Magpabilin o Mosunod?
Ang tagsulat nagpuyo sa Philippines.
Sa dihang akong gisultihan ang akong mga ginikanan nga gusto kong moserbisyo og misyon, ang ilang tubag wala damha. Giingnan ko nila nga mopili sa akong pamilya o sa akong misyon.
Paghulagway pinaagi ni Scott Jarrard
Nakahinumdom gihapon ko sa mga pulong sa mga misyonaryo kinsa mitudlo kanako: “Bisan unsa ang isugo sa Dios, buhata kini, ug mosunod ang mga panalangin.” Kini nga mga pulong nakahatag og usa ka lawom nga impresyon sa akong kasingkasing. Nabunyagan ko sa edad nga 16, ang bugtong miyembro sa Simbahan sa akong pamilya. Paglabay sa walo ka bulan, ako napanalanginan nga makakita sa akong kinamanghuran nga igsoon nga nabunyagan diha sa Simbahan.
Sa dihang ako nag-18, gusto ko nga moserbisyo og full-time nga misyon ug motabang sa buhat sa Ginoo. Naghinam-hinam ko nga misulti sa akong mga ginikanan mahitungod sa akong plano ug sa akong dakong tinguha sa pagdapit sa mga tawo sa pagduol ngadto kang Jesukristo pinaagi sa pagtabang kanila nga makadawat ug makasunod sa mga baruganan ug mga ordinansa sa ebanghelyo. Nakalitan ko sa ilang tubag. Sila miingon nga nakapaguol kaayo kanila ang paghunahuna nga mobiya ako aron sa pagmisyon, ug kinahanglan ko nga mopili: ang akong pamilya o ang akong misyon.
Nahugno ko pagkadungog nako niadto nga mga pulong. Diha-diha dayon miadto ko sa building sa Simbahan nga duol sa among balay ug misulod sa usa sa mga kwarto niini aron moluhod ug mangutana sa Langitnong Amahan, “Unsay akong buhaton? Unsay akong pilion: ang akong pamilya o ang akong misyon? Kining duha importante kanako.”
Samtang nagluhod, ang mga pulong sa mga misyonaryo miabut sa akong hunahuna: “Bisan unsa ang isugo sa Dios, buhata kini.”
Akong gihigugma ang akong pamilya ug gusto nga makauban sila sa kahangturan. Akong girespeto ang ilang mga pagbati. Apan ang kasulatan nag-ingon, “Ang pagsugot labi pang maayo kay sa halad” (1 Samuel 15:22). Ang Espiritu sa Ginoo mipuno kanako, ug ako nalig-on. Mihukom ko sa pagserbisyo tungod kay ako nasayud nga ang Langitnong Amahan motabang sa akong pamilya nga makasabut.
Sa akong pag-uli gipalayas ko sa akong nasuko pag-ayo nga amahan ug giingnan nga dili na gayud mobalik. Wala masayud asa paingon, akong giimpaki ang akong mga butang. Wala ko mahadlok bisan gamay, tungod kay ako nasayud nga ang Ginoo nag-uban kanako, nga Siya adunay plano alang sa matag pamilya, ug moabut ang adlaw nga ang akong pamilya makasabut niining maanindot nga plano.
Mga pipila pa lamang ka lakang ang akong gilay-on gikan sa balay sa dihang naapsan ko sa akong inahan. Siya migakos kanako ug miingon nga gimahal ko niya pag-ayo. Sa akong pagbiya, nakita nako siya nga naghilak uban sa tumang gugma ug kasakit sa usa ka inahan nga nagtan-aw sa iyang anak nga mobiya.
Sobra sa usa ka tuig, mipuyo ko sa balay sa usa ka returned missionary nga akong nahimamat sa dihang investigator pa ko. Ang Ginoo matinud-anon sa Iyang saad sa 1 Nephi 3:7—mihatag Siya og paagi aron ako makasunod sa Iyang mga sugo. Mipadala siya niining dili hakog ug manggihatagon nga tawo sa pagsangkap kanako ug sa pagmugna og usa ka espirituhanong palibut diin ako makaandam alang sa akong misyon. Akong gibati ang kamot sa Dios nga nagsuporta nako sa akong mga hagit. Akong gibati ang gugma sa atong Manluluwas nga si Jesukristo pinaagi sa Iyang maulaong sakripisyo. Kini nga gugma milig-on kanako sa akong mga pagsulay hangtud nga gi-set apart ko isip usa ka full-time nga misyonaryo sa Philippines Cauayan mission.
Paglabay sa pipila ka bulan, nakadawat ko og sulat gikan sa akong pamilya nga nagsulti kanako nga sila nagpaabut sa akong pagbalik. Wala ko mawagtangi sa pagtuo ug paglaum nga ang akong tibuok pamilya mahimong mga miyembro sa Simbahan, ma-sealed sa templo sa tibuok kahangturan, ug makauban sa atong Langitnong Amahan ug sa Iyang Anak, si Jesukristo, sa umaabut.
Human sa akong misyon, misugod ko sa pagkakita niana nga damgo nga natinuod. Nabunyagan nako ang akong inahan, kinsa karon nangandam nga moadto sa templo. Kanunay nakong makita ang akong pamilya, ug mas suod kami karon kaysa kaniadto.