O se Tatalo i le Nofoaga Autu o Talafaasolopito o Aiga

Susana Magdalena Gos de Morresi, Tierra del Fuego, Atenitina

Ina ua uma ona valaauina au e avea ma le faufautua o talafaasolopito o aiga mo la matou paranesi i Ushuaia, Atenitina, na ou lagonaina se manao loloto e tatau ona saili mo ou tuaa. Sa faigata le galuega, ma sa tau leai se aso ou te lei taumafai ai se fuafuaga fou ina ia iloa po o ai i latou ma o fea na latou o mai ai i Italia.

I le 2006 sa valaauina a‘u e vaaia le nofoaga autu o talafaasolopito o aiga. Sa faaauau pea ona ou lagonaina le le fiafia, e ui i lea, e ala i lo‘u toilalo e saili ni faamatalaga e uiga i lo’u aiga. Na faatupulaia lo‘u le fiafia ina ua tauia le sailiga a lo’u toalua mo ona tuaa. O lena tausaga, na maua ai e Ruben igoa e sili atu ma le 5,000 o ona tuaa o e sa ola i San Ginesio, Macerata, Italia.

I se tasi o aoauli i le nofoaga autu o talafaasolopito o aiga a o maua e Ruben lea tuaa ma lea tuaa i luga o ata mataninii, sa ia fiafia ma faaauau pea ona alaga atu, “O le isi tasi!” I le lagona ai o le lotovaivai, ma loimata i o‘u mata, sa ou faailoa atu lo’u faanoanoaga, ma faaopoopo i ai lo‘u le iloaina o le mea e fai e saili ai tagata o lo’u aiga. I le vaaia o lo‘u tiga, sa ia fautua mai ma te tatalo. Sa ma faia, ma aioi atu mo le Agaga Paia ina ia faamalamalamaina i maua ina ia mafai ona ma faatelevaveina le galuega mo lo‘u aiga.

I le taimi o le ma tatalo, na faafuasei lava ona manatua e Ruben se uepisaite faapitoa e faaalia ai faaiu o tagata Italia. O le taimi lava na uma ai le ma tatalo, sa ma siakiina loa. I ni nai minute na ma mauaina ai tagata e toafa o loo i ai lou igoa a o lei faaipoipo, o Gos, i le lisi faasinoala o telefoni a le tamai taulaga Italia o Iutizzo, i Italia i matu.

Sa vave ona ou auina atu ni tusi ia i latou taitoatasi. Na tali mai se tasi o i latou, ma faapea mai o lona toalua sa i ai le faaiu lava lea e tasi, ae e le aiga o ia i le aiga. Ae peitai, sa ia iloaina se tasi o tuafafine o lou tama matua ua maliu, ma sa ia ofo mai o le a ia fesootai atu i se tagata o le aiga, o loo soifua pea.

I ni nai masina mulimuli ane, ia Tesema 2006, na matou mauaina ai se telefoni mai atunuu mamao.

“Pe o Susana Gos lea?” na fesili mai ai se leo o se alii mai se mea mamao.

“Ioe,” o la’u tali atu lea.

“O lou tausoga lenei mai Italia,” o lana tala lea.

O le na valaau mai, o Giovanni Battista Tubaro, o le tama a Maria le tuafafine o lo‘u tamamatua!

Ia Mati 2008, na oo mai ai Giovanni ma lona faletua, o Miriama, e asiasi mai ia i matou i Atenitina. Na matou faailoa atu ia te i latou le talalelei ma le galuega o talafaasolopito o aiga, ma mo ni nai aso sa matou talanoa ia i latou o e na muamua atu ia i matou. O lenei o o latou igoa taitasi i le agai i tua i le ono augatupulaga ua i ai se foliga ma se talafaasolopito.

Ua faatagaina au e le talafaasolopito o aiga ia mafai ai ona ou saofaga atu i se vaega taua o le galuega a le Alii. Ua ia aumaia foi au ia ou latalata atili atu i ou tuaa—o fanau a lo tatou Tama Faalelagi semanu ou te le iloa lava pe ana leai se tatalo o le faatuatua i le nofoaga autu o talafaasolopito o aiga.