Faalolovaia le Lalolagi e ala i Faasalalauga Faaleagafesootai
Mai se saunoaga na tuuina atu i le aso 19 o Aokuso, 2014, i le taimi o le Vaiaso o Aoaoga i le Lotoa o le Iunivesite o Polika Iaga.
Ia faasalalau i le lalolagi ia savali ua faatumulia i le amiotonu ma le upumoni.
Ua tatou ola i se tisipenisione moni o le tulaga ese.
O se tisipenisione o le talalelei o se vaitaimi ua maua ai le pule o le perisitua tatau, o sauniga ma le malamalama o aoaoga faavae ua maua i le lalolagi e faataunuu ai le fuafuaga o le faaolataga a le Tama mo Lana fanau. O se mea e manaomia i le faatuina o se tisipenisione o se auauna faamaonia a le Atua, o le ulu o se tisipenisione, e umia ma faagaoioia le pule ma ki o le perisitua paia. Sa faatuina tisipenisione o le Talalelei e ala mai ia Atamu, Enoka, Noa, Aperaamo, Mose, Iesu Keriso, Iosefa Samita, ma isi. I tisipenisione uma ua toe faaali mai upumoni o le talalelei—po ua tufatufaina atu—ina ia le faalagolago atoa atu tagata o lena vaitaimi i tisipenisione ua tuanai mo le malamalamaaga i le fuafuaga a le Tama.
O le liliuese mai le upu moni na tupu i tisipenisione taitasi na muamua atu. Ae peitai, o loo faaauau pea le galuega o le faaolataga lea na amata ae lei faamaeaina i na uluai tausaga i le tisipenisione mulimuli. Na faamalamalama atu e le Perofeta o Iosefa Samita e mo lenei mafuaaga, o le alualu i luma o le mamalu o aso e gata ai, e oo lava i le tisipenisione o le atoaga o taimi, “o se mafuaaga ua fiafia i ai tagata o le Atua i tupulaga uma; o se mataupu ua uiga ese le fiafia i ai o perofeta, ositaulaga ma tupu; ua latou tulimatai atu ma le naunautaiga fiafia i aso o loo tatou ola ai; ma le musuia i le fiafia ma le naunautaiga faalelagi ua latou pepese ai ma tusia ai ma valoia ai lo tatou taimi lenei.”1
I lenei tisipenisione o le talalelei silisili ma le mulimuli, “o se tuufaatasiga atoa ma o’oo’o ma atoatoa, ma se sooga mau faatasi o tisipenisione, ma ki, ma mana ma mamamlu, ma faaali mai e amata mai i aso o Atamu e oo mai lava i le taimi nei. Ma ua le gata i lenei, ae o mea na sa lei faaalia mai lava mai le faavaega o le lalolagi, ae sa tausi natia mai i e popoto ma mafaufau o le a faaalia … i le tisipenisione lenei o le atoaga o taimi” (MF&F 128:18).
O le Tisipenisione o le Atoaga o Taimi ma Tekinolosi
Ua faamanuiaina i tatou e ola ai, aoao, ma auauna atu i lenei tisipenisione aupito sili ona maoae. O se vaaiga taua o le atoaga o loo avanoa mo i tatou i lenei vaitau faapitoa o se alualu i luma faavavega o taulagalaga ma mea fou ia ua mafai ai ona televave le galuega o le faaolataga: mai le nofoaafi i uaealesi i leitio i taavale i vaalele i telefoni i eletonika i televise i komepiuta i satelite i le Initoneti—ma se lisi e le iu o tekinolosi ma meafaigaluega ua faamanuiaina ai o tatou olaga. O nei agai i luma uma o ni vaega a le Alii o le faanatinati o Lana galuega i aso e gata ai.
