Ua Tofia Taitai Fou o Eria

Asiasi ane i le news.lds.org mo se faaopoopoga o tala fou ma mea e tutupu i le Ekalesia.

Ua faasilasila mai e le Au Peresitene Sili ia suiga nei i tofiga faaleautaitai i eria e amata atu i le aso 1 o Aokuso 2015. O uso uma o Au Peresitene o Eria o ni uso o le Korama Muamua po o le Korama Lua a Fitugafulu.

Ua tofiaina Fitugafulu e ala i faaaliga, i lalo o le taitaiga a le Au Peresitene Sili, e fesoasoani i le Korama a Aposetolo e Toasefululua i la latou auaunaga i le lalolagi atoa.

“O le talafaasolopito o Fitugafulu e toe foi lava i le Feagaiga Tuai,” o le saunoaga lea a Peresitene Boyd K. Packer o le Korama a Aposetolo e Toasefululua¹ O le faasinoga muamua i Fitugafulu o loo maua i le Esoto 24:1, ma o loo faasino mulimuli ane i ai i le Numera 11:16–17, 25, ina ua faapotopotoina mai i latou e fesoasoani ia Mose.

I le taimi o le misiona faaletino a Keriso sa Ia valaaulia ia Fitugafulu, faatonu i latou i se auala e tutusa lava ma le au Aposetolo e Toasefululua ma auina atu ia te i latou “ai ona luma”, faamatala atu o le a faalogo foi i latou o e faalogo i o latou leo i Lona siufofoga (tagai i leMataio 10:1, 16–17 Luka 10).

“Matou te talitonu i le faatulagaga sa i ai i le Ekalesia Anamua,” ona saunoa ai Peresitene Packer. “Ma e aofia ai ma Fitugafulu.” (Tagai i le Mataupu Faavae o le Faatuatua 1:6.) I lenei vaitaimi o le televave o le tuputupu ae o le Ekalesia, e taua tele le matafaioi o loo faataunuu ai e Fitugafulu e lagolago ai i le au Toasefululua. “O Fitugafulu e ala i le faamatuu atu e mafai ona faia soo se mea e tau atu e le au Toasefuulua ia i latou e fai,” na saunoa ai Peresitene Packer.²