O Le Sapati o Se Aso Fiafia

O auala e lima ia atili ai ona anoa ou Aso Sa.

Faatasi ai ma luitau o loo siomia ai i tatou, o le faamamaluina o le Sapati e manaomia ai le faatauaina faaopoopo ona e fesoasoani ia i tatou e faatumauina le malosi faaleagaga. O nei talavou mai Europa i Sasae ua faasoa mai o latou manatu e uiga i le auala ua faamalosia ai e le Sapati i latou—ma pe faapefea ona mafai ona faamalosia ai foi oe.

E Latalata Atili i le Alii

O le aso Sapati o se aso e mafai ona tuuina atu atoa ai au lava ia i le Alii. Ou te taumafai e aua le maimauina le taimi ae nai lo lena, ia faaaoga ia lelei atili ai ma latalata atili ai i le Tama Faalelagi. I Aso Sa ou te matua fiafia lava e auauna atu i tagata o le Ekalesia e ala i le nofo i tafatafa o i latou e faaali atu ai e leo faagaloina i latou. O le auauna atu i isi e aumaia ai ia te au le fiafia.

Ia te au, o le Aso Sapati o se aso o le aoaoina, fiafia, ma le olioli a o ou aoao e auauna atu i le Alii. Ou te tausia le aso Sapati i le paia ou te mafaia ai. O le faalagolago i le Tama Faalelagi i mea uma o le a aumaia ia i tatou le olioli ma le fiafia i le lalolagi ma i le lagi faatasi ma Ia ma Lona Alo, o Iesu Keriso.

Arvis B., 18 tausaga, Lativia

Aai ma Feinu i le Faamanatuga

I aso uma ou te tulimatai atu i le aso o le a mafai ai ona ou alu i le lotu ma ai ma inu i le faamanatuga. E le mafai ona ou faatali seia oo ina ou mafai ona fai o‘u lavalava o le Aso Sa, saunia au lava ia, alu i le lotu, ma toe faafou ai feagaiga ma le Atua.

O nisi taimi pe a ou tu i luga i le taeao, ou te le lava. Ae a ou alu i le lotu ma ai ma inu i le faamanatuga, auai i a‘u sauniga, ma suesue i tusitusiga paia, ou te lagonaina le Agaga Paia, ma o lenei mea e siitia ai lo’u agaga. E taua le aai ma feinu i le faamanatuga i vaiaso taitasi, ona o lo tatou Faaola lava Ia na faaali mai ia i tatou mea e tatau ona tatou faia.

Diana D., 14 tausaga, Lativia

Suesue Tusitusiga Paia ma Isi

O le auai i a tatou sauniga o le Aso Sa ma le aai ma feinu i le faamanatuga e faatumuina ai i tatou i le Agaga mo le vaiaso atoa. Tatou te maua nisi faamatalaga mai tusitusiga paia, ma o aafiaga o a tatou faiaoga e fesoasoani ia i tatou ia malamalama atili ai i tusitusiga paia. Pe a tatou suesue faatasi i tusitusiga paia, e mafai ona tatou maua se malamalamaaga fou ma aoao mai i le tasi ma le isi.

Antonina B., 18 tausaga, Central Federal District, Rusia

Filifili Gaoioiga ina ia Faatumauina le Agaga

O le talosaga a Iesu e nonofo ma mataala faatasi ma Ia (tagai i le Mataio 26:38) na ootia ai lo‘u loto ma taitai atu ai au i le iloaina o le aso Sapati o se aso e mafai ai ona tatou aai ma feinu i le faamanatuga o se faailoga e faamanatu ai Lana auaunaga ia i tatou.

O le tele o lou mafaufau e uiga i lenei mea, o le tele foi lea o lou manao ia iloa o Ia. O lenei ituaiga o taumafaiga ua fesoasoani ia te au e filifili mea sa‘o i se aso lea e saoloto ai mai popolega faalelalolagi uma: Aso Sa. O nei mea e aofia ai le faitau ma suesue i tusitusiga paia, auauna atu i lo‘u aiga, matamata i tifaga faagaeetia, faasoaina atu o malamalamaaga faaleagaga i uo, ma le tatalo e le aunoa. O le tele o le liliu atu o lo‘u loto ia Iesu, o le tele foi lena ona ou iloa ma latalata atili atu ia te Ia. Ou te le mafai ona ta‘ua se faamanuiaga e tasi e sili atu ona matagofie nai lo lenei.

Sister Aleksandrovna C., 25 tausaga, Misiona a Rusia Novosibirsk

Ia Siitia e le Agaga

Ia te au o le aso Sapati o se avanoa e suesue ai i le talalelei a Iesu Keriso i se tulaga e loloto atu. E aunoa ma se masalosalo, o se tagata e sau i le lotu ua saunia ma manao e auai i le faamanatuga, ma o loo taumafai e aoao o le a maua faamanuiaga ma faagaeetia e le Agaga, e le na o le Aso Sa ae i le vaiaso e sosoo ai.

O loo tele avanoa i fafo atu o le ekalesia e mafai ona tatou tausia ai le Sapati ia paia: o le faaaluina o taimi ma aiga, fesoasoani i faifeautalai, auauna atu i le uarota, ma faitau tusi a le Ekalesia. O le aso Sapati o se taimi e malamalama ai i tulafono a le Atua. A tatou iloaina lenei mea ma faafetai i le Atua mo lenei avanoa, o le a leai se faigata e tausia ai le aso Sapati ia paia.

Elder Vladimir Aleksandrovich Z., 18 tausaga, Misiona a Rusia Novosibirsk

Tumau le Le Pisia

“Ina ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi ae i luga au faamanatuga i lo’u aso paia;

“Aua e moni o se aso lenei ua tofia mo oe e te malolo ai mai au galuega, ma avatu ai au tapuaiga i le Silisili Ese.”

Mataupu Faavae ma Feagaiga 59:9–10

“Aua e te liliu ese lou vae i le sapati, a e le faia o lou lava loto i lo‘u aso sa; ma e taua le sapati o le aso fiafia, le aso ua sa ia Ieova, ua mamalu; ma e faamamaluina i ai, o loo e le faia au lava amio, o loo le maua ai lou lava fiafia, ma e le tautala ai i au lava upu:

“Ona e fiafia lava lea ia Ieova.”

Isaia 58:13–14

O SE ASO E MALOLO AI

“Na tuuina mai e le Atua ia i tatou lenei aso faapitoa, e le mo mea faafiafia po o galuega o aso taitasi ae mo se malologa mai tiute, faapea foi i le faaletino ma le faaleagaga.”

Elder Russell M. Nelson o le Korama a Aposetolo e Toasefululua, “O Le Sapati o Se Aso Fiafia,” Liahona, Me 2015, 129.

Ata na tusia e J. Beth Jepson