Mga Handbook sa Simbahan—ang Sinulat nga Han-ay sa mga Butang
Sa atong pagsunod sa mga handbook ug paggamit sa tiningub nga kaalam nga gitanyag niini, ang Ginoo motabang kanato ug niadtong atong giserbisyuhan nga mahimong “nangatugob [hingpit] diha kaniya.”
Paghulagway pinaagi ni Suat Gürsözlü/iStock/Thinkstock
Isip usa ka returned missionary, nagkapuliki sa bag-ong pamilya ug sa akong kaugalingon nga kompanya, gitawag ko nga mahimong presidente sa igong gidak-on nga branch nga dunay daghang matinud-anon ug hingkod nga mga miyembro. Gibati ba nako nga andam, nabansay, ug edukado nga magsugod sa pagserbisyo? Wala! Ako dunay maayo nga mga magtatambag kinsa akong mahisgutan sa mga problema. Apan ang ilang tabang igo na ba? Dili!
Ang Ginoo naglaum nga ang “matag tawo makakat-on sa iyang katungdanan” (D&P 107:99), ug Siya naglaum kanato nga “[momahal] diha sa [atong] mga hunahuna … sa mga pulong sa [Dios]” (D&P 84:85). Dayon Siya naglaum kanato nga mosalig sa inspirasyon sa Espiritu Santo—nianang espesyal nga gasa nga gihatag ngadto sa tanan nga mga miyembro uban sa saad sa padayon nga giya ug pagpadayag.
Naghunahuna og balik niana nga calling ug sa uban pang mga calling, ako nakaamgo nga agig dugang sa Espiritu Santo ug sa mga kasulatan, ang nakatabang gayud kanako mao ang mga handbook sa Simbahan! Kini dakong tinubdan sa impormasyon—isip usa ka giya sa akong inisyal nga pagkat-on ug isip usa ka bililhon nga pakisayran samtang nagpadayon.
Nganong Gikinahanglan Man Nato ang mga Handbook sa Simbahan?
Si Elder Dallin H. Oaks sa Korum sa Napulog Duha ka mga Apostoles mitudlo, “Samtang ang mga handbook dili sama og pagtugot sa mga kasulatan, kini nagrepresentar sa bag-o nga mga paghubad ug sa pamaagi nga mga direksyon sa pinakataas nga mga awtoridad sa Simbahan.”1 Si Elder Russell M. Nelson sa Korum sa Napulog Duha ka mga Apostoles midugang nga kadtong mga general authority—ang Unang Kapangulohan ug ang Korum sa Napulog Duha ka mga Apostoles—mga tawo nga dunay “igong kahingkod, kasinatian, ug grabeng pagpangandam.”2
Sa ingon, ang mga handbook sa Simbahan nagpakita sa tiningub nga kaalam—gikuha gikan sa nasulayan, naprubahan nga mga kasinatian—sa mga propeta ug mga apostoles. Kana nga kaalam nagtudlo kanato sa labing maayong paagi sa pagkab-ot sa maayong mga resulta sa pagpatuman sa misyon sa Simbahan sa paglabay sa panahon. Ang Ginoo mitambag, “Pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam” (D&P 88:118; 109:7). Sigurado, ang kaalam diha sa mga handbook mopasarang niini ingon nga “labing maayo nga mga basahon.”
Ang mga Handbook Makatabang Kanato nga Mapabilin ang mga Polisiya, mga Pamaagi, ug mga Programa
Si Presidente Thomas S. Monson namahayag nga kon wala ang mga handbook, “mahimong imposible ang pagpabilin sa panag-uyon sa mga lagda, mga pamaagi, ug mga programa sa Simbahan.” Siya midugang, “Sa miaging katuigan, kami kinahanglan nga mokorihir sa daghang mga pagsulay sa maayo og tumong nga mga lider sa pag-usab sa pipila ka mga programa sa Simbahan.”
Si Presidente Monson miingon nga kon ang mga lider dili eksaktong mosunod sa mga pamaagi, “ang Unang Kapangulohan kinahanglang moaprubar sa aksyon o kini pagausbon.” Sa laing pagkasulti, kon atong ibaliwala ang mga handbook, kita nagdugang og buluhaton sa Unang Kapangulohan.
