Seia Tatou Toe Feiloai
Sa Ia Aoao Mai ia te Au le Faatulagaga Faalelagi o le Faavavau
Mai le Autobiography of Parley P. Pratt (1979), 297–98.
Ua ou mafai nei ona alofa ma le agaga faatasi ai foi ma le malamalama.
Faamatalaga mai le Joseph Smith and His Friends, saunia e William Warner Major, faaaloaloga o le Falemataaga o le Talafaasolopito o le Ekalesia
I Filatelefia, sa ou maua ai le fiafia o le toe maua o le isi taimi e feiloai ai ia Peresitene [Iosefa] Samita, ma le faaaluina o ni nai aso faatasi ma ia ma isi, ma le Au Paia i lena aai ma le itumalo.
I le taimi o nei faatalanoaga sa ia aoao mai ia te au le tele o mataupu faavae maoae ma le mamalu e faatatau i le Atua ma le faatulagaga faalelagi o le faavavau. O le taimi lea na ou maua mai ai ia te ia le manatu muamua o le faatulagaga faavavau o le aiga, ma le tuufaatasia e faavavau o le faatulafonoina i na sootaga e le faamatalaina faamomoiloto e leai se tasi ae na o le atamai silisili, mama aiai ma le loto mama, e iloa ai pe faapefea ona taui, ma o le mea o i le faavae tonu o mea uma e agavaa ai e ta’ua o le fiafia.
Faatoa ou iloa i le taimi lena sa ou aoaoina ai ia maua uigaalofa faaleaiga ma le tigaalofa e faatatau tonu lava i lenei tulaga faalelalolagi, o se mea e tatau ona faamasani atoa i ai le loto, ina ia mafai ona ia saunia mo lona tulaga faalelagi.
O Iosefa Samita na aoaoina au pe faapefea ona faatauaina sootaga faamomoiloto o le tama ma le tina, tane ma le ava; uso ma le tuafafine, atalii ma le afafine.
Na ou aoaoina mai ia te ia, o le toalua o lo‘u loto atonu e mafai ona faamautuina ia te au mo le olaga nei ma le faavavau atoa; ma o le faamamaina o tigaalofa ma uigaalofa lea sa tatou alolofa ai le tasi i le isi na tupuga mai i le punavai o le alofa paia e faavavau. Na ou aoao mai ia te ia e mafai ona tatou atiina ae nei uigaalofa, ma tuputupu ae ma faateleina ai i le faavavau atoa; a o le taunuuga o la tatou faatasiga e leai sona iuga o le a avea ma se fanau e pei o le tele o fetu o le lagi, po o oneone o le matafaga.
Na ou aoao mai ia te ia le moni o le mamalu ma le taunuuga o se atalii o le Atua, ua faaofuina i se perisitua e faavavau, o le peteriaka ma le taitai faalemalo o ana fanau e le mafaitaulia. Na ou aoao mai ia te ia, o le mamalu aupito maualuga o le tulaga faatamaitai o, le tu atu o se masiofo ma faitaulaga tamaitai i lana tane, ma nofotupu mo le faavavau ma faavavau lava o le tina masiofo o ana fanau e toatele ma e faateleina pea.
Na ou alofa muamua, ae sa ou le iloa pe aisea. Ae o lenei ua ou alofa—faatasi ai ma se mama aiai—ma se malosiaga o le siitiaina, lagona o le faaeaina, lea o le a siiina i luga loʼu agaga mai i mea e le tumau o lenei lalolagi gaogaosa ma faalautele ai e pei o le vasa. Sa ou lagona o le Atua o lo‘u Tama faalelagi moni lava; o Iesu o lo’u uso, ma o le toalua o lo‘u loto sa avea ma se soa o le tino ola pea, e faavavau; o se agelu auauna agalelei, ua tuuina mai ia te au o se faamafanafanaga, ma o se pale o le mamalu e faavavau ma faavavau lava. I se faapuupuuga, ua ou mafai nei ona alofa ma le agaga faatasi ai foi ma le malamalama.