I le 1862 na saunoa mai Peresitene Polika Iaga (1801–77): “I mea uma na iloa i le saienisi ma faatufugaga, e moni lava ma aoga i le tagata na tuuina mai i faaaliga tuusao mai le Atua, e ui ina toaitiiti e faailoaina mai. Na tuuina mai faatasi ma se vaaiga e saunia le ala mo le manumalo a‘iai i le upumoni, ma o le togiolaina o le lalolagi mai le mana o le agasala ma Satani.”2
Faamolemole ia mafaufau nei i upu a Peresitene Spencer W. Kimball (1895–1985), na saunoa ai i le 1974, a o ia faamatalaina le lumanai o le galuega faafaifeautalai:
“Ou te talitonu o loo naunau le Alii e tuu mai i o tatou lima ni meafaigaluega faaonapo nei tatou te le i vaai muamua lava i ai. …
“Ma le Alii e tuuina atu nei vavega o fesootaiga, ma faatasi ai ma le faateleina o le taumafaiga ma le tuuto o o tatou faifeautalai ma i tatou uma, ma isi tagata uma na ‘auina atu’, e mautinoa lava le poloaiga paia o le a oo mai: ‘Aua, e moni, e ao ona alu atu le leo mai lenei nofoaga i le lalolagi atoa, ma i le vaega aupito mamao o le lalolagi—e ao ina talai le talalelei i tagata uma lava’ (MF&F 58:64).”3
Ma i le 1981 na aoao mai Peresitene Gordon B. Hinckley (1910–2008): “Matou te faatuatua malosi a o faalauteleina atu le galuega a le Alii, o le a Ia musuia tagata e faia ni mea o le a mafai ai e tagata o le Ekalesia, ona latou faafofoga i lapataiga a lo latou perofeta filifilia.”4
O savali ma ata sa masani ona manaomia ai ni aso, vaiaso, ma masina e auina atu ai ma maua a o lenei ua mafai ona fesootai atu i le lalolagi atoa i ni sekone. Matou te faafetai ia te Oe, Le Atua e, mo perofeta o e na aoaoina ma saunia i matou mo le taimi o loo matou ola ai—ma na uunaia i matou e faaaoga ai le alualu i luma o tekinolosi e lagolago ai le misiona faifai pea a Le Ekalesia a Iesu Keriso o le Au Paia o Aso e Gata Ai.5
Ua faanatinati e le Alii Lana galuega, ma e le o se mea na faafuaveta nei fesootaiga mamana taulagalaga ma mea fou o loo tutupu i le tisipenisione o le atoaga o taimi. O ala o faasalalauga o ni meafaigaluega faavaomalo e mafai ona aoga patino ma le lelei i tagata e toatele taitoatasi ma aiga. Ma ou te talitonu ua oo mai le taimi mo i tatou o soo o Keriso e faaaogaina lelei ia sili atu le aoga o nei meafaigaluega musuia e molimau atu ai i le Atua le Tama Faavavau, o Lana fuafuaga o le fiafia mo Lana fanau, ma Lona Alo, o Iesu Keriso, o le Faaola o le lalolagi; e folafola atu le moni o le Toefuataiga o le talalelei i aso e gata ai; ma faataunuu le galuega a le Alii.
E tatau ona mulimulitaia ni nai taiala autu a o tatou faaaogaina ala o faasalalauga faaleagafesootai e faailoa atu ai le savali o le talalelei:
1. Ia Faamaoni ma ia Faifai Pea
Muamua, o i tatou o soo ma o la tatou savali e tatau ona faamaoni. O se tagata po o se oloa e le faamaoni e pepelo, e le moni, ma e faafoliga. O a tatou savali e tatau ona moni, faamaoni, ma sa‘o. E le tatau ona tatou soona faateleina se mea, teuteu i mea pepelo, pe faafoliga i se isi, po o se mea e le o avea ai i tatou. E tatau ona faatuatuaina ma anoa a tatou anotusi. Ma o le faailoaina i luga o le Initoneti e le o se laisene e avea ai ma faresaio.
E faamalosia le faamaoni aiai e ala i le tumau. O savali o le talalelei e te faasoa atu o le a taliaina lelei pe afai o lau faataitaiga faa-Keriso e faamaonia ai le mamanu faifai pea o au savali.
O Sister Bonnie L. Oscarson o se faataitaiga malosi o le mana o le faifai pea i le ala o faasalalauga faaleagafesootai. Ina ua valaauina e avea ma peresitene aoao o Tamaitai Talavou ia Aperila 2013, o e na mulimuli i lana Pinterest na faaluaina. Na saunia e savali talu ai a sister Oscarson faamaoniga ua lava lona faamaoni, na uunaia se tagata tusitusi i le initoneti e fesili atu, “Pe o le a pasi le suega a Bonnie Oscarson a lau itulau o le Pinterest? … O le a le filifiliga a tagata pe o ai oe pe afai pau mea uma latou te iloa o mea o loo i lau itulau o le ala o faasalalauga faaleagafesootai?”6
2. Siitia ma Faagaeetia
Lua, o i tatou ma a tatou savali e tatau ona faagaeetia ma siitia, nai lo le tauupu, finau, faasala, po o le faamaasiasi.
Faasoa atu le talalelei ma le alofa moni ma le popole mo isi. Ia lototele ma lototoa, ae le o le faamaualuga, i le lagolagoina ma le puipuia o o tatou talitonuga, ma aloese mai finauga. I le avea ai ma soo, o la tatou faamoemoega o le faaaoga lea o alaata o faasalalauga faaleagafesootai e avea o ni auala e faasusulu atu ai le malamalama ma le upumoni o le talalelei toefuataiina a Iesu Keriso i se lalolagi o loo faateteleina le pogisa ma le gaogaosa.
3. Faaaloalo i Meatotino Faalefaatufugaga
Lona tolu, o i tatou ma a tatou savali e tatau ona faaaloalo i meatotino a isi tagata ma faalapotopotoga. O lona uiga e le tatau ona e fatuina sau lava anotusi i le faaaogaina o se tusiga ata, igoa, ata, musika, vitio, po o isi anotusi e aunoa ma le faatagaga. O le anotusi i le Faletusi o le ala o Faasalalauga i luga o LDS.org, vagana ua faailoa, ua uma ona kilia mo le faaaogaina e tagata o le ekalesia e aunoa ma le sailia o se faatagaga mai le Ekalesia. E mafai ona maua faamatalaga faaopoopo e uiga i le faaaogaina o ala o faasalalauga o le Ekalesia i le social.lds.org.
