Pa’i, O Oe!
E alala le tusitala i Iuta, ISA.
Sa lei foliga mai e pei o se manatu malie—ae, e le malie ia Ally.
“Ou te fia alofa i soo se tasi aua e tonu lea” (Tusipese a Tamaiti, 83).
“Ua ou fiafia lava mo le malologa!” Sa ta‘u atu e Ally ia Lauren a o la tuuina a la pusa o meaai i le fata i lo latou potuaoga. “Faatoa fai mai Tami o le a tatou taaalo uma faatasi i le [taaloga] pa’i i le malae taalo i le aso.”
“Manaia!” O le tala lea a Lauren. “Ou te fiafia i le [taaloga] pa’i.”
Sa fiafia ma ofo Lauren na valaaulia e Tami Ally e taalo. Sa masani ona agaleaga Tami ia Ally. Sa fiafia Lauren ua iu lava ina taumafai Tami e agalelei.
“Ou te manaomia ona ave muamua se tusi i le potutusi, ia mautinoa latou te le amata e aunoa ma au.” Sa ataata Ally a o tamoe i le ala savali i le faletusi.
Sa tamoe atu Lauren i le malae taalo. Ina ua ia taunuu iina, ua uma ona faapotopoto e Tami isi tamaiti i totonu o se li‘o. Sa tamoe atu Lauren e faatasi ma i latou.
“Se tope mai, tagata uma!” Sa valaau atu ai Tami a o ia faapotopoto faafufusi mai tagata uma i totonu. “E i ai sou manatu malie ou te manao e ta‘u atu i tagata uma ae lei oo mai Ally iinei.”
Sa lei maua se lagona lelei a Lauren e uiga i lenei mea.
Sa faafufusi mai uma tamaiti i totonu e faalogo. “Nai lo le mauaina o tagata uma e pei ona masani ai,” na fai mai ai Tami, “sei o tatou [taaalo] pa’i na o Ally. Ae e lelei pe a le taua e se tasi i ai, nei tei!” Sa ata lili Tami. Sa foliga mai sa matua mitamita ia te ia lava.
Sa tilotilo atu Lauren i isi tamaiti i le li‘o. O le toatele o nei tamaiti e lei agalelei ia Ally talu mai le vasega amata. O le taimi lena na amata ai ona agaleaga tamaiti ia Ally. Latou te toe ia te ia ma taufaalili ia te ia. O le tele o taimi e amata e Tami ona mulimuli ai lea o isi tamaiti.
Sa le fiafia lava Lauren i le ala sa latou taulimaina ai Ally. Sa ia filifili i le taimi lena o le a le mulimuli o ia ia i latou. Sa ia iloa o tagata uma o se atalii/afafine o le Atua ma e tatau ona taulimaina ma le agalelei.
Sa ia manava loloa ma tilotilo atu i mata o Tami. “E le logomalie lena manatu ia te au. Ou te manatu e le tatau ona tatou faia faapena Ally. Ia, ou te le fia taalo.”
Sa savali ese Lauren mai le li‘o ma amata ona toe foi atu i le aoga na o ia e sue Ally.
Ae sa faapea lava o ia sa na o ia.
Ona ia faalogoina lea, “Ei, faatali!” Sa faliu Lauren i tua ma sa i ai iina le toatele o tamaiti mai le li‘o a Tami. Sa le talitonu o ia!
“Sei o tatou o e sue Ally ma amata sa tatou lava taaloga o le pa’i,” o le tala lea a Damon.
“Ou te fia taalo foi!” Fai mai ai Lea. Sa luelue mai ulu o isi.
Sa ataata Lauren. Ua mou ese lena lagona leaga i lona manava.
“Lelei le manatu!” O le tala lea a Lauren. “O Ally la le ua sau.”
Sa ia liliu atu ma popo Damon i lona tauau. “Pa’i, o oe!” na ia ee atu ai, ma tamoe atu ia Ally. Ma na taututuu mai uma tamaiti i ona tua.
Ata na tusia e Steven Keele