O Le Tuuga a Shelly
Talu ai nei sa foliga mai e leai se tasi sa mafai ona tuuina atu ia Shelly le fesoasoani sa ia manaomia.
“Aua e te fefe: aua ou te ia te oe: aua le fetepatepai; aua o au o lou Atua: ou te faamalosia oe; e moni ou te fesoasoani ia te oe” (Isaia 41:10).
“Ei, Shelly!” Sa tilotilo atu Shelly mai le nonoaina o ona seevae tamoe tuai ma iloa atu Rosa o loo talotalo mai le laina amata. “Sau loa,” sa valaau mai ai Rosa. “O le aso lenei o le a ta faatoilaloina la tatou taimi sili ona lelei!”
Sa ataata Shelly. O le tala lava lea a Rosa i tolegiga uma lava.
E lua mea e fiafia ai Shelly i lana a‘oga tulagalua fou. O le mea muamua o le i ai i le au tamomoe. Pe a tamoe o ia, sa ia lagonaina le mama i totonu, e pei na te le manaomia ona popole i soo se mea.
Lona lua o mea e fiafia i ai o ia o le leai o se tasi iinei sa iloa o ona matua na faatoa tatalaina le la faaipoipoga.
Sa toe toso tasi e Shelly le nonoa o lona seevae ma tamoe loa e faatasi ma isi teine i le au moligafua. Auoia! Sa ia faamimigi a o mau ona tamatamaivae i le pito o lona seevae tamoe. E faapefea ona ia ta‘u atu ia Tama ua ia toe manaomia ni seevae fou?
Ina ua uma le tuuga, sa faailoga e Shelly, o Rosa, Becca ma Tiana lo latou taimi fou e sili ona lelei o le moligafua. “Na ou fai atu o le a tatou faia i le aso lenei!” O le tala lea a Rosa.
Sa ata Shelly. Sa ia tuu atu le fua i lo latou faiaoga ma punou e tatala manoa o ona seevae.
“Manaia le tuuga, suga,” na fai mai ai Ms. Goldmann. “E lelei tele le tou galulue faatasi. Aua nei galo e totogi lou pili o tuuga taeao.”
Na mou ese le ataata a Shelley. Na matuai galo lava ia te ia lena mea!
A o tietie atu i le pasi mo le aiga, pau lava le mea na mafaufau i ai Shelly o seevae ma le pili o tuuga. Sa lei manao e tuuina atu ia Tina se isi mea e popole ai. Ma o le taimi mulimuli na ia valaauina ai Tama mo se tupe faaopoopo, na foliga mai sa le fiafia o ia. Talu ai nei sa foliga mai sa leai se tasi e mafai ona tuu atu ia te ia le fesoasoani sa ia manaomia.
Ina ua ia taunuu i le fale, sa alu sao Shelly i lona potu. I le aiga o le afiafi, na talanoa ma tausua tuagane ma uso o Shelly, ae sa ia tuleia solo ana meaai i lana ipu.
Ina ua uma le meaai o le afiafi na fesoasoani Tina ia Shelly e tapena le laulau. “Ou te feiloai ma Epikopo Parker i le po nei,” o le tala lea a Tina. “E te fia sau e fai se faamanuiaga faaleperisitua?”
Na lue atu le ulu o Shelly. Sa ia misia lava faamanuiaga e masani ona tuu atu e Tama ia te ia pe a popole pe ma‘i o ia.
I se taimi mulimuli ane, a o tuuina atu e Epikopo Parker se faamanuiaga, sa maua e Shelly se lagona manaia loloto i totonu. “Shelly, o lou tama e le o toe i ai i lou aiga e fesoasoani ia te oe i le taimi nei,” o lana tala lea i le faamanuiaga. “Ae o lou Tama Faalelagi o loo i ai pea i taimi uma. Ou te faamanuia ia te oe ina ia e mafai ona talanoa atu ia te Ia e pei lava ona e faia i lou tama, ma o le Tama Faalelagi o le a fesoasoani pea ia te oe.”
Sa lagona e Shelly ua sili atu le mama nai lo se isi lava taimi umi. Sa i ai se lagona mafanafana i totonu na tau atu ia te ia e moni upu a le epikopo. E alofa le Tama Faalelagi ia te ia ma e faalogo ia te ia. Faatasi ai ma Lana fesoasoani, atonu o le a mafai ona lava lona lototele e talanoa ai i ona matua.
I le agai atu i le fale, sa ia tau atu ia Tina e uiga i le seevae, ma le pili o le tuuga. I le po lena sa ia tootuli ma ole atu i le Tama Faalelagi e fesoasoani ia te ia e maua le lototele e talanoa ai i lona tama. Sa ia tatalo foi e uiga i ai i luga o le pasi i le aoga i le taeao i le aso na sosoo ai. E oo atu i le taimi na taunuu ai i le fale mai le aoga, sa ia lagona ua lava le lototele e valaau atu ai i lona tama. O le taimi lea sa le‘i foliga ita pe lē fiafia mai o ia ina ua ia tau atu le mea sa ia manaomia. Na tali mai ana tatalo.
I ni nai vaiaso mulimuli ane, na nonoa e Shelly ona seevae tamoe fou ma tamoe atu ia Rosa ma isi teineiti. Sa manaia le lagona o le iloaina sa i ai se au maoae na lagolagoina o ia. Sa le manaomia ona ia tamoe na o ia lana tuuga.
Ata na tusia e Apryl Stott