Misiona po o le Tupe?

Gelzcke Felix Nogueira

E alala le tusitala i Fortaleza, Pasila.

E leai se aofaiga o tupe e tutusa ma le faamanuiaga o le vaai atu i aiga ua saunia e o i le malumalu ma faamauina.

Ata na tusia e David Malan

Ua mavae le tausaga talu ona avea ma se tagata o Le Ekalesia a Iesu Keriso o le Au Paia o Aso e Gata Ai, sa ou auina atu au pepa e avea ma se faifeautalai faamisiona. Sa matuai tetee lava lo‘u aiga ia te au i le auauna atu i se misiona ma le manatu faapea sa tatau ona ou sueina lou faailoga o le [master] matuaofaiva nai lo lena. Na faatoa uma lo‘u faailoga [bachelor], ma o la’u miti sa i ai i taimi uma lava ia maua sou faailoga [master]matuaofaiva pe a uma. Sa naunau au polofesa e fesoasoani foi ia te au ona sa avea au ma se tamaitiiti aoga lelei.

A o ou sauni e tuua mo la‘u misiona, sa matuai faigata le olaga mo lou aiga i mea tautupe. O lo‘u uso matua e leo toe faigaluega. I se taimi puupuu mulimuli ane, na amata ona pau le tamaoaiga o le kamupani na faigaluega ai lo‘u tama mo le tele o tausaga, ma na le toe faigaluega ai. Na iu ina faaaogaina uma e lou tama ana faamanuiaga o le malo e fesoasoani ai i lo’u tinamatua, ma i se tasi po sa ou vaai ai ia te ia o tagi ona na te le iloa pe faapefea ona tausi lona aiga.

I le taimi lea, sa ou mauaina ai se sikolasipi i le iunivesite lea sa toeitiiti tutusa ma le afa o se totogi e sili ona laitiiti. Pe a ou maua o‘u totogi, ou te totogi muamua lava lau sefuluai. Ae ina ua ou maua lo‘u totogi talu ai nei lava ae ua leai se galuega a lo’u tama, na fai mai ia te au lou tina e aua le tuuina atu tupe i le Ekalesia ona matou te manaomia i le aiga. Sa ou faamatala ia te ia le sefuluai ma lona taua ma faaali atu ia te ia le folafolaga na tuuina mai e le Alii i le Malaki 3:10. E ui ina sa le‘i fiafia o ia, sa ou totogiina la’u sefuluai ma na ou iloaina sa sa‘o.

A o ou faaauau pea la‘u tapenaga mo le misiona, sa ou ulufale atu i se tauvaga i se iunivesite i le lotoifale e tau lava ina vaai pe faapefea ona ou faia. Sa ou pasia ma na ofoina mai se galuega lea e mafai ona ou maua ai toeitiiti lava o le tele o le tupe lea sa maua e lo’u tama i lana galuega. O le a lava lea e tausia ai lo‘u aiga seia oo ina mafai ona litaea lo’u tama. Na faamoemoe lo‘u aiga o le a ou taliaina le galuega.

Sa ou tatalo soo, ma sa tali mai le Alii e tatau ona ou alu i le galuega faamisiona. Sa ou faalagolago ia te Ia ma taliaina lo‘u valaauga i le Misiona a Pasila Santa Maria. Sa faamanuiaina e le Alii lo‘u aiga a o ou alu atu i la’u misiona. Ou te iloa sa tatala mai pupuni o le lagi (tagai i le Malaki 3:10). Sa mafai ona toe maua e lou tama ma lou uso ni galuega, ma na mafai ona tausia e lou aiga ni povi taususu mo se tupe faasili.

Ua faatupulaia la‘u molimau o Iesu Keriso ma Lana galuega, ma vaai i le olioli i foliga ma le suiga i loto o i latou na ou auauna atu i ai o se mea e taua tele ia te au. E leai se aofaiga o tupe e tutusa ma le faamanuiaga o le vaai atu i aiga ua saunia e o i le malumalu ma faamauina.

O Le Sefuluai: O Se Tofotofoga o Lo Tatou Faatuatua

“O‘u uso ma tuafafine pele, o le faamanuiaga e faavavau o le sefuluai e moni. Sa ou oo i ai i lo‘u olaga ma i le olaga o lo’u aiga. O le tofotofoina o lo tatou faatuatua pe a tatou ola i le tulafono o le sefuluai i lo tatou usiusitai ma le ositaulaga. Aua, i upu o le Perofeta o Iosefa Samita, ‘o se tapuaiga e le manaomia ai le ositaulagaina o mea uma e le i ai lava ni mana e lava e maua ai le faatuatua e tatau ai mo le ola ma le faaolataga’ (Iosefa Samita, Lectures on Faith [1985], 69).”

O Elder Robert D. Hales o le Korama a Aposetolo e Toasefululua, “O Le Sefuluai: O se Tofotofoga o le Faatuatua ma Faamanuiaga e Faavavau,” Liahona, Nov. 2002, 29.