“Hapit sa tanang kahimtang,” siya miingon, “kon ang mga lider mobasa lang gayud, mosabut ug mosunod sa handbook, ang ingon niana nga mga problema dili motumaw. … Adunay kasiguroan sa pagsunod sa mga handbook.”3
Si Presidente Monson midugang nga bisan unsa pa man ang atong mga calling sa pagpangulo, ang mga handbook naglangkob og dakong tinubdan sa impormasyon ug giya nga makatabang kanato nga epektibong makapangalagad, makasabut sa tukma nga pag-function sa Simbahan, makakat-on ug makatuman sa atong mga katungdanan (tan-awa sa D&P 107:99), ug makaandam alang sa mga posisyon sa pagpangulo sa umaabut.
Ang Mga Handbook Nagtudlo Kon Unsa Ang Gikinahanglan
Ang mga handbook nagtudlo nga samtang “ang mga ginikanan adunay mahinungdanon nga responsibilidad sa pagtabang sa ilang mga anak sa pagpangandam sa pagbalik ngadto sa Langitnong Amahan,” ang “Simbahan sa Manluluwas naghatag og organisasyon ug pamaagi sa pagtudlo sa ebanghelyo ni Jesukristo sa tanang mga anak sa Dios.” Ang mga handbook nagtudlo usab nga ang Simbahan “naghatag sa awtoridad sa priesthood sa pagpangalagad sa mga ordinansa sa kaluwasan ug kahimayaan ngadto sa tanan kinsa mga takus ug andam sa pagdawat niini.”4
Ang doktrina nga gilatid sa pagdumala sa Simbahan makita sa unang tulo ka mga kapitulo sa Handbook 2: Administering the Church:
-
Mga pamilya ug ang Simbahan diha sa Plano sa Dios
-
Mga Baruganan sa Priesthood
-
Pagpangulo diha sa Simbahan ni Jesukristo
Kita kinahanglang magtuon og maayo niining tulo ka mga kapitulo. Kini nagpahinumdom kanato nga ang Simbahan “gitukod sa Dios aron sa pagtabang sa Iyang buhat sa pagpahinabo sa kaluwasan ug kahimayaan sa Iyang mga anak.”5 Kini naghimo niini pinaagi sa mga kalihokan, mga oportunidad, ug mga programa alang sa pagserbisyo, pagpanalangin, ug personal nga kalamboan nga mag-focus sa mga responsibilidad nga balaanong gisangon nga nagsuporta ug naglig-on sa mga indibidwal ug mga pamilya.
Kini nga mga responsibilidad “naglakip sa pagtabang sa mga miyembro sa pagsunod sa ebanghelyo ni Jesukristo, pagpundok sa Israel pinaagi sa misyonaryo nga buhat, pag-amuma sa mga kabus ug timawa, ug paghimo sa kaluwasan sa patay pinaagi sa pagtukod og mga templo ug paghimo sa gitugyan nga mga ordinansa.”6
Samtang kita makasabut niini nga doktrina nga gilatid, ang katuyoan ug tahas [role] sa tanan nga mga calling diha sa Simbahan nahimong klaro: “Ang mga lider ug mga magtutudlo priesthood ug auxiliary naningkamot sa pagtabang sa uban nga mahimong tinuod nga sumusunod ni Jesukristo.” Dugang pa, “ang mga organisasyon sa Simbahan ug mga programa anaa aron sa pagpanalangin sa mga indibidwal ug mga pamilya ug dili kini matapos diha lamang niini.”7
Ang mga handbook gibase sa mga kasulatan, lakip ang pahimangno sa Manluluwas kang Pedro: “Sa mahibalik na ikaw kanako, lig-una ang imong mga igsoon” (Lucas 22:32).
Ang Handbook Mopahigayon sa Pagpadayag
Samtang nagtabang sa usa ka dili kaayo aktibo nga miyembro nga mobalik sa simbahan, ang bishop sa miyembro miribyu sa kapitulo bahin sa Church discipline diha sa Handbook 1: Stake Presidents and Bishops. Dayon, human sa pagpakigsulti uban sa iyang kapangulohan sa stake, ang bishop nakahukom sa pagpahigayon og disciplinary council.
“Kami nagkita nang daan isip bishopric ug miribyu sa handbook aron pahinumduman ang among kaugalingon sa tukma nga mga pamaagi ug sa pag-ila sa mga punto nga may kalabutan sa kasamtangang kaso,” miingon ang bishop. “Kami mibati og kusog sa Espiritu sa Ginoo nga miabag kanamo samtang kami nagsultihanay uban sa miyembro.”
Sa kaulahian, human ang bishopric nag-ampo alang sa panabang sa Ginoo, usa sa mga magtatambag ang mibati nga sila kinahanglan usab nga mobasa og kusog sa mahinungdanon nga bahin sa Handbook 1 sa dihang nahuman na sila, ang bishop nangutana sa matag magtatambag kon unsay iyang girekomendar.
