Hangtud sa Sunod Natong Panagkita
Usa ka Pagbisita gikan sa Manluluwas
Gikan sa “An Experience of My Father’s,” Improvement Era, vol. 33 no. 11 (Sept. 1933), 677, 679; punctuation ug capitalization gi-moderno.
Dinhi diin ang Ginoong Jesukristo mipakita kanako.
Litrato ni Lorenzo Snow sa maayong kabubut-on sa Church History Library and Archives; detalye gikan sa The Second Coming, ni Harry Anderson
Human sa iyang pag-ampo, [ang akong amahan] nagpaabut og tubag, nga usa ka talagsaon nga pagpadayag gikan sa Ginoo. Mao nga siya nagpaabut—ug nagpaabut—ug nagpaabut. Walay tubag, walay tingog, walay pagduaw, walay pagpakita. Mibiya siya sa altar ug sa kwarto sa dako nga kahiubos. Miagi sa celestial nga lawak ug ngadto sa dako nga koridor usa ka mahimayaon nga mga pagpakita gihatag ni Presidente Snow nga akong isaysay sa mga pulong sa iyang apo nga babaye, nga si Allie Young Pond. …
“Usa ka gabii samtang mibisita ko ni Lolo Snow sa iyang kwarto sa Salt Lake Temple, ako nagpabilin hangtud wala na ang mga tigbantay sa pultahan ug ang mga magbalantay sa gabii wala pa moabut, maong si lolo miingon nga dad-on ko niya ngadto sa atubangang ganghaan ug adto ko pagawason. … Human kami mibiya sa iyang kwarto ug samtang kami diha pa gihapon ang dako nga koridor padulong ngadto sa celestial nga lawak, nag-una ako og lakaw Lolo sa diha gipahunong ko niya ug miingon: ‘Kadiyot lang, Allie, duna koy gustong isulti nimo. Dinhi nagpakita nako ang Ginoong Jesukristo sa panahon sa kamatayon ni Presidente Woodruff. Siya mitudlo kanako sa pagpadayon ug pag-organisar pag-usab sa Unang Kapangulohan sa Simbahan diha-diha dayon ug dili na maghulat sama sa gihimo human sa kamatayon sa naunang mga presidente, ug nga ako ang mopuli ni Presidente Woodruff.’
“Dayon si Lolo mipaduol og usa ka lakang ug gituyhad ang iyang wala nga kamot ug miingon: ‘Dinhi gayud Siya nagtindog, mga tulo ka pye gikan sa sawog. Ingon og nagtindog Siya sa usa ka palid sa solido nga bulawan.’
“Misulti kanako si Lolo unsa ka mahimayaon nga personahe ang Manluluwas ug gihulagway ang Iyang mga kamot, mga tiil, panagway ug ang matahum nga puting saput, ang tanan usa ka himaya sa pagkaputi ug pagkahayag nga hapit dili siya makatan-aw Kaniya.
“Dayon mipaduol pa siya og usa ka lakang ug mibutang sa iyang tuo nga kamot sa akong ulo ug miingon: ‘Karon, Apong Babaye, gusto ko nga hinumduman nimo nga kini mao ang pagpamatuod sa imong lolo, nga siya misulti kanimo sa iyang kaugalingong ba-ba nga siya nakakita gayud sa Manluluwas, dinhi sa Templo, ug nakigsulti Kaniya nga nag-inatubangay.’”
… Akong gisaysay kini nga kasinatian diha sa tulumanon sa sakrament sa Eighteenth Ward. Human sa miting si Elder Arthur Winter misulti nako nga siya usab nakadungog sa akong amahan misulti sa pagpakita sa Manluluwas ngadto kaniya diha sa templo nagtudlo kaniya dili lamang sa pag-organisar pag-usab sa Unang Kapangulohan diha-diha dayon apan usab sa pagpili og sama nga mga magtatambag ni Presidente Woodruff, nga sila si Presidente George Q. Cannon ug Joseph F. Smith.