Pe a e faasoa atu savali i le initoneti, ia mautinoa ua malamalama isi o loo e faailoa atu ou lava manatu faaletagata ma lagona. Faamolemole aua le faaaogaina le tagavai a le Ekalesia po o le faapea atu o loo e tautala e fai ma sui o le Ekalesia.
4. Ia Atamai ma Mataala
Lona fa, ia atamai ma mataala i le puipuia o oe lava ia ma i latou e te alofa i ai. E tatau ona tatou manatua o le Initoneti e le taitai lava galo. Soo se mea e te fesootai atu e ala i se ala o faasalalauga faaleagafesootai e moni lava o le a ola e faavavau—e tusa lava pe o le saite po o se polokalama e mafai ona folafola atu ia se isi itu. Na o le fai atu a po o le faapipii ai pe afai e te manao i le lalolagi atoa e mauaina lau savali po o le ata mo le taimi atoa.
O le mulimuli i nei taiala faigofie o le a mafai ai e tagata o le Ekalesia i le lalolagi atoa ona fatu ai ma faasoa atu savali o le talalelei lea o le a mafua ai e le malamalama ona“aumaia mai le pouliuli i le malamalama” (Mamona 8:16).
O Se Valaaulia FaaAposetolo
O mea ua ausia o le taimi nei i lenei tisipenisione i le fesootai atu o savali o le talalelei e ala i faasalalauga faaleagafesootai o se amataga lelei—ae ua na o se faatulutulu laitiiti. Ou te tuuina nei atu ia te outou le valaaulia e fesoasoani ina ia suia le faatulutulu i se lolovai. E amata atu i le aso, ou te apoapoai atu ia te outou e tafi le lalolagi i savali ua faatumulia i le amiotonu ma le upumoni—savali ia e faamoni, faagaeetia, ma tauleleia—ma e moni lava e tafi le lalolagi e pei o se lolo (tagai i le Mose 7:59–62).
Ou te tatalo o le a tatou le na ona auai i se lolo e faafuasei ona oso vave mai ona galoma atu lea e pei lava ona vave oso mai. Ou te le o fautuaina atu se amataga feilafi lea tatou te vave ona se‘e atu i le isi galuega e sosoo ai o la tatou lisi umi o mea o le talalelei e fai. Tatou te le manaomia le avea ma ni tagata e tomai faapitoa i ala o faasalalauga faaleagafesootai po o e faananau i ai. Ma e le manaomia lo tatou faaaluina o le tele o le taimi i le fatuina ma le faasalalauina atu o savali faigata.
Manatu i le aafiaga e mafai ona tatou faia a o saofaga atu le faitau selau afe ma le faitau miliona o tagata o le Ekalesia toefuataiina a le Alii i ni auala laiti i le lolovai o loo faatupulaia. Tau ina ia mafai e a tatou taumafaiga laiti a le toatele, taumafaiga taitoatasi ona maua ai se timuga tumau o le amiotonu ma le upumoni lea e faasolo ina faatumuina ai le tele o alavai ma vaitafe—ma iu ai ina avea o se lolo lea e tafi ai le lalolagi. “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma o mea iti e tutupu mai ai mea tetele” (MF&F 64:33).
Ua faamanuiaina i tatou i le tele o auala; ma o le ua tuuina mai i ai mea e tele e sueina i ai mea e tele. Ou te tatalo: ia mafai ona outou malamalama atoatoa i le taua faaleagaga ma faamanuiaga o le ola ai i le tisipenisione o le atoaga o taimi, ina ia i ai o outou mata e vaai manino ai i avanoa ma mailei o tekinolosi ofoofogia o loo avanoa ia i tatou i le taimi nei, ina ia mafai ona faateleina lou gafatia e faaaoga ai ma le tatau nei meafaigaluega musuia, ma ina ia e maua musumusuga ma taitaiga e uiga i le matafaioi e tatau ona e fesoasoani ai i le tafiina o le lalolagi e pei ona faia e le lolovai o le upumoni ma le amiotonu. A o outou fetaomi atu i luma i lenei galuega paia, ou te folafola atu o le a faamanuiaina outou i le olaga nei i ni auala taitoatasi, patino, ma e tatau ai o le a saunia oe mo le faavavau.
Ua faanatinati e le Alii Lana galuega, ma e le o se mea na faafuaveta nei fesootaiga mamana taulagalaga ma mea fou o loo tutupu i le tisipenisione o le atoaga o taimi.
Ou te apoapoai atu ia te outou ia tafiina le lalolagi i savali ua faatumulia i le amiotonu ma le upumoni—savali e faamoni, faagaeetia, ma tauleleia.