“Bishop, ikaw tingali matingala, apan mao kini ang akong gibati,” miingon ang unang magtatambag sa paghimo sa iyang rekomendasyon. Ang ikaduha nga magtatambag mibati usab sa ingon, sama sa gibati sa bishop.
“Ang pagbasa sa handbook ngadto sa usag usa mitugot sa Espiritu aron sa paglamdag sa atong mga hunahuna,” nahinumdom ang bishop. “Ang mga baruganan nahimong mas klaro kon sa unsang paagi kini may kalabutan niini nga sitwasyon, ug matag usa kanamo gigiyahan ngadto sa sama nga tubag. Kami giandam og maayo sa paghatag og tukma nga tambag aron sa pagtabang sa among pinalangga nga brother nga mobalik ngadto ni Kristo.”
Sama sa nadiskobrehan niini nga bishopric, ang mga instruksyon nga makita diha sa mga handbook sa Simbahan “makapahigayon og pagpadayag kon kini gigamit aron sa paghatag og panabut sa mga baruganan, mga polisiya ug mga pamaagi nga magamit samtang nagtinguha sa giya sa Espiritu.”8
Ang mga Handbook Makatabang Kanato sa Pagpanalangin Niadtong Atong Giserbisyohan
Samtang kita mobasa, mosabut ug mosunod sa mga handbook, kini mahimo nga usa ka panalangin sa atong giserbisyuhan.9 Ang kausaban sa polisiya nga gilatid diha sa Handbook 2, sama pananglit, nakatabang sa usa ka bishop nga makapanalangin ug makalig-on sa usa ka amahan kinsa naghunahuna nga siya dili makahimo sa pag-orden sa iyang 12 anyos nga anak sa Aaronic Priesthood.
Ang kapitulo 20 namahayag, “Ang mga bishop ug mga presidente sa stake dunay paghukom sa pagtugot sa mga tighupot sa priesthood kinsa dili hingpit nga takus sa templo sa pagpahigayon o sa pag-apil sa pipila ka mga ordinansa ug mga panalangin,” lakip sa bunyag ug ordinasyon sa Aaronic Priesthood.10 Kay walay rekomend sa templo, kini nga amahan naghunahuna nga siya dili makahimo sa pag-orden sa iyang anak nga lalaki. Apan ang iyang bishop, “ingon nga gigiyahan sa Espiritu,”11 mihatag og pagtugot human sa usa ka interbyu.
“Kana nga kasinatian nakapausab sa iyang kinabuhi,” nahinumdom ang iyang bag-o nga bishop. “Kini usa ka bahin sa proseso sa iyang pagkahimong takus sa templo, na-sealed kauban ang iyang asawa diha sa templo, ug ang ilang mga anak na-sealed ngadto kanila.”
Pagka-flexible ug Pagpahiangay—sulod sa Tukmang mga Limitasyon
Ang pagpadayon sa pagkapareha sa mga baruganan, mga polisiya ug mga pamaagi sa Simbahan “makahatag og impluwensya sa Espiritu Santo ngadto sa kinabuhi sa mga lider ug mga miyembro,” miingon si Elder Quentin L. Cook sa Korum sa Napulog Duha ka mga Apostoles.12 Apan sa usa ka tibuok kalibutan nga Simbahan diin ang mga miyembro nag-atubang og lain-laing mga politikanhon, sosyal, ug ekonomikanhong mga kondisyon, ang pipila ka mga branch ug ward mahimong magkulang og igong gidaghanon sa mga miyembro, pagpangulo, ug mga kapanguhaan sa pagpatuman sa hingpit nga programa sa Simbahan. Ang ubang unit nag-atubang og mga isyu nga may kalabutan sa kasiguroan, transportasyon, komunikasyon, ug ekonomikanhong mga kahimtang sa pamilya.
Ang kapitulo 17 diha sa Handbook 2 nagklaro “diin ang pagkapareho gikinahanglan” ingon man usab sa “mga kahimtang nga mahimong magtugot niining lokal nga pagpahiangay” diha sa mga staff ug mga programa sa auxiliary ug sa format ug frequency sa mga miting sa pagpangulo ug mga kalihokan. Ang pagpahiangay kinahanglang pagahimoon, siyempre, human lamang nga ang mga lider magtinguha sa giya sa Espiritu Santo.13
Samtang ila kining buhaton, ang “tanan nga mga ward ug branch, dili magsapayan sa ilang gidak-on o mga kahimtang, makasinati sa sama nga kabuhong sa Espiritu sa Ginoo.”14
Ang Sinulat nga Han-ay sa mga Butang
Ang mga handbook naghatag kanato sa unsay gitawag og “sinulat nga han-ay sa mga butang.”
