Savali a le Au Peresitene Sili
Tu Atu e Avea ma se Malamalama
Sa ou maua le avanoa e auai ai i le tele o faafiafiaga faaleaganuu sa faia i le faapaiaga o malumalu. Sa ou fiafia i na faafiafiaga uma, e aofia ai le faafiafiaga e sili ona lata mai nei sa ou auai ai i Phoenix, Arisona, ISA, ia Novema talu ai.
O le autalavou o le Au Paia o Aso e Gata Ai sa auai i ni polokalama o faafiafiaga faaleaganuu ofoofogia, ma e manatua pea. O le tausaga ua mavae i Phoenix, a o lei faia le faafiafiaga, sa ou fai atu i e auai, “O outou o fanau o le malamalama.”
Ou te manao i talavou uma o le Ekalesia ia iloa o i latou o fanau o le malamalama. O lea tulaga, ua ia i latou se tiutetauave ia avea e “faapei o mea e faamalamalama ai le lalolagi” (Filipi 2:15). Ua ia i latou se tiute e faasoa atu upumoni o le talalelei. E i ai sa latou valaauga e tu atu o se sulu o le malumalu, e faasusulu atu le malamalama o le talalelei i se lalolagi ua faateteleina le pogisa. Ua ia i latou se tiute e faatumauina le susulu pea o le malamalama ma ia mu saesae.
Ina ia mafai ona avea i tatou “o se faaaoao i e ua faatuatua” (1 Timoteo 4:12), e tatau ona talitonu i tatou lava. E tatau ona tatou atiina ae le faatuatua e manaomia e ola ai faaleagaga, ma saunia se malamalama mo isi. E tatau ona tatou faafaileleina a tatou molimau seia oo ina avea ma se taula i o tatou olaga.
O nisi o auala e sili ona lelei e maua ai ma faatumau ai le faatuatua tatou te manaomia i le aso o le faitau ma suesue i tusitusiga paia ma ia tatalo e le aunoa ma le filiga. I le autalavou o le Ekalesia, ou te fai atu, afai e te lei faia lenei mea, ia atiina ae nei se mausa o le suesueina o tusitusiga paia i aso taitasi ma le tatalo. A aunoa ma nei faatinoga taua e lua, o uunaiga mai i fafo atu o le Ekalesia ma o nisi taimi o le faigata o le olaga nei e mafai ona faaitiitia ai pe iu ai lava ina faaumatia lo outou malamalama.
E le faigofie tausaga o le talavou. O ni tausaga e aupito taua e faaosoosoina ai outou e Satani ma na fai ai le mea sili e faatosina ese ai outou mai le ala lea o le a taitai atu ai outou e toe foi atu i lo outou aiga faalelagi. Ae a o outou faitau ma tatalo ma a o outou auauna atu ma usiusitai, o le a oo ina outou iloa lelei le “o le malamalama ua susulu i le pouliuli” (MF&F 6:21), o lo tatou Faataitaiga ma lo tatou malosi—e oo lava i le Alii o Iesu Keriso. O Ia o le Malamalama e tatau ona tatou uuina i luga ma faamalamalama ai le pogisa o loo faateteleina (tagai i le 3 Nifae 18:24).
Faatasi ai ma se molimau malosi i le Faaola ma Lana talalelei toefuataiina, e leai se tapulaa o avanoa e susulu atu ai. E siomia ai oe i aso taitasi, i soo se tulaga e maua ai outou lava. A o e mulimuli i le faataitaiga a le Faaola, o au faataitaiga o le a avea ma avanoa e avea ai ma se malamalama, pei ona sa i ai, i olaga o i latou o loo siomia ai oe—pe o i latou o ni tagata o lou lava aiga, uo i le vasega, tagata faigaluega-faatasi, na o ni tagata masani, po o ni tagata ese.
Pe a avea oe o se malamalama i le lalolagi, o le a lagonaina e tagata o loo siomia oe se agaga faapitoa lea o le a latou mananao ai e faifai mea faatasi ma oe ma mulimuli i lau faataitaiga.
Ou te aioi atu i matua ma taitai o a tatou autalavou e fesoasoani ia i latou e tutu mausali mo le upumoni ma le amiotonu. Fesoasoani e tatala faalautele i la latou vaaiga ia faitotoa o le aoaoina, o le malamalama, ma le auauna atu i le malo o le Atua. Fausia i totonu o i latou le malosi e tetee atu ai i faaosoosoga a le lalolagi. Tuu atu ia te i latou le naunautaiga e savavali i le mama ma le faatuatua, ia maua le agaga tatalo, ma vaai atu i le lagi e avea ma lo latou taula i taimi uma.
I la tatou autalavou, ou te faapea atu, e alofa lo tatou Tama Faalelagi ia te outou. Tau ina ia outou lagonaina foi le alofa ua i ai i taitai o le Ekalesia mo outou. Ia outou maua se manao e auauna atu i lo outou Tama Faalelagi ma Lona Alo. Ma ia outou savavali i le upumoni ma laulaututu e fai ma se malamalama i fanau a le Atua.
Ata faatusa o le moli o le ava na saunia e dzm1try/iStock/Thinkstock