Muamua, e leai se tasi o i tatou e atoatoa, sei vagana ai lo tatou Alii o Iesu Keriso. O le a ou taumafai e vaai i le tulaga e ala i le vaaiga a ou matua. Filifili se taimi lelei ma alu e talanoa ia i laua. Aua e te faitio i ou matua mo mea sa la faia. Lona lua, e toatele tagata e liliu i le inoino i le taimi o tofotofoga faapenei, o lea ia taumafai e mafuta le Agaga Paia ia oe. Fai au suesuega patino o tusitusiga paia ma fai au tatalo i aso taitasi.
Ashley P., 15 tausaga, Iuta, ISA