Ang Handbook 1, nga magamit sa bishop ug mga presidente sa stake, naglatid “sa kinatibuk-ang mga responsibilidad sa mga presidente sa stake ug sa mga bishop” ug naghatag og “detalyado nga impormasyon mahitungod sa mga polisiya ug mga pamaagi,”15 sugod sa mga templo, kaminyoon, ug misyonaryo nga pagserbisyo ngadto sa welfare, disiplina sa Simbahan, ug pinansyal.
Ang Handbook 2, nga magamit (lakip sa LDS.org) sa tanan nga mga lider sa Simbahan, mopaminus sa pagkakomplikado sa mga programa sa Simbahan samtang nagtugot, sama sa gipahibalo sa ibabaw, alang sa pagka-flexible ug pipila ka lokal nga pagpahiangay. Kini “usa ka giya alang sa mga miyembro sa ward ug stake council”16 ug sa ilang mga auxiliary sa pagdumala sa Simbahan ug sa buhat niini sa kaluwasan.
Ang hiniusang kaalam nga makita diha sa mga handbook gihan-ay sa paagi nga kini mahimong sayon nga ma-access ug magamit sa pagmugna og usa ka tinuod nga kultura sa pagserbisyo nga kinahanglang maanaa sa tanang ward ug mga stake sa Simbahan sa Manluluwas. Apan sa pag-access niana nga kaalam, kita kinahanglang magtuon sa mga handbook, magkat-on gikan niini, sabton og maayo ang mga baruganan niini, ug ibutang kadto nga mga baruganan sa buhat! Ang resulta mao ang kahayag, panabut, ug ang taas og tagal nga mga panalangin sa pagdiskobre sa pinakamaayong paagi sa pagserbisyo sa atong mga kaigsoonan.
Kabahin sa atong pagserbisyo sa Simbahan, si Presidente Dieter F. Uchtdorf, Ikaduhang Magtatambag sa Unang Kapangulohan, nakaobserbar: “Samtang atong ipaabut ang atong mga kamot ug kasingkasing ngadto sa uban sa Kristohanong gugma, usa ka talagsaong butang ang mahitabo kanato. Ang atong kaugalingong espiritu mamaayo, mas molambo, ug mas molig-on. Kita mamahimong mas malipayon, mas malinawon, ug mas madawaton sa mga paghunghong sa Balaang Espiritu.”17
Ang mga Handbook Makatabang Kanato nga Makita ang Kompleto nga mga Hulagway
Atol sa kinatibuk-ang komperensya niadtong Abril 2015, si Elder Rafael E. Pino sa Seventy misaysay og istorya kon sa unsang paagi nga ang usa sa iyang anak nga lalaki nasagmuyo samtang nagsulbad og jigsaw puzzle. “Sa katapusan nakakat-on ra siya nga mohimo sa puzzle,” si Elder Pino nahinumdom, “sa dihang nakasabut siya nga ang matag gagmay nga piraso dunay kabutangan niini sa kinatibuk-an.”18
Sa bisan unsang kapasidad sa atong pagserbisyo sa Simbahan, ang mga handbook, sama sa hulagway diha sa kahon sa usa ka jigsaw puzzle, mohatag kanato og usa ka panan-awon—sa kinatibuk-ang hulagway. Kana nga hulagway mogiya kanato ug mohatag kanato og mas maayong panabut sa unsay gusto sa Ginoo nga atong matuman diha sa pagserbisyo Kaniya. Samtang kita mosunod sa mga handbook ug mogamit sa tiningub nga kaalam nga gitanyag niini, ang Ginoo motabang kanato ug niadtong atong giserbisyohan nga mahimong “nangatugob [hingpit] diha kaniya” (Mga Taga-Colosas 2:10).
Ang mga handbook magpabilin nga usa ka mahinungdanon nga bahin sa pagdumala sa Simbahan ug sa pagpanalangin sa mga miyembro ug mga lider niini bisan unsa pa man ang mga kausaban sa umaabut diha sa mga format ug sulod. Sama sa gipahayag ni Presidente Henry B. Eyring, Unang Magtatambag sa Unang Kapangulohan, ang mga handbook “mamahimo ninyong usa ka bahandi samtang kamo mogamit niini aron sa pagtabang ninyo nga mangulo sa uban sa pagpili sa dalan ngadto sa kinabuhing dayon. Mao kanay katuyoan niini.”19