Matou Te Talitonu i le Lotomaualalo

“O tagata faamaualuluga e sili atu ona fefefe i faamasinoga a tagata nai lo o faamasinoga a le Atua. ’O le a se manatu o tagata ia te a’u?” e sili atu ona mamafa nai lo le “O le a se finagalo o le Atua ia te a’u?’” —Peresitene Ezra Taft Benson

Ina ua avea i tatou ma tagata o le Ekalesia a Iesu Keriso, tatou te osi feagaiga e manatua pea o Ia, tauave Lona suafa i o tatou luga, ma tausi Ana poloaiga (tagai i le MF&F 20:77). Soo se agasala lava e taofia ai i tatou mai le tausia o lenei feagaiga, ae o loo i ai se agasala se tasi, i luga ae o isi uma [agasala], e tatau ona tatou aloese mai ai ona e taitai atu ai i le tele o isi [agasala]: o le faamaualuga.

“E toatele i tatou e mafaufau i le faamaualuga o le manatu o le tagata ua na’o ia lava, faasausili, fiatagata, fiamatamuamua, po o le fiailoa,” na aoao mai ai Peresitene Ezra Taft Benson (1899–1994). “O nei mea uma o elemene ia o le agasala, ae o le fatu, po o le ‘auga, o loo misi lava.” Sa ia fai mai “o le ‘auga autu lava o le faamaualuga o le ita [lotoita po o le inoino]—ita i le Atua ma le ita i o tatou uso a tagata.”¹

O le inoino i le Atua “o le agaga o le ‘loʼu loto ae le o lou faia.’ … E le mafai ona talia e le tagata faamaualuga le pule a le Atua e tuuina atu le taitaiga i o latou olaga. … E mananao ē faamaualuluga ia ioe mai le Atua ia i latou. Latou te le mananao e suia o latou taofi e ioe ai i le finagalo o le Atua.”²

E tele auala e faaalia ai, e pei o le saili masei, faitatala, faatuāupua, muimui, ola fiatele, matau’a, manaonao fua, leai se lotofaafetai ma se faamalo e ono siitia ai se isi, ma le lē loto faamagalo ma le lotoleaga.”³

O le faamaualuga e faalavelavea ai lo tatou alualu i luma, e faaleaga ai a tatou sootaga, ma taofia le auaunaga tatou te tuuina atu. Na fautua mai e Peresitene Benson lenei tali: “O le vaifofo mo le faamaualuga o le lotomaualalo—agamalu, usitai. O le loto momomo ma le agaga salamo lea.”⁴ Sa ia aoao mai e faapea “o le lotomaualalo e tali atu i le finagalo o le Atua—i le mata’u i Ana faamasinoga ma i manaoga o i latou o loo siomia i tatou. … Ia tatou filifili e lotomaualalo.”⁵

O ata nei o loo faaalia ai auala e mafai ai ona tatou filifili ia lotomaualalo.

O LE TAMALII SILI ONA LOTOMAUALALO

“O le tamalii silisili, sili ona malosi, sili ona atamai na savalia lenei lalolagi, o le tamalii sili foi lea ona lotomaualalo. Sa Ia faatinoina nisi o Ana auaunaga sili ona faagaeetiaina i taimi patino, faatasi ai ma ni nai tagata sa iloaina, ia sa Ia faatonuina ia ‘aua nei tala atu i se tasi’ mea sa Ia faia [tagai Luka 8:56]. Pe a ta‘ua o Ia e se tagata e ‘lelei,’ e vave lava ona Ia toe faasino sao atu lea upu lelei, ma tautino atu ua na o le Atua lava e lelei moni [tagai Mareko 10:17–18]. Ua manino lava e leai se taua o viiga o le lalolagi ia te Ia.… O le a lelei ona tatou mulimuli atu i le faataitaiga a lo tatou Matai.”

Peresitene Dieter F. Uchtdorf, Fesoasoani Lua i le Au Peresitene Sili, “E Faatatau I Le Faamaoni,” Liahona, Me 2015, 83.

E mafai ona tatou faaali atu le lotomaualalo e ala i le:

Taliaina o fautuaga ma aoaiga.

Tuuina atu o auaunaga lē manatu faapito.

Auauna atu i se misiona.

Faia o galuega o talafaasolopito o aiga ma auai atu soo i le malumalu.

Tatalo ma le manatu moni i ai.

Mai le Aoaoga a Peresitene o le Ekalesia: Ezra Taft Benson (2014), 257–261.

Ata na tusia e David Habben