Faatalitali ma le Faatuatua
E alala le tusitala i Ceara, Pasila.
Sa ou faatalitali mo le tele o tausaga ae le‘i muta ai le faamoemoe ina ia auai o’u matua i le Ekalesia.
Ata na tusia e Joel Castillo
Sa faailoa atu a’u i le Ekalesia e le fafine ma le tamaloa o lou aiga, e nonofo latalata i lo‘u fale. Sa na o le fitu tausaga lou matua i le taimi lea, ma sa ou fiafia e alu i le lotu ina ia faatasi ma isi tamaiti. O o‘u matua e le o ni tagata lolotu, ae sa la le popole i lou alu i le lotu i aso Sa uma faatasi ai ma le fafine ma le tamaloa o lou aiga. Na fai mai o‘u matua sa sili atu le lelei ia te au ina ia auai i se ekalesia e aoao ai Iesu Keriso nai lo le alu atu i le auala e oo ai i faafitauli.
Na tele lava ina o mai faifeautalai i lo matou fale e aoaoina i matou. Sa fiafia o‘u matua i talanoaga, ae sa le mananao i latou e taliaina le talalelei. Sa la fai mai e lei saunia i laua ona o le ulu atu i totonu o le vai o le papatisoga o se tautinoga taua tele. Sa faaauau pea ona o mai faifeautalai i lo matou fale, ae sa latou tuua lava i taimi uma ma le le fiafia i tali na tuuina atu e o‘u matua. Sa ou iloaina, e ui i lea, e i ai se aso o le a papatisoina ai i laua.
Ina ua atoa lo‘u valu tausaga, sa ou saunia e osia feagaiga o le papatisoga. Sa fesili mai lou tina pe o le mea tonu lea sa ou manao ai. Sa fai mai o ia o le taimi lava ou te papatiso ai, o le a le mafai ona ou suia lo‘u mafaufau ma o le papatisoga o le a suia ai lo’u olaga atoa. Sa ou fai atu o le papatisoina o se mea sa ou moemiti i ai talu ona ou amata ona alu i le Peraimeri.
Ina ua uma ona ou papatiso ma faamauina, sa faaauau pea ona alu i le lotu, ae e seasea lava ona o mai o‘u matua i a matou gaoioiga a le Peraimeri. Sa tiga mo au le vaaia o isi tamaiti uma ma o latou matua. Ae sa ou faamoemoe e i ai se aso o le a la papatiso ai ma faamauina i le malumalu, ma o la‘u miti aupito sili o le a avea ma se mea moni.
A o ou talavou, sa faaauau pea ona aoaoina ou matua e faifeautalai, ae sa laua le mananao lava e papatiso. Ae peitai, la te o mai i le lotu i nisi taimi, lea na ou maua ai sina faamoemoe laitiiti. Sa ou moemiti pea o le a auai ou matua i le Ekalesia, ae na amata ona ou mafaufau faapea o le a le oo mai lava lena mea i lenei olaga.
Ona i ai lea o se tasi taeao o se Aso Sa matagofie ina ua 17 o‘u tausaga, sa ma toe o ai ma lo’u tina i le lotu. A o ma foi atu i le fale sa ia fai mai ia te au se mea o loo mafai pea ona ou faalogo i ai i ou mafaufauga ma lo‘u loto. Sa ia fai mai, ua ia filifili e papatiso. Sa ou tei! Ina ua mavae le faatalitali mo se taimi umi lava, sa ou mafaufau pe moni ea lenei mea. Ia Me 2010, sa ulufale atu ai lo‘u tina i le vai o le papatisoga. O se aso fiafia tele.
Ina ua mavae le papatisoga sa ou tilotilo atu i lo‘u tama ma faapea atu, “Toe o oe le tagata lea e totoe nei.“ Sa ia tali mai o le a le vave ona sa ia le lagonaina le manao e papatiso. Sa ou toe faanoanoa—o se vaega o la‘u miti ua taunuu, ae o le isi vaega sa foliga mai sa mamao ese. E ui lava sa faigata, sa ou mautinoa o le a suia mea uma. I lo‘u fiafia tele, sa toe tali mai au tatalo i le lua masina mulimuli ane ina ua ulu atu lo’u tama i le vai o le papatisoga. O le aso sili lea ona ou fiafia ai i lou olaga. Sa ou lagonaina e pei lava na pepese mai le lagi.
I le mavae ai o le auai o ou matua i le Ekalesia, sa ou iloaina o le isi vaega o la‘u miti ua taunuu, ae matou te moomia ina ia faamauina mo le faavavau i le maota o le Alii. Sa fai mai ou matua la te lei lagonaina ua saunia, e le’i lava ni a la tupe mo le malaga umi i le Malumalu o Recife Pasila, ma e leai se tasi e vaaia lo matou fale a o matou malaga. Sa ou faanoanoa, ae sa ou tatalo pea mo lena faamanuiaga, ma le iloaina o le Alii o le a tali i a‘u tatalo.
Sa oo mai le taimi na lagona ai e lo‘u tina se naunautaiga malosi e alu i le malumalu, e ui lava sa tolopoina pea e lo’u tama. Ina ua mavae le tele o talanoaga ma le epikopo, sa la filifili loa e o. Sa ou lagonaina le olioli tele na tau le mafai ona ou tatalia!
Ia Setema 2011, o lo‘u tina, o lo’u tama, ma a’u na o atu i le malumalu mo le taimi muamua lava i o matou olaga. Sa faamauina au i o‘u matua i le aso na sosoo ai, ma e mafai ona ou faapea moni atu lava, ina ua mavae tausaga e 11 o le faatalitali, o le aso silisili ona lelei lea o lo’u olaga.
Ou te faafetai lava i le Tama Faalelagi mo mea uma ua Ia tuuina mai ia te au, ae maise lava mo le taliina o au tatalo ma le faataunuuina o la‘u miti silisili: le miti o le vaai i lo’u aiga atoa i le maota o le Alii.
Ata na tusia e Joel Castillo